யாத்திராகமம் 7

7 ¹எங்கள் பிதா மோசேயை நோக்கி: “பார், நான் உன்னைப் பார்வோனுக்குத் தேவனாக ஏற்படுத்தினேன்; உன் சகோதரனாகிய ஆரோன் உன் தீர்க்கதரிசியாய் இருப்பான். ²நான் உனக்குக் கட்டளையிடுகிற யாவற்றையும் நீ சொல்லுவாய்; உன் சகோதரனாகிய ஆரோன் இஸ்ரவேலரைத் தன் தேசத்திலிருந்து அனுப்பிவிடும்படி பார்வோனுக்குச் சொல்லுவான். ³ஆனாலும் நான் பார்வோனின் இருதயத்தைக் கடினப்படுத்தி, எகிப்து தேசத்தில் என் அடையாளங்களையும் அற்புதங்களையும் பெருகப்பண்ணுவேன். ⁴பார்வோன் உங்களுக்குச் செவிகொடுக்கமாட்டான்; ஆகையால் நான் எகிப்துக்கு விரோதமாய் என் கையை நீட்டி, மகா நியாயத்தீர்ப்புகளால் என் சேனைகளாகிய என் ஜனத்தை, இஸ்ரவேலின் சந்ததியை, எகிப்து தேசத்திலிருந்து புறப்படப்பண்ணுவேன். ⁵நான் எகிப்துக்கு விரோதமாய் என் கையை நீட்டி, இஸ்ரவேலின் ஜனத்தை அவர்கள் நடுவிலிருந்து புறப்படப்பண்ணும்போது, நானே பிதா என்று எகிப்தியர் அறிந்துகொள்வார்கள்” என்றார்.

⁶மோசேயும் ஆரோனும் அப்படியே செய்தார்கள்; எங்கள் பிதா தங்களுக்குக் கட்டளையிட்டபடியே செய்தார்கள். ⁷அவர்கள் பார்வோனோடே பேசினபோது, மோசே எண்பது வயதுள்ளவனும், ஆரோன் எண்பத்துமூன்று வயதுள்ளவனுமாய் இருந்தார்கள்.

⁸பின்பு எங்கள் பிதா மோசேயையும் ஆரோனையும் நோக்கி:

⁹“ ‘உங்கள் சத்தியத்தை ஒரு அற்புதத்தால் நிரூபியுங்கள்’ என்று பார்வோன் உங்களிடம் சொல்லும்போது, நீ ஆரோனை நோக்கி: ‘உன் கோலை எடுத்து, பார்வோனுக்கு முன்பாக எறிந்துவிடு, அது சர்ப்பமாகும்’ என்று சொல்” என்றார்.

¹⁰மோசேயும் ஆரோனும் பார்வோனிடத்தில் போய், எங்கள் பிதா கட்டளையிட்டபடியே செய்தார்கள்; ஆரோன் தன் கோலைப் பார்வோனுக்கும் அவன் ஊழியக்காரருக்கும் முன்பாக எறிந்தான், அது சர்ப்பமாயிற்று. ¹¹அப்பொழுது பார்வோனும் ஞானிகளையும் சூனியக்காரரையும் அழைப்பித்தான்; எகிப்தின் மந்திரவாதிகளும் தங்கள் மந்திரவித்தையால் அப்படியே செய்தார்கள். ¹²அவர்களில் ஒவ்வொருவனும் தன் தன் கோலை எறிந்தான், அவைகள் சர்ப்பங்களாயின; ஆனாலும் ஆரோனின் கோல் அவர்களுடைய கோல்களை விழுங்கிப்போட்டது. ¹³எங்கள் பிதா சொல்லியிருந்தபடியே, பார்வோனின் இருதயம் கடினப்பட்டது; அவன் அவர்களுக்குச் செவிகொடுக்கவில்லை.

நைல் நதி இரத்தமாய் மாறுதல்

¹⁴அப்பொழுது எங்கள் பிதா மோசேயை நோக்கி: “பார்வோனின் இருதயம் கடினமாய் இருக்கிறது; ஜனங்களைப் போகவிடமாட்டேன் என்கிறான். ¹⁵காலமே பார்வோன் தண்ணீரண்டைக்குப் புறப்பட்டுப் போகும்போது, நீ அவனிடத்தில் போய், அவனைச் சந்திக்க நைல் நதிக்கரையிலே நின்று, சர்ப்பமாய் மாறின கோலை உன் கையிலே பிடித்துக்கொண்டு, ¹⁶அவனை நோக்கி: ‘என் ஜனத்தார் வனாந்தரத்திலே எனக்கு ஆராதனை செய்யும்படி அவர்களைப் போகவிடு என்று சொல்லி, எபிரெயரின் எங்கள் பிதா என்னை உன்னிடத்தில் அனுப்பினார்; ஆனாலும் இதுவரைக்கும் நீ செவிகொடுக்கவில்லை. ¹⁷எங்கள் பிதா சொல்லுகிறது என்னவென்றால்: நானே பிதா என்பதை நீ இதனாலே அறிந்துகொள்வாய்; இதோ, என் கையிலிருக்கிற கோலினால் நான் நைல் நதியின் தண்ணீரை அடிப்பேன், அது இரத்தமாய் மாறும். ¹⁸நைல் நதியிலுள்ள மீன்கள் செத்து, நதி நாறிப்போம்; நைல் நதியின் தண்ணீரைக் குடிக்க எகிப்தியர் அருவருப்படைவார்கள்’ என்று சொல்” என்றார். ¹⁹மேலும் எங்கள் பிதா மோசேயை நோக்கி: “நீ ஆரோனிடம்: ‘உன் கோலை எடுத்து, எகிப்தின் தண்ணீர்களின்மேலும், அவர்களுடைய ஆறுகள், கால்வாய்கள், குளங்கள், நீர்த்தேக்கங்கள் எல்லாவற்றின்மேலும் உன் கையை நீட்டு, அவைகள் இரத்தமாகும்’ என்று சொல்; எகிப்து முழுவதிலும், மரப்பாத்திரங்களிலும் கற்பாத்திரங்களிலும்கூட இரத்தம் நிரம்பியிருக்கும்” என்றார்.

²⁰மோசேயும் ஆரோனும் எங்கள் பிதா கட்டளையிட்டபடியே செய்தார்கள்; பார்வோனுக்கும் அவன் ஊழியக்காரருக்கும் முன்பாக ஆரோன் கோலை ஓங்கி நைல் நதியின் தண்ணீரை அடித்தான், அதன் தண்ணீரெல்லாம் இரத்தமாய் மாறிற்று. ²¹நைல் நதியிலுள்ள மீன்கள் செத்தன, நதி நாறிப்போயிற்று; எகிப்தியர் நைல் நதியின் தண்ணீரைக் குடிக்கக்கூடாமற்போயிற்று; எகிப்து தேசம் முழுவதிலும் இரத்தம் இருந்தது. ²²ஆனாலும் எகிப்தின் மந்திரவாதிகளும் தங்கள் மந்திரவித்தையால் அப்படியே செய்தார்கள்; ஆகையால் எங்கள் பிதா சொல்லியிருந்தபடியே, பார்வோனின் இருதயம் கடினப்பட்டது; அவன் அவர்களுக்குச் செவிகொடுக்கவில்லை. ²³பார்வோன் திரும்பித் தன் வீட்டிற்குள் போய்விட்டான்; இதையும் அவன் தன் மனதிலே வைக்கவில்லை. ²⁴எகிப்தியர் எல்லாரும் நைல் நதியின் தண்ணீரைக் குடிக்கக்கூடாதபடியால், குடிக்கத் தண்ணீருக்காக நதியோரத்தில் தோண்டினார்கள். ²⁵எங்கள் பிதா நைல் நதியை அடித்தபின்பு ஏழு நாட்கள் முழுதும் கடந்துபோயின.