አስቴር 8

8 ¹በዚያ ቀን ንጉሡ ጠረክሲስ የአይሁድ ጠላት የሆነውን የሐማን ርስት ለንግሥቲቱ ለአስቴር ሰጣት። አስቴር መርዶክዮስ ለእርሷ ምን እንደ ሆነ ነግራ ስለ ነበር፣ መርዶክዮስ ወደ ንጉሡ ፊት መጣ። ²ንጉሡም ከሐማ መልሶ የወሰደውን የማኅተም ቀለበቱን አውልቆ ለመርዶክዮስ ሰጠው። አስቴርም መርዶክዮስን በሐማ ርስት ላይ ሾመችው።

³አስቴርም እንደ ገና ለንጉሡ ተናገረች፤ በእግሩ ሥር ወድቃ አለቀሰች፤ የአጋጋዊው የሐማን ክፋትና በአይሁድ ላይ ያሴረውን ሴራ እንዲያስቆም ለመነችው። ⁴ንጉሡም የወርቁን በትረ መንግሥት ወደ አስቴር ዘረጋ፤ እርሷም ተነሥታ በፊቱ ቆመች። ⁵እንዲህም አለች፤ “ንጉሡን ደስ የሚያሰኘው ቢሆን፣ በፊቱም ሞገስ ባገኝ፣ ይህም ነገር ለእርሱ ትክክል መስሎ ቢታየው፣ እኔም በፊቱ ደስ የምሰኝ ብሆን፣ አጋጋዊው የሐመዳታ ልጅ ሐማ በንጉሡ አውራጃዎች ሁሉ የሚኖሩትን አይሁድ ለማጥፋት ያሰበውንና የጻፈውን የሚሽር ደብዳቤ ይጻፍ። ⁶በሕዝቤ ላይ መዓት ሲወርድ አይቼ እንዴት መታገሥ እችላለሁ? ቤተ ሰቤም ሲጠፋ እየተመለከትሁ እንዴት መቋቋም እችላለሁ?”

⁷ንጉሡ ጠረክሲስም ንግሥቲቱን አስቴርንና አይሁዳዊውን መርዶክዮስን እንዲህ አላቸው፤ “የሐማን ቤት ለአስቴር ሰጠኋት፤ እርሱም በአይሁድ ላይ ስላሴረ በስቅላት እንጨት ላይ ሰቀሉት። ⁸ስለ አይሁድ መልካም መስሎ በታያችሁ መሠረት በንጉሡ ስም ጻፉ፤ በማኅተም ቀለበቱም አትሙት፤ በንጉሡ ስም ተጽፎ በቀለበቱ የታተመ ጽሕፈት ሊሻር አይችልም።”

⁹በዚያን ጊዜም በሦስተኛው ወር፣ ይኸውም በሲዋን ወር፣ በሃያ ሦስተኛው ቀን የንጉሡ ጸሐፊዎች ተጠሩ፤ መርዶክዮስም ያዘዘውን ሁሉ ለአይሁድና ከህንድ እስከ ኩሽ ድረስ ባሉት መቶ ሃያ ሰባት አውራጃዎች ለነበሩት ለመሳፍንቱ፣ ለአገረ ገዦቹና ለባለሥልጣኖቹ ጻፉ፤ ለእያንዳንዱ አውራጃ በየጽሕፈቱ፣ ለእያንዳንዱም ሕዝብ በየቋንቋው፣ ለአይሁድም በጽሕፈታቸውና በቋንቋቸው ጻፉ። ¹⁰መርዶክዮስም በንጉሡ በጠረክሲስ ስም ጻፈ፤ በንጉሡም የማኅተም ቀለበት አተመ፤ ደብዳቤዎቹንም ለንጉሡ አገልግሎት በተዘጋጁ ፈጣን ፈረሶች በሚጋልቡ መልእክተኞች እጅ ሰደደ። ¹¹የንጉሡም ዐዋጅ በየከተማው ለሚኖሩ አይሁድ ተሰብስበው ሕይወታቸውን እንዲከላከሉ፣ የሚያጠቃቸውን የማንኛውም ሕዝብ ወይም አውራጃ የታጠቀ ኀይል — ልጆችንና ሴቶችን ጨምሮ — እንዲያጠፉ፣ እንዲገድሉና ፈጽመው እንዲያስወግዱ፣ የጠላቶቻቸውንም ንብረት እንዲዘርፉ መብት ሰጣቸው። ¹²ይህም በንጉሡ በጠረክሲስ አውራጃዎች ሁሉ በአንድ ቀን፣ ይኸውም በዐሥራ ሁለተኛው ወር በአዳር ወር በዐሥራ ሦስተኛው ቀን እንዲፈጸም ነበር። ¹³የዐዋጁም ቅጅ በየአውራጃው ሁሉ እንደ ሕግ እንዲወጣና ለሕዝቦች ሁሉ እንዲታወጅ ተደረገ፤ ይኸውም አይሁድ በዚያ ቀን በጠላቶቻቸው ላይ ለመበቀል ተዘጋጅተው እንዲጠብቁ ነበር። ¹⁴መልእክተኞቹም በንጉሡ ፈረሶች ተቻኩለው ወጡ፤ በንጉሡም ትእዛዝ ተገፋፍተውና ተፋጥነው ሄዱ፤ ዐዋጁም በሱሳ ግንብ ተሰጠ።

¹⁵መርዶክዮስም ሰማያዊና ነጭ የመንግሥት ልብስ ለብሶ፣ ትልቅ የወርቅ ዘውድ ደፍቶ፣ ከጥሩ በፍታና ከሐምራዊ ልብስ የተሠራ መጎናጸፊያ ተጐናጽፎ ከንጉሡ ፊት ወጣ። የሱሳም ከተማ እልል ብላ ደስ አላት። ¹⁶ለአይሁድም ብርሃን፣ ደስታ፣ ሐሤትና ክብር ሆነላቸው። ¹⁷የንጉሡም ትእዛዝና ዐዋጅ በደረሰበት በየአውራጃውና በየከተማው ሁሉ ለአይሁድ ደስታና ሐሤት፣ ግብዣም፣ የበዓል ቀንም ሆነ። የአይሁድም ፍርሃት ስለ ያዛቸው፣ በምድሪቱ ያሉ ብዙ ሕዝቦች አይሁድ ሆኑ።