Ester Mangnohonkeun pikeun Bangsana

Dina pésta kadua Éster tungtungna ménta nyawana sorangan jeung nyawa bangsana, sarta nyebut ngaran jalma anu ngajual maranéhna: Haman. Raja kaluar bari ngamuk; Haman ngagubrag ngadudupa dina dipan Éster sarta dianggap rék nganiaya. Manéhna digantung dina tihangna sorangan.

Pasal 7.

Raja sareng Haman tuluy sarumping ka pendaringan Sang Prameswari Ester. Dina poe nu kadua, waktu nginum anggur, raja mariksa deui, “Naon pamundut Prameswari Ester? Tangtu dikabul. Naon pamenta anjeun? Najan satengah karajaan oge, moal burung dikabul.”

Waler Prameswari Ester, “Upami abdi kenging piwelas dina soca raja, sareng upami raja perkenan, mugi hirup abdi diwidian, nya eta pamundut abdi, sareng bangsa abdi, nya eta pamenta abdi. Abdi sareng bangsa abdi parantos dijual pikeun ditumpes, dipaehan, sareng dibasmi. Upami abdi sadaya ngan dijual jadi badega lalaki sareng awewe, abdi tangtu cicing bae; kasusah nu sakitu teu pantes pikeun ngaganggu raja.”

Raja Ahasweros tuluy nimbalan ka Prameswari Ester, “Saha jeung di mana jelemana, nu wani migawe kitu?”

Waler Ester, “Jelema jahat eta, nya eta Haman, satru sareng musuh abdi!” Haman kacida sieunna di payuneun raja sareng prameswari.

Raja bendu kacida, tuluy ngadeg ti pinginuman anggur, angkat ka taman karaton, ari Haman kari-kari nyuhunkeun hirupna ka Prameswari Ester, sabab terang yen raja geus mastikeun cilakana. Raja mulih ti taman karaton ka tempat perjamuan. Harita Haman keur rarampohpoy dina diwan tempat Ester calik. Saur raja, “Naha ieu jelema wani-wani ngaganggu prameswari di hareupeun kami?” Sanggeus eta kecap kaluar tina lambey raja, para gandek tuluy nutupan beungeut Haman. ^a

Harbona, salah saurang gandek raja, tuluy unjukan, “Tihang gantungan tujuh puluh lima suku nu dijieun ku Haman pikeun Mordekai, nu geus ngabela raja, ayeuna ngadeg di imah Haman.” Saur raja, “Gantung Haman dina eta.”

Haman tuluy digantung dina tihang gantungan nu geus disadiakeun pikeun Mordekai, sarta bendu raja jadi leler.