Esiteri Athaithanĩrĩra Andũ Ake
Iruga-inĩ rĩa keerĩ, Esiteri agĩkinyĩria kũhooya muoyo wake na wa andũ ake, na akagweta mũndũ ũrĩa wamendirie: Hamani. Mũthamaki akoima na marakara maingĩ; Hamani akagũa gĩtanda-inĩ kĩa Esiteri akĩmũthaitha, na ũguo ũkoonwo ta gũmũhinyĩrĩria. Agacuuragio mũtĩ-inĩ ũrĩa we mwene aakĩte.
7 1Nĩ ũndũ ũcio mũthamaki na Hamani magĩũka kũrĩĩanĩra na Esiteri mũtumia wa mũthamaki. 2Mũthenya wa keerĩ, rĩrĩa maanyuuaga ndibei, mũthamaki akĩũria Esiteri o rĩngĩ atĩrĩ, “Nĩ kĩĩ ũrahooya, Esiteri mũtumia wa mũthamaki? Nĩũkũheeo. Ũreenda atĩa? O nginya nuthu wa ũthamaki, nĩũkũheeo.”
3Nake Esiteri mũtumia wa mũthamaki agĩcookia atĩrĩ, “Angĩkorwo nĩnyonete ũtugi maithoinĩ maku, wee mũthamaki, na angĩkorwo nĩ ũndũ ũngĩkenia mũthamaki, he muoyo wakwa, rĩu nĩrĩo ihooya rĩakwa, na andũ akwa, rĩu nĩrĩo ũrĩa ndĩreenda. 4Nĩgũkorwo nĩtwendetio, niĩ na andũ akwa, nĩgeetha tũniinwo, tũũragwo na tũthirio biũ. Korwo nĩtwendetio o ta ngombo cia arũme na cia andũ-a-nja, no ndire ki; amu thĩĩna ta ũcio ndũngĩagĩrĩire gũthĩĩnia mũthamaki.”
5Nake mũthamaki Xerxese akĩĩra Esiteri mũtumia wa mũthamaki atĩrĩ, “Nĩ ũ, na arĩ kũ, ũcio ũngĩũmĩrĩria gwĩka ũguo?”
6Esiteri akiuga atĩrĩ, “Nĩ mũmena na thũ — nĩ Hamani ũyũ mwaganu!” Naake Hamani akĩnyiitwo nĩ guoya mũnene mbere ya mũthamaki na mũtumia wa mũthamaki.
7Nĩ ũndũ wa kũrakara, mũthamaki agĩũkĩra agĩtiga ndibei, agĩthiĩ mũgũndainĩ wa nyũmba ya ũthamaki; no Hamani agĩtigara nĩguo athaithe Esiteri mũtumia wa mũthamaki amũhonokie muoyo wake, nĩgũkorwo nĩoonire atĩ mũthamaki nĩatuĩte kũmũniina. 8Mũthamaki agĩcooka oimĩte mũgũndainĩ wa nyũmba ya ũthamaki agĩũka nyũmbainĩ ya iruga. Nake Hamani aagwĩte gĩtandainĩ kĩrĩa Esiteri aarĩ. Mũthamaki akiuga atĩrĩ, “Kaĩ egũkĩĩka mũtumia wa mũthamaki ũũru o na niĩ ndĩ gũkũ?” Rĩrĩa ciugo icio cioimire kanua gake, ndungata igĩthika Hamani ũthiũ. a a v8 Gũthika ũthiũ wa mũndũ ũtuĩrĩirwo ciira nĩrĩo rĩarĩ kĩmenyithia kĩa tene atĩ ituĩro rĩake nĩrĩahingĩte — aatuĩkĩte o ta mũndũ mũkuũ.
9Naake Haribona, ũmwe wa ahakũre a mũthamaki, akiuga atĩrĩ, “Mũtĩ wa gũcuurio ũrĩa ũrĩ na ũraihu wa buti mĩrongo mũgwanja na ĩtaano, ũrĩa Hamani aathondekeire Moridekai, ũrĩa waririe nĩ ũndũ wa mũthamaki, nĩ mũrũgamu o kũu mũciĩ wa Hamani.” Nake mũthamaki akiuga atĩrĩ, “Mũcuuriei ho.”
10Nĩ ũndũ ũcio magĩcuuria Hamani mũtĩinĩ ũcio wa gũcuurio ũrĩa aathondekeire Moridekai, naguo marakara ma mũthamaki makĩhoorera.