ኣስቴር 7 FHB Father's Heart Bible™

7 ¹ንጉስን ሃማንን ድማ ምስ ንግስቲ ኣስቴር ክሰትዩ መፁ። ²ንጉስ ድማ በታ ኻልአይቲ መዓልቲ፥ ወይኒ እናሰተዩ እንተለዉ፥ ደጊሙ ንንግስቲ ኣስቴር ከምዙይ በላ፦ “እንታይ ኢኺ ትልምኒ፥ ኦ ንግስቲ ኣስቴር? ክወሃበኪ እዩ። እንታይከ ኢኺ ትደልዪ? ክሳዕ ፍርቂ መንግስቲ እኳ እንተኾነ ክግበረልኪ እዩ።”

³ንግስቲ ኣስቴር ድማ ከምዙይ ኢላ መለሰት፦ “ኦ ንጉስ፥ ኣብ ቅድሜኻ ሞገስ ረኺበ እንተ ኾይነ፥ ንንጉስ ከዓ ደስ እንተ ኢሉዎ፥ ህይወተይ ከም ዝልምኖ ይወሃበኒ፤ ህዝበይ ከዓ ከም ጠለበይ ይወሃበኒ። ⁴ኣነን ህዝበይን ክንጠፍእ፥ ክንቅተል፥ ክንፀንት ተሸይጥና ኢና። ከም ተባዕትዮን ኣንስትዮን ባሮት ጥራሕ ተሸይጥና እንተ ንኸውን፥ ስቕ ምበልኩ ነይረ፤ ከምዙይ ዝበለ መከራ ግና ንጉስ ከሸግር ኣይምተገብአን ነይሩ።”

⁵ሽዑ ንጉስ ኣሃሽዌሮስ ንንግስቲ ኣስቴር “እዝ ከምዙይ ክገብር ዝደፈረ መን እዩ? ኣበይከ ኣሎ?” በላ።

⁶ኣስቴር ድማ “እቲ ተፃራርን ፀላኢን እዝ ክፉእ ሃማን እዩ!” በለት። ሃማን ከዓ ኣብ ቅድሚ ንጉስን ንግስትን ተሸበረ።

⁷ንጉስ ድማ ተቖጢዑ ኻብቲ ወይኒ ተሲኡ ናብ ገነት ቤተ መንግስቲ ወፀ፤ ሃማን ከዓ ንጉስ ከጥፍኦ ኸም ዝመደበ ስለ ዝረአየ፥ ምእንቲ ህይወቱ ንንግስቲ ኣስቴር ክልምን ተረፈ። ⁸ንጉስ ድማ ካብ ገነት ቤተ መንግስቲ ናብ ኣዳራሽ መስተ ወይኒ ተመለሰ። ሃማን ከዓ ኣብቲ ኣስቴር ዝነበረቶ ዓራት ወዲቑ ነበረ። ንጉስ ድማ “ኣነ ኣብዙይ እንተለኹ እኳ ንንግስቲ ክግፍዓ ድዩ?” በለ። እዝ ቃል እዙይ ካብ ኣፍ ንጉስ ምስ ወፀ፥ እቶም ኣገልገልቲ ገፅ ሃማን ኸደንዎ። ^a a v8 ገፅ ናይ ዝተፈርደ ሰብ ምኽዳን፥ ዕድሉ ኸም ዝተዓፅወ፥ ከም ምዉት ከም ዝተቘፀረ ዘመልክት ጥንታዊ ምልክት ነበረ።

⁹ሓርቦና፥ ካብ ጃንደረባታት ንጉስ ሓደ ዝኾነ፥ ከምዙይ በለ፦ “እቲ ሃማን ነቲ ምእንቲ ንጉስ ዝተዛረበ መርዶካይ ዝገበረሉ፥ ዕስራን ሰለስተን ሜትር ዝቚመቱ ዕንፀይቲ፥ ኣብ ቤት ሃማን ደው ኢሉ ኣሎ።” ንጉስ ድማ “ኣብኡ ስቐልዎ” በለ።

¹⁰ስለዙይ ንሃማን ኣብቲ ንመርዶካይ ዘዳለዎ ዕንፀይቲ ሰቐልዎ፤ ቍጥዓ ንጉስ ድማ ሃዶአ።