Esiteri na Moridekai Nĩmatĩĩĩo
Indo cia Hamani ikaheo Esiteri, na gĩcũhĩ gĩake kĩa mũhũri gĩkaheo Morodekai, no watho wa gĩkuũ ndũngĩcookio na thuutha. Kwoguo watho wa keerĩ ũgathiĩ na mbarathi cia mũthamaki: Ayahudi nĩmetĩkĩrĩtio macookanĩrĩre mamenyerere mĩoyo yao. Morodekai akoima ehumbĩte nguo cia ũthamaki cia rangi wa bururu na cia thahabu, nao andũ a Shushani makanĩrĩra.
8 1Mũthenya ũcio mũthamaki Ahasuero akĩhe Esiteri mũtumia wa mũthamaki indo cia Hamani, thũ ĩyo ya Ayahudi. Nake Moridekai agĩũka mbere ya mũthamaki, tondũ Esiteri nĩamwĩrĩte ũrĩa Moridekai aarĩ harĩ we. 2Nake mũthamaki akĩruta gĩcũhĩ gĩake kĩa mũhũũri, kĩrĩa aacookeirie kuuma kũrĩ Hamani, akĩkĩhe Moridekai. Nake Esiteri akĩiga Moridekai arũgamĩrĩre indo cia Hamani.
3Esiteri agĩcooka akĩarĩria mũthamaki rĩngĩ, akĩĩgũĩtha magũrũinĩ make, akĩrĩra, akĩmũthaitha aniine ũũru wa Hamani ũrĩa Mũagagi, na mũbango wake ũrĩa aathugundĩire Ayahudi. 4Nake mũthamaki agĩtambũrũkĩria Esiteri rũthanju rwa thahabu, nake agĩũkĩra akĩrũgama mbere yake. 5Akiuga atĩrĩ, “Mũthamaki angĩona arĩ wega, na angĩkorwo nĩnjĩĩtĩkĩrĩkĩte nĩwe, na ũndũ ũyũ ũngĩoneka ũrĩ wa kĩhooto harĩ we, na niĩ ngĩmũkenia-rĩ, nĩkwandĩkwo marũa ma gũgarũra ũrĩa Hamani mũrũ wa Hamedatha Mũagagi aathugundĩte na akĩandĩka nĩguo aniine Ayahudi kũu mabũrũriinĩ mothe ma mũthamaki. 6Nĩgũkorwo ndaakĩhota atĩa gũkirĩrĩria kuona mũtino ũgĩkinyĩrĩra andũ aakwa? Kana ngĩhota atĩa gũkirĩrĩria kuona nyũmba yakwa ĩkĩniinwo?”
7Nake mũthamaki Ahasuero akĩĩra Esiteri mũtumia wa mũthamaki na Moridekai ũrĩa Mũyahudi atĩrĩ, “Nĩheete Esiteri nyũmba ya Hamani, nao makĩmũcuuria mũtĩinĩ tondũ nĩathugundĩire Ayahudi ũũru. 8Rĩu-rĩ, andĩkĩrai Ayahudi o ũrĩa mũkuona kwagĩrĩire, na rĩĩtwa rĩa mũthamaki, na mũhũũre mũhũũri na gĩcũhĩ gĩake kĩa mũhũũri; nĩgũkorwo maandĩko marĩa mandĩkĩtwo na rĩĩtwa rĩa mũthamaki na makahũũrwo mũhũũri na gĩcũhĩ gĩake, gũtirĩ mũndũ ũngĩhota kũmagarũra.”
9Hĩndĩ ĩyo aandĩki a mũthamaki magĩĩtwo, mũthenya wa mĩrongo ĩĩrĩ na ĩtatũ wa mweri wa gatatũ, nĩguo mweri wa Sivani; nao makĩandĩka maũndũ mothe marĩa Moridekai aathanĩte, makĩandĩkĩra Ayahudi, na anene, na aathani a mabũrũri, na anene a mabũrũri macio igana rĩmwe na mĩrongo ĩĩrĩ na mũgwanja, kuuma India nginya Kushi; o bũrũri na mwandĩkĩre waguo, na o rũrĩrĩ na rũthiomi rwaruo, o na Ayahudi na mwandĩkĩre wao na rũthiomi rwao. 10Nake Moridekai akĩandĩka na rĩĩtwa rĩa mũthamaki Ahasuero, akĩhũũra mũhũũri na gĩcũhĩ gĩa mũthamaki kĩa mũhũũri, agĩtũma marũa na andũ a gũtwara ndũmĩrĩri mahaicĩte mbarathi cia ihenya iria ciarereirwo wĩra wa mũthamaki. 11Watho ũcio wa mũthamaki nĩweetĩkĩririe Ayahudi arĩa maarĩ itũũrainĩ o rĩothe atĩ mongane na megitĩre mĩoyo yao; nĩguo maniine, moorage, na mahukie mbũtũ o yothe ya ita ya rũrĩrĩ kana bũrũri o wothe ũngĩmatharĩkĩra, o hamwe na ciana na atumia ao, na nĩguo matahe indo cia thũ ciao. 12Maũndũ macio maarĩ meekwo mũthenya ũmwe mabũrũriinĩ mothe ma mũthamaki Ahasuero, nĩguo mũthenya wa ikũmi na ĩtatũ wa mweri wa ikũmi na ĩĩrĩ, nĩguo mweri wa Adari. 13Mũigana wa watho ũcio warĩ ũheanwo ũtuĩke watho bũrũriinĩ o wothe, na ũmenyithanio ndũrĩrĩ ciothe, nĩguo Ayahudi makorwo mehaarĩirie mũthenya ũcio merĩhĩrie harĩ thũ ciao. 14Nao andũ a gũtwara ndũmĩrĩri mahaicĩte mbarathi cia mũthamaki makiumagara na ihenya, mahĩĩkĩte na mahĩnĩkĩtio nĩ watho wa mũthamaki; naguo watho ũcio ũkĩheanwo kũu itũũra inene rĩa Shushani.
15Nake Moridekai akiuma harĩ mũthamaki ehumbĩte nguo cia ũthamaki cia bururu na njerũ, na thũmbĩ nene ya thahabu, na nguo ndaaya ya gatani ĩrĩa njega na ya rangi wa ndathi. Narĩo itũũra rĩa Shushani rĩkĩanĩrĩra na gĩkeno rĩgĩkena. 16Nao Ayahudi makĩgĩa na ũtheri, na gĩkeno, na mũkenyo, o na gĩtĩĩo. 17Watho wa mũthamaki na ũrĩa aathanĩte ũgĩkinya bũrũriinĩ o wothe na itũũrainĩ o rĩothe; nao Ayahudi makĩgĩa na gĩkeno na ngenyũ, na iruga, o na mũthenya wa gĩathĩ. Nao andũ aingĩ a bũrũri ũcio magĩtuĩka Ayahudi, nĩgũkorwo nĩmanyiitĩtwo nĩ guoya wa Ayahudi.