以斯帖記 7

7 ¹於是王同哈曼一齊嚟同王后以斯帖飲酒。 ²到咗第二日,喺飲酒嘅時候,王又問以斯帖:「王后以斯帖啊,你想求乜嘢呢?我一定應承你。你有乜嘢請求呢?就算係國嘅一半,都照辦。」

³王后以斯帖答:「王啊,我若果喺你眼中蒙恩,王若果覺得好,我求你賜返我一命——呢個係我所求嘅;亦都賜返我嘅同胞——呢個係我所請求嘅。 ⁴因為我同我嘅同胞畀人賣咗,要被消滅、殺害、除滅乾淨。我哋若果只不過畀人賣去做奴僕婢女,我就算數,唔出聲;呢啲咁嘅麻煩都唔值得驚動王。」

⁵亞哈隨魯王就對王后以斯帖講:「佢係邊個?喺邊度?邊個咁大膽敢做呢啲嘢?」

⁶以斯帖話:「就係呢個惡人哈曼,佢係我哋嘅對頭同仇敵!」哈曼喺王同王后面前非常之驚慌。

⁷王勃然大怒,離開酒席去到王宮嘅花園;哈曼就留低向王后以斯帖苦苦哀求,想保住自己條命,因為佢見到王已經決意要毀滅佢。 ⁸ 王由王宮嘅花園返到宴會廳,見到哈曼伏喺以斯帖所坐嘅榻上。王就話:「佢喺我喺度嘅時候,竟然仲敢咁樣冒犯王后咩?」呢句話一出口,侍從就將哈曼嘅面遮住。 ^a a v8 遮住被定罪之人嘅面,係古時嘅一個記號,表示佢嘅命運已經注定——同死人冇分別。

⁹王嘅一個太監哈波拿講:「哈曼為咗曾經替王出聲嘅末底改,喺自己屋企整咗一個七十五呎高嘅絞架,仲喺度企住㖭。」王就話:「將佢掛上去!」

¹⁰於是佢哋就將哈曼掛喺佢為末底改預備嘅絞架上,王嘅怒氣先至平息。