1ይ ነገስት 5 FHB Father's Heart Bible™

5 ¹ኪራም ንጉስ ጢሮስ፥ ሰሎሞን ኣብ ክንዲ ኣቦኡ ንጉስ ኮይኑ ከም ዝተቐብአ ምስ ሰምዐ፥ ኣገልገልቱ ሰደደሉ፤ ኪራም ንዳዊት ኵልሻዕ የፍቅሮ ነበረ እዩሞ። ²ሰሎሞን ድማ ናብ ኪራም ከምዙይ ኢሉ ለኣኸ፦ ³ኣቦይ ዳዊት፥ ብዙርያኡ ውግኣት ስለ ዝኸበብዎ፥ ክሳዕ ኣቦና ንፀላእቱ ኣብ ትሕቲ ከብዲ ኣእጋሩ ዝገብሮም፥ ንስም ኣቦና ቤት ክሰርሕ ከም ዘይከኣለ ትፈልጥ ኢኻ። ⁴ሕዚ ግና ኣቦይ ብዅሉ ወገን ዕረፍቲ ሂቡኒ ኣሎ፤ ፀላኢ የለን፥ መቕሰፍቲ የለን።

⁵እንሆ፥ ከምቲ ኣቦና ንኣቦይ ዳዊት ዘተስፈዎ፦ “እቲ ኣብ ክንዳኻ ኣብ ዙፋንካ ዘንብሮ ወድኻ፥ ንሱ ንስመይ እቲ ቤት ክሰርሖ እዩ” ዝበሎ፥ ኣነ ኸዓ ንስም ኣቦይ ቤት ክሰርሕ ሓሲበ ኣለኹ።

⁶ስለዙይ ሕዚ ካብ ሊባኖስ ዝግባ ይቑረፀለይ። ኣገልገልተይ ምስ ኣገልገልትኻ ክሰርሑ እዮም፤ ከምቲ እትብሎ ዓስቢ ድማ ክህበካ እየ፤ ካባና ኸም ሲዶናውያን ገይሩ ዕንፀይቲ ዝቖርፅ ከም ዘየለ ትፈልጥ ኢኻሞ።

⁷ኪራም ድማ ቃላት ሰሎሞን ሰሚዑ፥ የመና ተሓጐሰ፤ ከምዙይ ድማ በለ፦ “ነዝ ዓብዪ ህዝቢ እዙይ ዝገዝእ ጥበበኛ ወዲ ንዳዊት ዝሃቦ እግዚኣብሄር፥ ሎሚ ይመስገን።” ⁸ኪራም ድማ ናብ ሰሎሞን ከምዙይ ኢሉ ለኣኸ፦ “መልእኽትኻ ሰሚዐ ኣለኹ፤ ብዕንፀይቲ ዝግባን ፅሕድን እትደልዮ ዅሉ ክገብረልካ እየ። ⁹ኣገልገልተይ ካብ ሊባኖስ ናብ ባሕሪ ዕንፀይቲ ከውርዱ እዮም፤ ኣነ ድማ ብባሕሪ ገይረ ኣሳፊፈ ናብቲ እትእዝዞ ቦታ ከብፅሖ እየ፤ ኣብኡ ኸዓ ክፈላልዮ እየ፤ ንስኻ ድማ ክትወስዶ ኢኻ። ንስኻ ኸዓ ንቤተሰበይ ምግቢ ብምሃብ ድልየተይ ከተማልኣለይ ኢኻ።”

¹⁰ከምዙይ ገይሩ ኸዓ ኪራም ንሰሎሞን ዝደለዮ ዅሉ ዕንፀይቲ ዝግባን ፅሕድን ሃቦ። ¹¹ሰሎሞን ድማ ንኪራም ንቤተሰቡ ዝኸውን ዳርጋ ሚእትን ዕስራን ሽሕ መስፈሪ ስርናይን ዳርጋ ሚእትን ዕስራን መስፈሪ ዝፀለለ ዘይትን ዓመት ዓመት ይህቦ ነበረ። ¹²ኣቦና ድማ ከምቲ ዘተስፈዎ ንሰሎሞን ጥበብ ሃቦ። ኪራምን ሰሎሞንን ከዓ ብሰላም ነበሩ፤ ክልቲኣቶም ድማ ኺዳን ተኣታተዉ።

¹³ንጉስ ሰሎሞን ካብ ብዘላ እስራኤል ዓየይቲ ኣኽተተ፤ ብዝሒ እቶም ዝተኣኽተቱ ድማ ሰላሳ ሽሕ ሰብኣይ ነበረ። ¹⁴በብወርሑ ዓሰርተ ሽሕ እናተፈራረቑ ናብ ሊባኖስ ይሰዶም ነበረ፤ ሓደ ወርሒ ኣብኡ፥ ክልተ ወርሒ ድማ ኣብ ቤቶም ይውዕሉ ነበሩ። ኣዶኒራም ነቶም ዓየይቲ ይመርሕ ነበረ። ¹⁵ሰሎሞን ድማ ፆር ዝፅዕኑ ሰብዓ ሽሕ፥ ኣብ ከረን ድማ እምኒ ዝዅዕቱ ሰማንያ ሽሕ ነበርዎ፤ ¹⁶ብዘይ እቶም ነቲ ስራሕ ዝቈፃፀሩን ነቶም ዝሰርሑ ህዝቢ ዝእዝዙን ሰለስተ ሽሕን ሰለስተ ሚእትን ዓበይቲ ሓለፍቲ ሰሎሞን። ¹⁷ብትእዛዝ እቲ ንጉስ ድማ መሰረት እቲ ቤት ብፅሩብ እምኒ ምእንቲ ኽምስርቱ፥ ዓበይትን ክቡራትን ኣእማን ዀዓቱ። ¹⁸ሃነፅቲ ሰሎሞንን ሃነፅቲ ኪራምን ከምኡውን እቶም ጌባላውያን ድማ ነቲ ቤት ንምስራሕ ዕንፀይትን ኣእማንን ፀሪቦም ኣዳለዉ።