ዘፀአት 7

7 ¹አባታችን ሙሴን እንዲህ አለው፤ “እነሆ፣ ለፈርዖን እንደ አምላክ አድርጌሃለሁ፤ ወንድምህ አሮንም ነቢይህ ይሆናል። ²የማዝዝህን ሁሉ ትናገራለህ፤ ወንድምህ አሮንም እስራኤላውያንን ከአገሩ እንዲለቅ ፈርዖንን ይነግረዋል። ³እኔ ግን የፈርዖንን ልብ አደነድነዋለሁ፤ ድንቅ ምልክቶቼንና ተአምራቶቼን በግብፅ ምድር አበዛለሁ። ⁴ፈርዖን አይሰማችሁም፤ ስለዚህ እጄን በግብፅ ላይ አነሣለሁ፤ በታላቅ ፍርድም ሰራዊቴን — ሕዝቤን የእስራኤልን ዘር — ከግብፅ ምድር አወጣለሁ። ⁵እጄን በግብፅ ላይ በዘረጋሁ ጊዜ፣ የእስራኤልንም ሕዝብ ከመካከላቸው ባወጣሁ ጊዜ፣ ግብፃውያን እኔ አብ እንደ ሆንሁ ያውቃሉ።”

⁶ሙሴና አሮንም እንዲሁ አደረጉ፤ አባታችን እንዳዘዛቸው አደረጉ። ⁷ፈርዖንን ባነጋገሩ ጊዜ ሙሴ የሰማንያ ዓመት፣ አሮንም የሰማንያ ሦስት ዓመት ሰው ነበር።

⁸አባታችንም ሙሴንና አሮንን እንዲህ አላቸው፤

⁹ፈርዖን፣ “በተአምር ራሳችሁን አስመስክሩ” ባላችሁ ጊዜ፣ አሮንን፣ “በትርህን ይዘህ በፈርዖን ፊት ጣለው፤ እባብም ይሆናል” በለው።

¹⁰ሙሴና አሮንም ወደ ፈርዖን ገብተው አባታችን እንዳዘዘ አደረጉ። አሮን በትሩን በፈርዖንና በሎሌዎቹ ፊት ጣለው፤ እባብም ሆነ። ¹¹ፈርዖንም ጠቢባንንና አስማተኞችን ጠራ፤ የግብፅ ጠንቋዮችም በስውር ጥበባቸው እንዲሁ አደረጉ። ¹²እያንዳንዱ በትሩን ጣለ፤ እባቦችም ሆኑ። የአሮን በትር ግን በትሮቻቸውን ዋጠ። ¹³የፈርዖንም ልብ ደነደነ፤ አባታችን እንደ ተናገረ፣ አልሰማቸውም።

ናይል ወደ ደም ተለወጠ

¹⁴አባታችንም ሙሴን እንዲህ አለው፤ “የፈርዖን ልብ ደንዳና ነው፤ ሕዝቡን ለመልቀቅ እምቢ ብሏል። ¹⁵ፈርዖን ወደ ውሃ በሚወጣበት ጊዜ በማለዳ ወደ እርሱ ሂድ። ልትገናኘው በናይል ዳር ቁም፤ ወደ እባብ የተለወጠውንም በትር በእጅህ ያዝ። ¹⁶እንዲህም በለው፤ የዕብራውያን አባታችን፣ “ሕዝቤ በምድረ በዳ እንዲያገለግለኝ ልቀቅ” ብሎ ወደ አንተ ላከኝ። አንተ ግን እስካሁን አልሰማህም። ¹⁷አባታችን እንዲህ ይላል፤ ‘እኔ አብ እንደ ሆንሁ በዚህ ታውቃለህ፤ እነሆ፣ በእጄ ባለው በትር የናይልን ውሃ እመታለሁ፤ ወደ ደምም ይለወጣል። ¹⁸በናይል ያሉ ዓሦች ይሞታሉ፤ ናይልም ይገማል፤ ግብፃውያንም ከናይል ውሃ ለመጠጣት አይችሉም።’” ¹⁹አባታችንም ሙሴን እንዲህ አለው፤ “አሮንን እንዲህ በለው፤ በትርህን ይዘህ በግብፅ ውሆች ላይ — በወንዞቻቸው፣ በቦዮቻቸው፣ በኵሬዎቻቸውና በመጠራቀሚያዎቻቸው ሁሉ ላይ — እጅህን ዘርጋ፤ ደምም ይሆናሉ። በግብፅ ሁሉ፣ በእንጨትና በድንጋይ ዕቃ ሳይቀር ደም ይሆናል።”

²⁰ሙሴና አሮንም አባታችን እንዳዘዘ አደረጉ፤ በፈርዖንና በሎሌዎቹ ፊት አሮን በትሩን አንሥቶ የናይልን ውሃ መታ፤ ውሃውም ሁሉ ወደ ደም ተለወጠ። ²¹በናይል ያሉ ዓሦች ሞቱ፤ ናይልም ገማ፤ ግብፃውያንም ከናይል ውሃ መጠጣት አልቻሉም። በግብፅ ምድር ሁሉ ደም ሆነ። ²²የግብፅ ጠንቋዮች ግን በስውር ጥበባቸው እንዲሁ አደረጉ፤ ስለዚህ የፈርዖን ልብ ደንዳና ሆኖ ቀረ፤ አባታችን እንደ ተናገረ፣ አልሰማቸውም። ²³ፈርዖንም ዘወር ብሎ ወደ ቤቱ ገባ፤ ይህንም ነገር እንኳ በልቡ አልያዘውም። ²⁴ግብፃውያንም ሁሉ የናይልን ውሃ መጠጣት ስላልቻሉ፣ የሚጠጡትን ውሃ ፍለጋ በናይል አካባቢ ቈፈሩ። ²⁵አባታችን ናይልን ከመታ በኋላ ሰባት ሙሉ ቀን አለፈ።