هِجرت 7 FHB Father's Heart Bible™

7 ¹زمونږ پلار موسىٰ ته وفرمائيل چې، ”ګوره، ما تۀ د فرعون دپاره د خُدائ پاک په شان جوړ کړې، او ستا ورور هارون به ستا نبى وى. ²تۀ به هغه ټول څۀ ووايې چې زۀ يې تا ته حُکم کوم؛ او ستا ورور هارون به فرعون ته ووايى چې هغه دې د اِسرائيل اولاد د خپل مُلک نه بهر ولېږى. ³خو زۀ به د فرعون زړۀ سخت کړم او په مِصر مُلک کښې به خپلې نښانې او معجزې ډېرې کړم. ⁴فرعون به ستاسو خبره وا نۀ ورى، نو زۀ به په مِصر باندې خپل لاس اوچت کړم او د لويو سزاګانو په وسيله به خپل لښکرې — خپل قوم، د اِسرائيل اولاد — د مِصر د مُلک نه بهر راوباسم. ⁵کله چې زۀ خپل لاس په مِصر باندې اوږد کړم او د اِسرائيل خلق د هغوئ د مينځ نه راوباسم، نو مِصريان به پوه شى چې زۀ پلار يم.“

⁶موسىٰ او هارون همداسې وکړل؛ لکه څنګه چې زمونږ پلار هغوئ ته حُکم کړے وو، هم هغه شان يې وکړل. ⁷کله چې هغوئ له فرعون سره خبرې کولې، نو د موسىٰ عمر اتيا کاله او د هارون درے اتيا کاله وو.

⁸بيا زمونږ پلار موسىٰ او هارون ته وفرمائيل چې،

⁹کله چې فرعون تاسو ته ووايى چې، ”يوه معجزه وښاياست،“ نو هارون ته ووايه چې، ”خپله امسا واخله او د فرعون په مخکښې يې وغورزوه، نو هغه به مار شى.“

¹⁰موسىٰ او هارون فرعون ته ورغلل او لکه څنګه چې زمونږ پلار حُکم کړے وو، هم هغه شان يې وکړل. هارون خپله امسا د فرعون او د هغۀ د نوکرانو په مخکښې وغورزوله، نو هغه مار شو. ¹¹نو فرعون هم پوهان او ساحران راوغوښتل، او د مِصر جادوګرو هم په خپلو پټو جادوګريو سره هم هغه شان وکړل. ¹²هر يو خپله امسا وغورزوله، نو هغه ماران شول. خو د هارون امسا د هغوئ امساوې ونغښتلې. ¹³خو د فرعون زړۀ سخت شو؛ لکه څنګه چې زمونږ پلار فرمائيلى وُو، هغۀ د هغوئ خبره وا نۀ ورېده.

د نيل سيند اوبۀ وينه کيږى

¹⁴بيا زمونږ پلار موسىٰ ته وفرمائيل چې، ”د فرعون زړۀ سخت شوے دے؛ هغه قوم پرېښودو ته تيار نۀ دے. ¹⁵سحر وختى فرعون ته لاړ شه، کله چې هغه د اوبو طرف ته راوځى. د نيل سيند په غاړه د هغۀ د ملاقات دپاره ودرېږه، او هغه امسا په خپل لاس کښې واخله چې مار شوې وه. ¹⁶او هغۀ ته ووايه چې، د عبرانيانو پلار زۀ تا ته رالېږلے يم، او فرمائيلى يې دى چې، ”زما قوم پرېږده چې په بيابان کښې زما عبادت وکړى.“ خو تر اوسه پورې دې خبره وا نۀ ورېده. ¹⁷زمونږ پلار داسې فرمائى چې، ”په دې سره به تۀ پوه شې چې زۀ پلار يم: ګوره، زۀ به د امسا سره چې زما په لاس کښې ده د نيل سيند اوبۀ ووهم، نو هغه به وينه شى. ¹⁸د نيل سيند کبان به مړۀ شى، د نيل سيند به بوئ شى، او مِصريان به د نيل سيند د اوبو څښلو نه عاجز شى.“’“ ¹⁹زمونږ پلار موسىٰ ته وفرمائيل چې، ”هارون ته ووايه چې خپله امسا واخله او خپل لاس د مِصر په اوبو باندې اوږد کړه — د هغوئ په سيندونو، نهرونو، تالابونو او د هغوئ په ټولو حوضونو باندې — نو هغه به وينه شى. په ټول مِصر کښې به وينه وى، حتىٰ د لرګى او د کاڼى په لوښو کښې هم.“

²⁰موسىٰ او هارون لکه څنګه چې زمونږ پلار حُکم کړے وو، هم هغه شان وکړل: د فرعون او د هغۀ د نوکرانو په مخکښې هارون امسا اوچته کړه او د نيل سيند اوبۀ يې ووهلې، نو د هغۀ ټولې اوبۀ وينه شوې. ²¹د نيل سيند کبان مړۀ شول، د نيل سيند بوئ شو، او مِصريان د نيل سيند اوبۀ نۀ شول څښلے. په ټول مِصر مُلک کښې وينه وه. ²²خو د مِصر جادوګرو هم په خپلو پټو جادوګريو سره هم هغه شان وکړل. نو د فرعون زړۀ سخت پاتې شو؛ لکه څنګه چې زمونږ پلار فرمائيلى وُو، هغۀ د هغوئ خبره وا نۀ ورېده. ²³فرعون مخ واړولو او خپل کور ته لاړو، او دا خبره يې هم په زړۀ کښې ونۀ نيوله. ²⁴ټولو مِصريانو د څښلو د اوبو دپاره د نيل سيند په غاړو کنده وکړله، ځکه چې هغوئ د نيل سيند اوبۀ نۀ شوې څښلے. ²⁵کله چې زمونږ پلار د نيل سيند ووهلو، نو د هغې نه پس اووۀ ورځې پوره شوې.