ዘፀአት 8

8 ¹አባታችንም ሙሴን እንዲህ አለው፤ “ወደ ፈርዖን ሄደህ እንዲህ በለው፤ ‘አባታችን እንዲህ ይላል፤ ሕዝቤ እንዲያመልኩኝ ልቀቃቸው። ²መልቀቅ ብትእምቢ ግን፣ መላ አገርህን በእንቍራሪቶች እቀጣለሁ። ³የናይል ወንዝ በእንቍራሪቶች ይርመሰመሳል፤ እነርሱም ወጥተው ወደ ቤትህ፣ ወደ መኝታ ክፍልህና ወደ አልጋህ፣ ወደ ባሪያዎችህና ወደ ሕዝብህ ቤቶች፣ ወደ ምድጃዎችህና ወደ ሊጥ መቡኪያዎችህ ይገባሉ። ⁴እንቍራሪቶቹም በአንተ ላይ፣ በሕዝብህ ላይና በባሪያዎችህ ሁሉ ላይ ይወጣሉ።’” ⁵አባታችንም ሙሴን እንዲህ አለው፤ “አሮንን እንዲህ በለው፤ ‘በትርህን በያዝህበት እጅህ በወንዞች፣ በቦዮችና በኵሬዎች ላይ ዘርጋ፤ እንቍራሪቶችንም በግብፅ ምድር ላይ አውጣ።’”

⁶አሮንም እጁን በግብፅ ውሃዎች ላይ ዘረጋ፤ እንቍራሪቶችም ወጥተው የግብፅን ምድር ሸፈኑ። ⁷ጠንቋዮቹም እንደዚሁ በስውር ጥበባቸው አደረጉ፤ እንቍራሪቶችንም በግብፅ ምድር ላይ አወጡ።

⁸ፈርዖንም ሙሴንና አሮንን ጠርቶ እንዲህ አለ፤ “እንቍራሪቶቹን ከእኔና ከሕዝቤ እንዲያስወግድ እግዚአብሔርን ለምኑ፤ እኔም ሕዝቡ ለእግዚአብሔር መሥዋዕት እንዲያቀርቡ እለቃቸዋለሁ።”

⁹ሙሴም ፈርዖንን እንዲህ አለው፤ “ክብሩ ያንተ ይሁን፤ ጊዜውን ራስህ ወስን፤ እንቍራሪቶቹ ከአንተና ከቤቶችህ ተለይተው በወንዙ ውስጥ ብቻ እንዲቀሩ፣ ለአንተ፣ ለባሪያዎችህና ለሕዝብህ መቼ ልጸልይ?”

¹⁰እርሱም፣ “ነገ” አለ። ሙሴም መልሶ እንዲህ አለ፤ “እንዳልኸው ይሁን፤ ይህም እንደ አባታችን ያለ ማንም እንደሌለ ታውቅ ዘንድ ነው።

¹¹እንቍራሪቶቹ ከአንተ፣ ከቤቶችህ፣ ከባሪያዎችህና ከሕዝብህ ይርቃሉ፤ በወንዙ ውስጥ ብቻ ይቀራሉ።”

¹²ሙሴና አሮን ከፈርዖን ዘንድ ወጡ፤ ሙሴም አባታችን በፈርዖን ላይ ስላመጣው እንቍራሪቶች ጒዳይ ወደ አባታችን ጮኸ። ¹³አባታችንም ሙሴ እንደ ለመነው አደረገ፤ እንቍራሪቶቹም በቤቶች፣ በአደባባዮችና በዕርሻዎች ውስጥ ሞቱ። ¹⁴ክምር በክምር ላይ አከማቿቸው፤ ምድሪቱም ገማች። ¹⁵ፈርዖን ግን እፎይታ እንደ ሆነ ባየ ጊዜ፣ ልቡን አደነደነ፤ አባታችን እንደ ተናገረውም አልሰማቸውም።

ከዐፈር የመጡ ትንኞች

¹⁶አባታችንም ሙሴን እንዲህ አለው፤ “አሮንን እንዲህ በለው፤ በትርህን ዘርግተህ የምድሪቱን ዐፈር ምታ፤ በግብፅ ምድር ሁሉ ትንኝ ይሆናል።”

¹⁷እንዲሁም አደረጉ። አሮን በትሩን በያዘው እጁ የምድሩን ዐፈር መታ፤ ትንኞችም በሰውና በእንስሳት ላይ መጡ። በግብፅ ምድር ሁሉ የምድሩ ዐፈር ትንኝ ሆነ። ¹⁸ጠንቋዮቹም ትንኞችን ለማውጣት በስውር ጥበባቸው ሞከሩ፤ ነገር ግን አልቻሉም። ትንኞችም ሰውንና እንስሳትን ሸፈኑ። ¹⁹ጠንቋዮቹም ፈርዖንን፣ “ይህ የእግዚአብሔር ጣት ነው” አሉት። የፈርዖን ልብ ግን ደንድኖ ቀረ፤ አባታችን እንደ ተናገረውም አልሰማቸውም።

በጎሤን የተደረገ ልዩነት

²⁰አባታችንም ሙሴን እንዲህ አለው፤ “ማለዳ ተነሥተህ ፈርዖን ወደ ውሃው ሲወጣ በፊቱ ቁም፤ እንዲህም በለው፤ ‘አባታችን እንዲህ ይላል፤ ሕዝቤ እንዲያመልኩኝ ልቀቃቸው።

²¹“ሕዝቤን ባትለቅ፣ በአንተ፣ በባሪያዎችህ፣ በሕዝብህና በቤቶችህ ላይ የዝንብ መንጋ እሰዳለሁ። የግብፃውያንም ቤቶች በዝንብ ይሞላሉ፤ የሚቆሙባትም ምድር እንኳ ትሞላለች። ²²በዚያም ቀን ሕዝቤ የሚኖሩባትን የጎሤንን ምድር እለያለሁ፤ በዚያ ዝንብ አይኖርም፤ እኔ አባትህ በምድሪቱ መካከል እንዳለሁ ታውቅ ዘንድ ነው። ²³በሕዝቤና በሕዝብህ መካከል ልዩነት አደርጋለሁ። ይህ ምልክት ነገ ይሆናል።’”

²⁴አባታችንም እንዲሁ አደረገ። ብዙ የዝንብ መንጋ የፈርዖንን ቤትና የባሪያዎቹን ቤቶች ሞላ፤ በግብፅ ምድር ሁሉ ምድሪቱ በዝንብ መንጋ ጠፋች።

²⁵ፈርዖንም ሙሴንና አሮንን ጠርቶ፣ “ሂዱ፤ በዚች ምድር ለአምላካችሁ መሥዋዕት አቅርቡ” አለ።

²⁶ሙሴ ግን እንዲህ አለ፤ “ይህ ተገቢ አይደለም፤ ለአባታችን የምናቀርበው መሥዋዕት ለግብፃውያን አስጸያፊ ነውና። ለእነርሱ አስጸያፊ የሆነውን በፊታቸው ብናቀርብ፣ በድንጋይ አይወግሩንምን? ²⁷የሦስት ቀን መንገድ ወደ ምድረ በዳ ሄደን፣ እንዳዘዘን ለአባታችን መሥዋዕት ማቅረብ አለብን።”

²⁸ፈርዖምም እንዲህ አለ፤ “በምድረ በዳ ለእግዚአብሔር አምላካችሁ መሥዋዕት እንድታቀርቡ እለቅቃችኋለሁ፤ ነገር ግን እጅግ ሩቅ አትሂዱ። ለእኔም ለምኑ።”

²⁹ሙሴም እንዲህ አለ፤ “ከአንተ ዘንድ እንደ ወጣሁ ወዲያው አባታችንን እለምናለሁ፤ ነገም የዝንብ መንጋ ከፈርዖን፣ ከባሪያዎቹና ከሕዝቡ ይርቃል። ፈርዖን ግን ሕዝቡ ሄዶ ለአባታችን መሥዋዕት እንዳያቀርብ በመከልከል ዳግመኛ አያታልል።” ³⁰ሙሴም ከፈርዖን ዘንድ ወጥቶ አባታችንን ለመነ። ³¹አባታችንም ሙሴ እንደ ለመነው የዝንብ መንጋ ከፈርዖን፣ ከባሪያዎቹና ከሕዝቡ አስወገደ፤ አንድም አልቀረም። ³²ፈርዖን ግን በዚህ ጊዜ ደግሞ ልቡን አደነደነ፤ ሕዝቡንም አልለቀቀም።