Bou nyen shanga chem
Dawid to sanoubü Tair Choba Hiramei seneibü Bou nyen shanga chem shanga bu hoba dangbou shuong hautikei; Solomonei nopmaia buhek hoba sanam hautikei, hoba Choba nyiei thesilan kümkei. Kho pendou takla hoba haula shanga, Solomonei Israelbü hajar bang shuong lit weko bang phaibang danko khangkei.
5 1Tair Choba Hiramei Solomon haobou phaia Choba shanga naangkukei dogo ditkei, hoba hao jungto sambü shuong hautikei; aishanga Hiramei Dawid ponpen sanoukei. 2Hobaje Solomonei Hiram jungto ngüh ho lentikei, 3Kü bou Dawid seneibü Bou nyen shanga chem che danglabü athükkei dogo nyi ngekei; aishanga wapyo shuongei hao kaijembo kailepbei, seneibü Bouei haoeibü dangbou shuong hao you younakshang la ayeiti shongko. 4Lausikei tou kü Bouei ngo la kaijembo hakso kukei; dangbou aying, khonsak aying.
5Khoei ngei kü Bou nyen shanga chem che dangla mangsühda; aishanga seneibü Bouei kü bou Dawid la thekubü tegü laukei, “Kaibü shou, aoeibü ngo kaibü jeila kaibü Choba setshang la setlabü, haoei kü nyen shanga chem che danglabü.”
6Kheijinei tou ngo shanga Lebanon ka cedar bu takkushi. Kü sambü shuong kaibü sambü shuong yoa kümsilei kümlabü; hoba nyi mu ai thelaje ngei kho ka la kulabü, aishanga seneibü yoka Sidonbü tegü bu takla ngebou aki dogo nyi ngekei.
7Hiramei Solomoneibü ngüh ditjinei aeibou olinyokei hoba laukei, “Tat Bunyubou haübou, aoei ho mütli yaangbü thüka Dawid la songsido kibü shou che kukei.” 8Hobaje Hiramei Solomon jungto ngüh hautikei, “Ngei kaibü ngühlang ditkei; cedar bu hoba busim yoa nyi ai ong mangsühda, kho pendou ngei kümlabü. 9Kü sambü shuongei Lebanon ka yungnyu to bu shuong yanlangkulabü, kheijinei ngei kho yungnyu danko anjinan nyi lenbü neichem to hautikulabü, khünei kho phetnyinlabü, hoba nyi kho jungan satlabü. Nyi kü chempen shanga shausiyung kuan ngeibü khambü loushedlabü.”
10Hibü Hiramei Solomon la haoei khambü tegü cedar bu hoba busim bu pendou kukei, 11Solomonei Hiram la haoeibü chempen shanga whet youshou taksi hajar saoche abou hoba nitbü onang taksi saoche abou, po weko kukei. 12Seneibü Bouei haoei thekubü tegütham, Solomon la songsihon kukei. Hiram hoba Solomon kanglanga sangmai kibei, hoba haosiei theyolanyobü che kümbei.
13Solomon Chobaei Israel pendou ka kümaleia müt longtikei, hoba kümaleia müt hajar khujin kikei. 14Haoei lit weko müt hajar anthük Lebanon to annepenko hautikei—lit che khünei, lit nyi chema. Adoniramei kümaleia leiyeibou kikei. 15Solomon la on jungbü müt hajar anjinlei hoba shongh kaodaka laang takbü müt hajar saolei kikei, 16Kho pendou to limbo, Solomoneibü kümsileia kongnyu leiyeibü shuong müt hajar sem hoba saongao sem kikei, haoenei kümsilei leiyeikei hoba kümsilei kümbü mütshuong lajamleikei. 17Chobaei sakkubü tegü, chem chemshang jakenbü laangei yeila shanga, haoenei laang yaangbü namseklaang shuong sunglangkei. 18Chem dangla shanga Solomoneibü, Hirameibü hoba Gebalbü mistri shuongei wa hoba laang shapan lamlekei.
