Pitri laga nam nimite ekta ghor
Tyre laga raja Hiram, jun pora David ke morom korise, amar Pitri laga nam nimite ghor bonabole kath aru kam kora manuh khan pathai dise; Solomon pora badla te gehun aru tel pathai dise, aru duijon raja pora ekta kosom bandhi loise. Pathor kati bole aru sob tani anibole, Solomon pora dos-dos hajar Israel manuh ke pala kori kene kam te lagai dise.
5 1Tyre laga raja Hiram pora, Solomon tar laga pitri pichete raja hobole abhishek korise koi kene hunise, aru tar ke noukar khan pathai dise; kilemane Hiram pora David ke hodai morom kori ahhise. 2Aru Solomon pora Hiram ke eneka khobor pathai dise, 3Apuni jani ase, moi laga pitri David pora amar Pitri laga nam nimite ekta ghor bona bo para nai, kilemane sob phale pora lorai pora tar ke gheri thakise, jitia tak amar Pitri pora tar laga dushman khan ke tar bhori laga tol te narakhise. 4Kintu etiya moi laga Pitri pora moi ke sob phale te aram dise; kun bhi dushman nai, kun bhi dukh nai.
5Moi laga Pitri laga nam nimite ekta ghor bona bole bhabi ase, jineka amar Pitri pora moi laga pitri David ke vachan dise, “Tumar laga chokra, kun ke Moi tumar jaga te tumar singhason te boha bo dibo, tai pora Moi laga nam nimite etu ghor tu bona bo.”
6Etu nimite Lebanon pora moi karne cedar gas khan kati dibi. Moi laga noukar khan apuni laga noukar khan logot te kaam koribo; apuni ki mojuri thik koribo, moi etu dibo, kilemane apuni jani ase, Sidon manuh khan nisena amikhan kun bhi gas kati bo napare.
7Solomon laga kotha huni kene, Hiram bisi khushi hoise aru koise, “Aji Prabhu ke dhanyabad hobi, kun pora David ke etu dangor manuh khan uporte ekjon gyaani chokra dise.” 8Hiram pora Solomon ke khobor pathai dise, “Apuni laga khobor moi hunise; cedar aru cypress laga gas pora apuni ki itcha kore, moi sob koribo.” 9“Moi laga noukar khan pora Lebanon pora gas khan samundar te namai anibo, titia moi etu khan ke bhelki bonai kene samundar rasta pora apuni thik kora jaga te pathabo, aru ta te etu khan ke bhangai dibo, aru apuni etu loi jabo. Apuni moi laga ghor manuh khan nimite kha luwa jogai di kene moi laga dorkar purah koribo.”
10Eneka Hiram pora Solomon ke tai itcha kora sob cedar aru cypress laga gas dise, 11Solomon pora Hiram ke, tar ghor manuh khan nimite, 1,20,000 bushel gehu aru 120 bushel chapi kene bona tel, saal pichete saal dise. 12Amar Pitri pora Solomon ke, Tai vachan diya nisena, gyaan dise. Hiram aru Solomon majot te shanti thakise, aru duijon pora ekta vachan bonaise.
13Raja Solomon pora pura Israel pora kaam kora manuh khan ulaise, aru etu kaam manuh khan 30,000 jon thakise. 14Tai pora har mahina te palti-palti kori kene 10,000 jon ke Lebanon te pathaise—ek mahina ta te, dui mahina ghor te. Adoniram pora kaam kora manuh khan ke saise. 15Solomon logot te bhar bukha 70,000 jon aru pahar desh te pathor kata 80,000 jon thakise, 16etu pora bahar te, Solomon laga 3,300 jon mukhyo adhikari khan thakise, kun pora kaam ke saise aru etu kora manuh khan ke cholaise. 17Raja laga hukum pora tarkhan dangor aru daam pathor khan katise, kati bona pathor pora ghor laga bhetimul bona bole. 18Solomon aru Hiram laga ghor-bona manuh khan aru Gebal laga manuh khan pora, ghor bona bole gas aru pathor khan katise aru taiyar korise.