Esther 7 FHB Father's Heart Bible™

7 ¹Titia raja aru Haman tu rani Esther logot te piyabole ahhise. ²Dusera din te, angur-ros piya homoi te, raja pora Esther ke aru hudise, “Rani Esther, tumar binti ki ase? Eitu tumi ke dibo. Tumar ki itcha ase? Rajyo laga adha tak bhi dibo.”

³Rani Esther pora jawab dise, “Raja, jodi moi Apuni laga suku te anugrah paise, aru jodi raja khushi ase, tene hole moi laga binti te moi laga jivon moi ke dibi, aru moi laga itcha te moi laga manuh khan ke dibi. ⁴Ami, moi aru moi laga manuh khan ke, khotom koribole, morai dibole, aru nasto koribole bikri kori dise. Jodi amikhan ke khali mota aru maiki noukar hisab te bikri korise, tene hole moi chup-chap thakibo; eneka dukh pora raja ke digdar diya thik nohoi.”

⁵Titia raja Xerxes pora rani Esther ke koise, “Eneka kaam koribole himmat kora manuh tu kun ase, aru tai kot ase?”

⁶Esther pora koise, “Ekjon birodhi aru dushman—eitu paapi Haman ase!” Titia Haman tu raja aru rani laga age te bisi bhoi pora kapise.

⁷Raja bisi khong uthi kene, angur-ros pora uthi kene mahal laga bagan te jaise, kintu Haman tu nijor jivon nimite rani Esther ke binti koribole thakise, kilemane raja pora tai ke nasto koribo eitu tai bujhi loise. ⁸Raja tu mahal laga bagan pora bhoj kora ghor te wapas ahhise. Esther thaka bisna te Haman tu giri thakise. Raja pora koise, “Moi ghor te thaka homoi te bhi tai rani ke jor koribo naki?” Eitu kotha raja laga mukh pora ulai jawa logot te, noukar khan pora Haman laga mukh dhaki dise. ^a a v8 Ekjon saja pa-a manuh laga mukh dhaka tu purana somoi laga chihna thakise, ki tai laga bhagya bondho hoi jaise—tai mora nisina he thakise.

⁹Raja laga noukar khan majot te ekjon, Harbona pora koise, “Raja nimite bhal kotha kowa Mordecai nimite Haman pora bona 75 foot ucha phasi laga khamba tu Haman laga ghor te khara ase.” Raja pora koise, “Tai ke eitu te phasi dibi.”

¹⁰Titia tarkhan pora Mordecai nimite Haman pora bonai rakha phasi laga khamba te tai ke phasi dise, aru titia raja laga khong komi jaise.