Muso bilan Horunning vazifaga tayinlanishi

Muso Firʼavn uchun Xudodek qilinadi, Horun esa uning paygʻambari boʻladi. Otamizning soʻzi bilan Horunning hassasi ilonga aylanib, sehrgarlarning hassalarini yutib yuboradi. Soʻng Misrning hayoti boʻlgan Nil qonga aylanadi; baliqlar oʻladi, daryo sasib ketadi. Sehrgarlar buni takrorlaydi, Firʼavn esa parvo qilmaydi.

7-bob.

Otamiz Musoga dedi: “Qara, Men seni Firʼavnga Xudoday qilib qoʻydim, akang Horun esa paygʻambaring boʻladi. Men senga buyurgan hamma narsani sen aytasan; akang Horun esa Firʼavnga Isroil xalqini oʻz yurtidan qoʻyib yuborishini aytadi. Lekin Men Firʼavnning yuragini qattiq qilaman va Misr yurtida alomatu moʻjizalarimni koʻpaytiraman. Firʼavn sizlarga quloq solmaydi. Shuning uchun Men Misrga qarshi qoʻl koʻtarib, buyuk hukmlar bilan qoʻshinlarimni — xalqim, Isroil naslini — Misr yurtidan olib chiqaman. Men Misrga qarshi qoʻlimni uzatib, Isroil xalqini ular orasidan olib chiqqanimda, misrliklar Mening Ota ekanligimni bilib olishadi.”

Muso bilan Horun shunday qilishdi; Otamiz ularga buyurganiday qilishdi. Firʼavn bilan gaplashganlarida, Muso sakson yoshda, Horun esa sakson uch yoshda edi.

Shunda Otamiz Muso bilan Horunga dedi:

Firʼavn sizlarga: “Biror moʻjiza koʻrsatib, oʻzingizni isbotlang”, — deganda, Horunga ayt: “Hassangni ol, uni Firʼavn oldiga tashla, u ilonga aylanadi”.

Muso bilan Horun Firʼavn oldiga borib, Otamiz buyurganiday qilishdi. Horun oʻz hassasini Firʼavn va uning aʼyonlari oldiga tashladi, hassa ilonga aylandi. Shunda Firʼavn ham donishmandlaru sehrgarlarni chaqirtirdi, Misr afsungarlari ham oʻzlarining sirli ilmlari bilan shundayini qilishdi. Ularning har biri oʻz hassasini yerga tashladi, hassalar ilonlarga aylandi. Lekin Horunning hassasi ularning hassalarini yutib yubordi. Firʼavnning yuragi qattiqlashdi; Otamiz aytganiday, u ularga quloq solmadi.

Nil suvining qonga aylanishi

Shunda Otamiz Musoga dedi: “Firʼavnning yuragi tosh boʻlib qolgan; u xalqni qoʻyib yuborishni rad etmoqda. Ertalab, Firʼavn suv boʻyiga chiqqanida, uning oldiga bor. Uni kutib olgani Nil boʻyida tur, ilonga aylangan hassani qoʻlingga ol. Unga shunday ayt: Ibroniylarning Otasi meni sening oldingga yuborib: «Xalqim borib, sahroda Menga xizmat qilsin», — dedi. Sen esa shu paytgacha quloq solmading. Otamiz shunday demoqda: «Shundan Mening Ota ekanligimni bilib olasan: qara, qoʻlimdagi hassa bilan Nil suvini uraman, u qonga aylanadi. Nildagi baliqlar qirilib ketadi, Nil suvi sasiydi, misrliklar Nil suvini ichishga chiday olmaydilar.»” Otamiz Musoga dedi: “Horunga ayt: hassangni olib, qoʻlingni Misr suvlari — daryolari, kanallari, koʻlmaklari va barcha suv havzalari ustiga choʻz, ular qonga aylanadi. Butun Misr yurtini qon bosadi, hatto yogʻoch va tosh idishlarda ham qon boʻladi.”

Muso bilan Horun Otamiz buyurganiday qilishdi: Firʼavn va uning aʼyonlari oldida Horun hassani koʻtarib, Nil suvini urdi, butun suv qonga aylandi. Nildagi baliqlar qirilib ketdi, Nil suvi sasidi, misrliklar Nil suvidan ichisha olmadilar. Butun Misr yurtini qon bosgan edi. Lekin Misr afsungarlari ham oʻzlarining sirli ilmlari bilan shundayini qilishdi. Shu sababdan Firʼavnning yuragi qattiqligicha qoldi; Otamiz aytganiday, u ularga quloq solmadi. Firʼavn ortiga burilib, oʻz uyiga kirib ketdi, buni ham yuragiga olmadi. Barcha misrliklar Nil suvini ichisha olmaganlari uchun, ichgani suv topish maqsadida Nil boʻylab yer qazishdi. Otamiz Nil suvini urganidan keyin toʻppa-toʻliq yetti kun oʻtdi.