Esther kala Mordecai Khayāshimi
Hamanwui ot saikora Estherli mi, kala awui khutop Mordecaili mi, kha kathiwui kakaso chi mashimānshapmana. Chiwui vang eina kakaso kakhane akha awungawui sakorbing eina zatshoka: Jehudibingna ngaphalungda athumwui kharing ngatangshapra. Mordecaina wungnaowui khamayinga kachon kala sinā ngavaida shokhaowa, kala Susa keinungna vaoda ringphāi.
8 1Chithang Awunga Ahasuerusna Awungva̱ Estherli Jehudili yangkashe Hamanwui shim mi. Kala Mordecaina awungawui mangāli rāhaowa, kaja Estherna Mordecai ana awuili khipā chi awungali hānga. 2Awungana Hamanwui eina khuikahai mahor namkhavai khutop apāngwui eina khuishoklaga Mordecaili mi. Kala Estherna Mordecaili Hamanwui shimwuitungli yangngasaka.
3Estherna latluida awungali hānga, awui pheili khuktizanglaga chapa, kala Agagwui Hamanwui makaphā, ana Jehudibingli themlāk sāda phaningkasā chi thahaimi khavai ali poi. 4Awungana sinā khānthing chi Estherli chihorai, kala ana ngakarthuida awui mangāli nganinga. 5Kala ana hānga, "Awungana ningyāng ungakha, kala ina awui mangāli ngahānkhangai samphangakha, kala chi awuili mashungrik khikha, kala ina awui mangāli ningyāng ungngasakakha, Agagwui Hammedathawui naomayara Hamanna awungawui ngalei saikorali khalei Jehudibingli shimān ngasak khavai phaningda kapikahai chithibing chi ngachei khavai, chithi kapingasakranu. 6Iwui mibingwuitungli kalākashi tāshung chi theida ina kathada phāra? Kala iwui achinābing shimān ngasakki chi theida ina kathada phāra?"
7Awunga Ahasuerusna Awungva̱ Esther kala Jehudi Mordecaili hānga, "Yanglu, ina Estherli Hamanwui shim mihaira, kala ana Jehudibingli themlāk sākahaiwui vang athumna ali tārongli phāshi sāhaowa. 8Nanina Jehudibingwui vang nanina phāra kaji athishurda awungawui ming eina kapilu, kala awungawui khutop eina mahor namsanglu; kaja awungawui ming eina kapilaga awungawui khutop eina mahor namsangkahai lairik chi mangacheipaimana."
9Chitharan kachāng kakathumali zimiksho maga̱da kathumthang, chiya Sivan kachāng, awungawui kapimebingli hokhui; kala Mordecaina kakaso kachiva̱ chi Jehudibingli, kala India eina thuilaga Cush vāshungda ngalei shākha maga̱da shiniwui satrapbing, rammungabing, kala wungnaobingli, ngalei kachiva̱li kachichāram mayek eina, mi kachiva̱li kachichāramtui eina, kala Jehudibingli athumwui mayek kala tui eina kapingasaka. 10Mordecaina Awunga Ahasueruswui ming eina chithi chi kapida, awungawui khutop eina namsangmita, kala awungawui otsakwui vang pharā ngasakkahai sigui hengsāda kachiva̱ eina phungmebingna chithibing chi phungvai. 11Awungawui kakaso chi keinung kachiva̱li khalei Jehudibingli kazipkhuida athumwui mirin ngāk khavai, kala athumli ngararki kaji mi kala ngalei kachiva̱wui raisāri pangshap, naoshinao kala sha̱naobing ngasoda, shimit khavai, sāthat khavai, kala yaitupthat khavai, kala athumwui yangkashebingwui ot ngapon khavai khamayā mi. 12Chi Awunga Ahasueruswui ngalei saikorali thang akhawui alungli, kachāng kakhanewui zimiksho tharāda kakathumathang, chiya Marun kachāngli sāki kajina. 13Kakaso chi ngalei kachiva̱li ain sāda mikhavai lairik chihovai, kala mi saikorali hāngchitheiya, chithāda chithang Jehudibingna athumwui yangkashebingtungli athut khui khavai khangarān sāra. 14Awungawui khamayā athishurda phungmebingna awungawui sigui eina hengsāda thaklāk eina vāhaowa; kala Susa keinungli kakaso chi mihaowa.
15Mordecaina wungnaowui khamayinga kala kachar kachon ngavaida, sinā kuihon hakva akha akuili teimida, kala khamanaka kala hungrisi phahon ngavaida, awungawui mangāwui eina shokhaowa. Kala Susa keinunga vaoda ringphāhaowa. 16Jehudibingna kahor, ringphā, khamathān, kala khayākakā samphanga. 17Awungawui hukhum kala kakaso rākashung ngalei kala keinung kachiva̱li, Jehudibingna khamathān kala ringphā, zātkhān kasā, kala khamathān zimiksho akha samphanga. Kala ram chiwui miyur kachungkhana Jehudi sāthuihaowa, kaja Jehudibingli khangachee athumwuitungli rāshungserhaowa.
