Estherei jembü mütli shanga sudajada
Nyibou lem to Estherei ngaola himshuong langkei hoba haoeibü mütli shanga sudajakei, hoba haoen dangbou hoba khulimbou müt nyen lenkei: Haman. Chobaei khauanga loenan haukei; Hamanei saoeibü shen thüka khüpetan sudajala loujinei kho ngümyobü tegü yeikei. Haoei himshuong shanga lamlebü phoshang thüka phenetkei.
7 1Hobaje Choba hoba Haman Chobasao Esther yoa yungla loukei. 2Chalou nyibounyet ka, ih yungjinei, Chobaei tokei Esther to phekei, “Chobasao Esther, kaibü den ai? Kaibü la kulabü. Kaibü subüjabü ai? Sangle jamde to sühko kaibü la kulabü.”
3Chobasao Estherei jongaikei, “O Choba, ka thedanga ngei maangshikbü hapalonga, hoba kho Choba thedanga maibü kialonga, ngeibü den ka ngeibü langkei kü la kushi, hoba ngeibü subüjabü ka ngeibü mütli kü la kushi. 4Ngo hoba ngeibü mütli mautila, haitila hoba aokei ajoutiko shanga yaakan kia. Künei aao hoba aaosao la yaakan ongkei kialonga, ngei ngüh üangko kikhoulabü; aishanga kho tegü maangmau khoei Choba to khonsaktia lele akilabü.”
5Kheijinei Choba Xerxesei Chobasao Esther to laukei, “Ho tegü kümla maangto dambü müt kho ao, hoba lanei ki?”
6Estherei laukei, “Dangbou hoba khulimbou kho hibü amaibü Haman ong!” Hobaje Haman Choba hoba Chobasao thedanga aeibou hatkei.
7Choba khauanga ih ka loenan Choba chem bamang to haukei; lausikei Haman jembü langkei shanga Chobasao Esther to sudajada thüngkei, aishanga Chobaei hao to amaibü kümla thükbü kho haoei chühenkei. 8Choba chem bamang ka ih yungbü lemshang to sepeijung loukei; hoba Esther kibü shen thüka Haman tuongan kikei. Chobaei laukei, “Ngo chema kijinei haoei Chobasao to ngümla aei thükkei lo?” Ho ngüh Chobaeibü sembung ka longjinei, khangenbou shuongei Hamaneibü thenyek küplepbei. a a v8 Shedakei müt cheeibü thenyek küplepbü kho, haoeibü jih leletakei dogo shangiednyu yaütnyen kikei — hao haikei kibü tegütham kikei.
9Chobaeibü khangenbou shuong yoka che Harbonaei laukei, “Choba shanga janbü laubou Mordecai shanga Hamanei kümbü, süng iknop anjinsem khübü phenbü bu kho, Hamaneibü chema pi kia.” Chobaei laukei, “Hao kho thüka phenan haitiashi.”
10Hibü haoenei Mordecai shanga Hamanei lamlebü phenbü bu thüka Haman phenetnyu haitikei, hoba Chobaeibü khauang longbü kho hapbei.
