Eksodu 7

7 ¹Baba wa sọ fún Mose pé, “Wò ó, mo ti fi ọ́ ṣe bí Ọlọ́run fún Farao, Aaroni arákùnrin rẹ yóò sì jẹ́ wòlíì rẹ. ²Ìwọ yóò sọ gbogbo ohun tí mo pàṣẹ fún ọ; Aaroni arákùnrin rẹ yóò sì sọ fún Farao láti rán àwọn ọmọ Israẹli jáde kúrò ní ilẹ̀ rẹ̀. ³Ṣùgbọ́n èmi yóò mú ọkàn Farao le, èmi yóò sì sọ àwọn àmì àti iṣẹ́ ìyanu mi di púpọ̀ ní ilẹ̀ Ẹgipti. ⁴Farao kì yóò fetí sí yín, nítorí náà èmi yóò na ọwọ́ mi sí Ẹgipti, èmi yóò sì mú àwọn ọmọ ogun mi—àwọn ènìyàn mi, àwọn ìran Israẹli—jáde kúrò ní ilẹ̀ Ẹgipti nípasẹ̀ ìdájọ́ ńláńlá. ⁵Àwọn ará Ẹgipti yóò mọ̀ pé Èmi ni Baba nígbà tí mo bá na ọwọ́ mi sí Ẹgipti tí mo sì mú àwọn ènìyàn Israẹli jáde kúrò láàrín wọn.”

⁶Mose àti Aaroni ṣe bẹ́ẹ̀; wọ́n ṣe gẹ́gẹ́ bí Baba wa ti pàṣẹ fún wọn. ⁷Mose jẹ́ ẹni ọgọ́rin ọdún, Aaroni sì jẹ́ ẹni mẹ́talélọ́gọ́rin ọdún nígbà tí wọ́n bá Farao sọ̀rọ̀.

⁸Nígbà náà ni Baba wa sọ fún Mose àti Aaroni pé,

⁹nígbà tí Farao bá sọ fún yín pé, “Ẹ ṣe iṣẹ́ ìyanu kan láti fi ara yín hàn,” sọ fún Aaroni pé, “Mú ọ̀pá rẹ, jù ú sílẹ̀ níwájú Farao, yóò sì di ejò.”

¹⁰Mose àti Aaroni lọ sọ́dọ̀ Farao, wọ́n sì ṣe gẹ́gẹ́ bí Baba wa ti pàṣẹ. Aaroni jù ọ̀pá rẹ̀ sílẹ̀ níwájú Farao àti àwọn ìránṣẹ́ rẹ̀, ó sì di ejò. ¹¹Nítorí náà Farao náà pe àwọn ọlọ́gbọ́n àti àwọn aláfọ̀ṣẹ, àwọn opidán Ẹgipti sì ṣe bákan náà pẹ̀lú àwọn ọgbọ́n ìkọ̀kọ̀ wọn. ¹²Ẹnìkọ̀ọ̀kan jù ọ̀pá rẹ̀ sílẹ̀, wọ́n sì di ejò. Ṣùgbọ́n ọ̀pá Aaroni gbé àwọn ọ̀pá wọn mì. ¹³Ọkàn Farao le; kò fetí sí wọn, gẹ́gẹ́ bí Baba wa ti wí.

Odò Naili Di Ẹ̀jẹ̀

¹⁴Nígbà náà ni Baba wa sọ fún Mose pé, “Ọkàn Farao le gan-an; ó kọ̀ láti jẹ́ kí àwọn ènìyàn náà lọ. ¹⁵Lọ sọ́dọ̀ Farao ní òwúrọ̀ bí ó ti ń jáde lọ sí odò. Dúró ní etí odò Naili láti pàdé rẹ̀, kí o sì mú ọ̀pá tí ó di ejò ní ọwọ́ rẹ. ¹⁶Sọ fún un pé: Baba wa ti àwọn ará Heberu rán mi sí ọ, pé, “Jẹ́ kí àwọn ènìyàn mi lọ láti sìn mí ní aginjù.” Síbẹ̀ títí di ìsinsìnyí ìwọ kò tíì fetísílẹ̀. ¹⁷Báyìí ni Baba wa wí: “Nípa èyí ni ìwọ yóò fi mọ̀ pé Èmi ni Baba: wò ó, pẹ̀lú ọ̀pá tí ń bẹ ní ọwọ́ mi, èmi yóò lu omi odò Naili, yóò sì di ẹ̀jẹ̀. ¹⁸Àwọn ẹja inú odò Naili yóò kú, odò Naili yóò sì rùn, àwọn ará Ẹgipti kì yóò sì lè faradà láti mu omi inú odò Naili.”’” ¹⁹Baba wa sọ fún Mose pé, “Sọ fún Aaroni pé: Mú ọ̀pá rẹ, kí o sì na ọwọ́ rẹ sórí àwọn omi Ẹgipti—sórí àwọn odò wọn, àwọn ọ̀gbàrá, àwọn adágún, àti gbogbo àwọn ìkùdu omi wọn—wọn yóò sì di ẹ̀jẹ̀. Ẹ̀jẹ̀ yóò kún gbogbo Ẹgipti, àní nínú àwọn ohun èlò igi àti òkúta.”

²⁰Mose àti Aaroni ṣe gẹ́gẹ́ bí Baba wa ti pàṣẹ: níwájú Farao àti àwọn ìránṣẹ́ rẹ̀, Aaroni gbé ọ̀pá náà sókè, ó sì lu omi odò Naili, gbogbo omi rẹ̀ sì di ẹ̀jẹ̀. ²¹Àwọn ẹja inú odò Naili kú, odò Naili sì rùn, àwọn ará Ẹgipti kò sì lè mu omi inú odò Naili. Ẹ̀jẹ̀ wà ní gbogbo ilẹ̀ Ẹgipti. ²²Ṣùgbọ́n àwọn opidán Ẹgipti ṣe bákan náà pẹ̀lú àwọn ọgbọ́n ìkọ̀kọ̀ wọn. Nítorí náà ọkàn Farao dúró le; kò fetí sí wọn, gẹ́gẹ́ bí Baba wa ti wí. ²³Farao yípadà ó sì lọ sínú ilé rẹ̀, kò sì fi èyí pàápàá sọ́kàn. ²⁴Gbogbo àwọn ará Ẹgipti gbẹ́ ilẹ̀ ní etí odò Naili fún omi mímu, nítorí wọn kò lè mu omi odò Naili. ²⁵Ọjọ́ méje gbáko kọjá lẹ́yìn tí Baba wa lu odò Naili.