አስቴር 9

9 ¹በዐሥራ ሁለተኛው ወር ፣ በአዳር ፣ በዐሥራ ሦስተኛው ቀን ፣ የንጉሡ ትእዛዝና ዐዋጅ በሚፈጸምበት ፣ የአይሁድ ጠላቶች ይገዟቸው ዘንድ ተስፋ ባደረጉበት ቀን ፣ ነገሩ ተገለበጠ ፤ አይሁድ የሚጠሏቸውን ገዟቸው። ²አይሁድ ክፉ የሚሹባቸውን ሊያጠቁ በንጉሥ ጠረክሲስ አውራጃዎች ሁሉ ባሉ በከተሞቻቸው ተሰበሰቡ። የሕዝቦች ሁሉ ፍርሃት ወድቆባቸው ስለ ነበር ፣ ማንም ሊቋቋማቸው አልቻለም። ³የአውራጃዎች ሹማምንት ሁሉ ፣ መሳፍንቱ ፣ አገረ ገዦቹና የንጉሡ አስተዳዳሪዎች ሁሉ አይሁድን ደገፉ ፤ የመርዶክዮስ ፍርሃት ወድቆባቸው ነበርና። ⁴መርዶክዮስ በንጉሡ ቤት ኀያል ሆነ ፤ ዝናውም በአውራጃዎች ሁሉ ተሰማ ፤ መርዶክዮስ ራሱ ከጊዜ ወደ ጊዜ እየበረታ ሄደ። ⁵አይሁድ ጠላቶቻቸውን ሁሉ በሰይፍ መቱ ፤ ገድለውም አጠፉ ፤ የሚጠሏቸውንም እንደ ወደዱ አደረጉባቸው። ⁶በሱሳ ግንብ ውስጥ አይሁድ አምስት መቶ ሰዎችን ገድለው አጠፉ። ⁷ደግሞም ፕርሻንዳታን ፣ ደልፎንን ፣ አስፓታን ፣ ⁸ፖራታን ፣ አዳልያን ፣ አሪዳታን ፣ ⁹ፓርማሽታን ፣ አሪሳይን ፣ አሪዳይን ፣ ዌዛታን ገደሉ። ¹⁰የአይሁድ ጠላት የሆነውን የሃመዳታን ልጅ የሃማን ዐሥር ልጆች ገደሉ ፤ ብዝበዛ ግን አልዘረፉም።

¹¹በዚያ ቀን በሱሳ ግንብ ውስጥ የተገደሉት ቍጥር ለንጉሡ ተነገረ። ¹²ንጉሡም ንግሥቲቱን አስቴርን ፣ “አይሁድ በሱሳ ግንብ ውስጥ አምስት መቶ ሰዎችንና የሃማን ዐሥር ልጆች ገድለው አጥፍተዋል። ታዲያ በቀሩት የንጉሡ አውራጃዎች ምን አድርገው ይሆን? ልመናሽ ምንድን ነው? ይሰጥሻል። ተጨማሪ ጥያቄሽ ምንድን ነው? ይፈጸማል” አላት።

¹³አስቴርም ፣ “ንጉሡን ደስ የሚያሰኘው ከሆነ ፣ በሱሳ ያሉ አይሁድ ነገም በዛሬው ዐዋጅ መሠረት እንዲያደርጉ ይፈቀድ ፤ የሃማም ዐሥር ልጆች በእንጨት ላይ ይሰቀሉ” አለች።

¹⁴ንጉሡም ይኽ እንዲደረግ አዘዘ ፤ በሱሳ ዐዋጅ ወጣ ፤ የሃማን ዐሥር ልጆችም ሰቀሉ። ¹⁵በሱሳ ያሉ አይሁድ ደግሞ በአዳር ዐሥራ አራተኛው ቀን ተሰበሰቡ ፤ በዚያም ሦስት መቶ ሰዎችን ገደሉ ፤ ብዝበዛውን ግን አልነኩም።

¹⁶በንጉሡ አውራጃዎች የቀሩት አይሁድ ሕይወታቸውን ለመከላከል ተሰበሰቡ ፤ ከጠላቶቻቸውም ዕረፍት አገኙ ፤ የሚጠሏቸውንም ሰባ አምስት ሺህ ሰዎች ገደሉ ፤ ብዝበዛ ግን አልነኩም። ¹⁷ይኽም የሆነው በአዳር ዐሥራ ሦስተኛው ቀን ነበር ፤ በዐሥራ አራተኛውም ቀን ዐረፉ ፤ የግብዣና የደስታ ቀንም አደረጉት።

¹⁸በሱሳ ያሉ አይሁድ ግን በዐሥራ ሦስተኛውና በዐሥራ አራተኛው ቀን ተሰበሰቡ ፤ በዐሥራ አምስተኛውም ዐረፉ ፤ የግብዣና የደስታ ቀን አደረጉት። ¹⁹ስለዚህ በገጠር መንደሮች የሚኖሩ አይሁድ የአዳርን ዐሥራ አራተኛ ቀን በደስታ ፣ በግብዣና በበዓል ያከብሩታል ፤ እርስ በርሳቸውም የምግብ ስጦታ ይሰጣጣሉ።

የፉሪም በዓል ተመሠረተ

²⁰መርዶክዮስም እነዚህን ነገሮች ጻፈ ፤ በቅርብና በሩቅ ለሚኖሩ በንጉሥ ጠረክሲስ አውራጃዎች ላሉ አይሁድ ሁሉ ደብዳቤ ላከ ፤ ²¹በየዓመቱ የአዳርን ወር ዐሥራ አራተኛና ዐሥራ አምስተኛ ቀን እንዲያከብሩ ያዝዛቸው ዘንድ ፤ ²²እነዚህ አይሁድ ከጠላቶቻቸው ያረፉባቸው ፣ ወሩም ከሐዘን ወደ ደስታ ፣ ከልቅሶ ወደ በዓል የተለወጠላቸው ቀናት ናቸውና። የግብዣና የደስታ ቀናት አድርገው እንዲጠብቁ ፣ እርስ በርሳቸውም የምግብ ስጦታ ፣ ለድኾችም ስጦታ እንዲሰጡ ነገራቸው። ²³አይሁድም መርዶክዮስ እንደ ጻፈላቸው ፣ ማድረግ የጀመሩትን ነገር ልማድ አድርገው ተቀበሉት። ²⁴የአይሁድ ሁሉ ጠላት የሆነው አጋጋዊው የሃመዳታ ልጅ ሃማ ፣ አይሁድን ለማጥፋት አሢሮ ነበር ፤ ይደመስሳቸውና ያጠፋቸው ዘንድ ፉርን ማለትም ዕጣ ጥሎ ነበር። ²⁵ነገር ግን ይኽ ነገር በንጉሡ ፊት በቀረበ ጊዜ ፣ ሃማ በአይሁድ ላይ ያሤረው ክፉ ሤራ በራሱ ላይ እንዲመለስ ፣ እርሱና ልጆቹም በእንጨት ላይ እንዲሰቀሉ ንጉሡ በደብዳቤ አዘዘ።

²⁶ስለዚህ እነዚህ ቀናት ከፉር ከሚለው ቃል የተነሣ ፉሪም ተባሉ ፤ ይኽም የሆነው በዚህ ደብዳቤ ቃላት ሁሉ ምክንያት ፣ ደግሞም ባዩትና በደረሰባቸው ነገር ምክንያት ነበር። ²⁷አይሁድም እነዚህን ሁለት ቀናት እንደ ተጻፈው ፣ በተወሰነው ጊዜ ፣ ሳያስተጓጕሉ በየዓመቱ እንዲጠብቁ ፣ ራሳቸውን ፣ ዘሮቻቸውንና የተቀላቀሏቸውን ሁሉ አስገደዱ። ²⁸እነዚህ ቀናት በየትውልዱ ፣ በየቤተ ሰቡ ፣ በየአውራጃውና በየከተማው ይታሰባሉ ፤ ይጠበቃሉም ፤ እነዚህ የፉሪም ቀናት በአይሁድ መካከል ከቶ አያልፉም ፤ መታሰቢያቸውም ከዘሮቻቸው መካከል አይጠፋም።

²⁹የአቢካኢል ልጅ ንግሥቲቱ አስቴርና አይሁዳዊው መርዶክዮስ ይኽን ሁለተኛ የፉሪም ደብዳቤ ለማጽናት በሙሉ ሥልጣን ጻፉ። ³⁰በጠረክሲስ መንግሥት በመቶ ሃያ ሰባት አውራጃዎች ላሉ አይሁድ ሁሉ ፣ የሰላምና የእውነት ቃላት የያዙ ደብዳቤዎች ተላኩ ፤ ³¹አይሁዳዊው መርዶክዮስና ንግሥቲቱ አስቴር እንዳዘዟቸው ፣ ለራሳቸውና ለዘሮቻቸውም የጾምና የልቅሶ ጊዜያት እንዳደረጉት ፣ እነዚህ የፉሪም ቀናት በተወሰነላቸው ጊዜ እንዲጸኑ ተደረገ። ³²የአስቴርም ትእዛዝ ስለ ፉሪም የወጡትን እነዚህን ሥርዐቶች አጸና ፤ በመጽሐፍም ተጻፈ።