ዘፀኣት 7 FHB Father's Heart Bible™

7 ¹ኣቦና ድማ ንሙሴ ከምዙይ በሎ፦ “እንሆ፥ ኣነ ኣብ ቅድሚ ፈርዖን ከም ኣምላኽ ጌረካ ኣለኹ፤ ኣሮን ሓውካ ድማ ነብይኻ ክኸውን እዩ። ²ኣነ ዝእዝዘካ ዅሉ ንስኻ ኽትዛረብ ኢኻ፤ ኣሮን ሓውካ ድማ ንፈርዖን ንደቂ እስራኤል ካብ ሃገሩ ኽሰዶም ክነግሮ እዩ። ³ኣነ ግና ንልቢ ፈርዖን ከትርሮ እየ፤ ምልክታተይን ተኣምራተይን ድማ ኣብ ምድሪ ግብፂ ኸብዝሕ እየ። ⁴ፈርዖን ኣይክሰምዓኩምን እዩ እሞ፥ ኢደይ ኣብ ልዕሊ ግብፂ ከንብር እየ፤ ብዓበይቲ ፍርዲ ድማ ንሰራዊተይ፥ ንህዝበይ ንደቂ እስራኤል፥ ካብ ምድሪ ግብፂ ከውፅኦም እየ። ⁵ኣብ ልዕሊ ግብፂ ኢደይ ምስ ዘርጋሕኩ፥ ንደቂ እስራኤል ድማ ካብ ማእኸሎም ምስ ኣውፀእኩ፥ ግብፃውያን ኣነ ኣቦ ምዃነይ ክፈልጡ እዮም።”

⁶ሙሴን ኣሮንን ከዓ ኸምኡ ገበሩ፤ ከምቲ ኣቦና ዝኣዘዞም ጌሮም ገበሩ። ⁷ሙሴ ንፈርዖን ክዛረብዎ እንተለዉ፥ ወዲ ሰማንያ ዓመት ነበረ፤ ኣሮን ድማ ወዲ ሰማንያን ሰለስተን ዓመት ነበረ።

⁸ኣቦና ድማ ንሙሴን ንኣሮንን ከምዙይ በሎም፦

⁹ፈርዖን “ተኣምራት ጌርኩም ኣርእዩ” ኢሉ ምስ ተዛረበኩም፥ ንኣሮን “በትርኻ ሒዝካ ኣብ ቅድሚ ፈርዖን ደርብያ፤ ንሳ ኸዓ ተመን ክትከውን እያ” በሎ።

¹⁰ሙሴን ኣሮንን ድማ ናብ ፈርዖን ኣትዮም፥ ከምቲ ኣቦና ዝኣዘዞም ፈፀሙ። ኣሮን ድማ ነታ በትሩ ኣብ ቅድሚ ፈርዖንን ኣገልገልቱን ደርበያ፤ ንሳ ኸዓ ተመን ኮነት። ¹¹ፈርዖን ድማ ንጠቢባንን ንጠንቈልትን ፀውዖም፤ እቶም ኣስማተኛታት ግብፂ ኸዓ ብስራዮም ከምኡ ገበሩ። ¹²ነፍሲ ወከፎም በትሩ ናብ ምድሪ ደርበየ፤ ኣትማን ድማ ኮኑ። በትሪ ኣሮን ግና ንኣብትሮም ወሓጠቶም። ¹³ልቢ ፈርዖን ድማ ተረረ፤ ከምቲ ኣቦና ዝበሎ ኸዓ ኣይሰምዖምን።

ሩባ ናብ ደም ተለወጠ

¹⁴ኣቦና ድማ ንሙሴ ከምዙይ በሎ፦ “ልቢ ፈርዖን ተሪር እዩ፤ ነቲ ህዝቢ ኽሰዶ ኣቢሉ ኣሎ። ¹⁵ንግሆ ፈርዖን ናብ ማይ ክወፅእ እንተሎ፥ ናብኡ ኪድ፤ ክትረኽቦ ኸዓ ኣብ ወሰን ሩባ ደው በል፤ ነታ ናብ ተመን ዝተለወጠት በትሪ ድማ ኣብ ኢድካ ሒዝካ ውሰድ። ¹⁶ከምዙይ ድማ በሎ፦ ኣቦ ዕብራውያን “ህዝበይ ኣብ በረኻ ምእንቲ ኼገልግሉኒ ሰዶም” ኢሉ ናባኻ ለኣኸኒ። ንስኻ ግና ክሳዕ ሕዚ ኣይሰማዕኻን። ¹⁷ኣቦና ኸምዙይ ይብል ኣሎ፦ “በዙይ ኣነ ኣቦ ምዃነይ ክትፈልጥ ኢኻ፤ እንሆ፥ በታ ኣብ ኢደይ ዘላ በትሪ ንማይ ሩባ ኽወቕዕ እየ፤ ንሱ ኸዓ ናብ ደም ክልወጥ እዩ። ¹⁸ዓሳ ሩባ ክመውት እዩ፤ ሩባ ኸዓ ክጨኑ እዩ፤ ግብፃውያን ድማ ካብ ሩባ ማይ ክሰትዩ ኣይኽእሉን እዮም።”’” ¹⁹ኣቦና ድማ ንሙሴ ከምዙይ በሎ፦ “ንኣሮን ከምዙይ በሎ፦ በትርኻ ሒዝካ ኣብ ልዕሊ ማያት ግብፂ፥ ኣብ ልዕሊ ወሓይዝቶምን መስኖታቶምን ቀላያቶምን ኵሉ መዕቘሪ ማዮምን ኢድካ ዘርግሕ፤ ናብ ደም ድማ ክልወጡ እዮም። ኣብ ኵላ ምድሪ ግብፂ፥ ኣብ ኣቑሑ ዕንፀይትን ኣእማንን እኳ ደም ክመልእ እዩ።”

²⁰ሙሴን ኣሮንን ድማ ከምቲ ኣቦና ዝኣዘዞም ገበሩ፤ ኣብ ቅድሚ ፈርዖንን ኣብ ቅድሚ ኣገልገልቱን ኣሮን ነታ በትሪ ኣልዒሉ ንማይ ሩባ ወቕዖ፤ ኵሉ ማዩ ኸዓ ናብ ደም ተለወጠ። ²¹እቲ ኣብ ሩባ ዝነበረ ዓሳ ሞተ፤ ሩባ ኸዓ ጨነወ፤ ግብፃውያን ድማ ካብ ሩባ ማይ ክሰትዩ ኣይከኣሉን። ኣብ ኵላ ምድሪ ግብፂ ኸዓ ደም ኮነ። ²²እቶም ኣስማተኛታት ግብፂ ግና ብስራዮም ከምኡ ገበሩ፤ ስለዙይ ልቢ ፈርዖን ተረረ፤ ከምቲ ኣቦና ዝበሎ ኸዓ ኣይሰምዖምን። ²³ፈርዖን ድማ ግልፅ ኢሉ ናብ ቤቱ ኣተወ፤ ነዝ ነገር እዙይ እኳ ኣብ ልቡ ኣየንበሮን። ²⁴ኵሎም ግብፃውያን ድማ ካብ ማይ ሩባ ክሰትዩ ስለ ዘይከኣሉ፥ ዝሰትይዎ ማይ ክረኽቡ ኣብ ጥቓ ሩባ ኵዓቱ። ²⁵ኣቦና ንሩባ ካብ ዝወቕዖ ኸዓ ሸውዓተ ምሉእ መዓልቲ ሓለፈ።