Esther 8 FHB Father's Heart Bible™

8 ¹Hei din te Raja Xerxes pora Yehudi khan laga dushman Haman laga sob dhun-sompoti Rani Esther ke dise. Aru Mordecai tu raja laga usor te ahhise, kilemane Esther pora Mordecai tai nimite kineka ase koi dise. ²Raja pora Haman pora wapas loi kene thaka tar laga mohor laga anguthi tu ulai loi kene, Mordecai ke dise. Aru Esther pora Mordecai ke Haman laga dhun-sompoti uporte rakhise.

³Esther pora aru ekbar raja ke kotha koise, aru tar theng te giri kene, kandi kene, Agagi manuh Haman laga biya kaam aru Yehudi khan birodh te bona tar laga chalaki tu rukhabole tar ke binti korise. ⁴Raja pora Esther phale suna laga raja-lathi tu uthai dise, aru tai uthi kene tar usor te khara hoise. ⁵Tai koise, “Jodi raja ke bhal lage, aru jodi moi tar laga anugrah paise, aru jodi eitu tar age te thik ase, aru moi tar ke khushi kore, tene hole Agagi Hammedatha laga chokra Haman pora raja laga sob desh khan te Yehudi khan ke khotom koribole bona aru likha tu ulta koribole, chithi khan likhi dibi.” ⁶“Kineka moi moi laga manuh khan uporte aha dukh tu dikhi kene sojho koribo paribo? Aru kineka moi moi laga ghor manuh khan khotom hua tu sai kene sojho koribo paribo?”

⁷Raja Xerxes pora Rani Esther aru Yehudi Mordecai ke koise, “Moi Esther ke Haman laga ghor dise, aru Yehudi khan birodh te chalaki kora nimite tarkhan pora tar ke phansi te tangai dise.” ⁸“Tumikhan nijor bhal pora bhabi kene, raja laga nam te, Yehudi khan nimite likhibi, aru tar laga mohor laga anguthi pora chihna lagai dibi—kilemane raja laga nam te likha aru tar anguthi pora chihna lagai diya kotha tu kun pora bhi ulta koribo napare.”

⁹Tetiya tisra mahina laga teish-ta din te—Sivan mahina te—raja laga likhdhari khan ke matise, aru India pora Cush tak laga ek-sou satais-ta desh laga Yehudi khan ke, aru shashok khan, rajyopal khan aru cholawta khan ke, Mordecai pora hukum kora sob likhise: sob desh ke tar nijor akshor te, sob manuh ke tar nijor bhasha te, aru Yehudi khan ke tarkhan laga akshor aru bhasha te. ¹⁰Mordecai pora Raja Xerxes laga nam te likhise, aru raja laga mohor laga anguthi pora chihna lagaise, aru raja laga kaam nimite rakha tej chola ghora khan uporte chithi khan khobor-bahok khan pora pathai dise. ¹¹Hei chithi pora sob sheher te thaka Yehudi khan ke eke logot te joma hobole aru nijor jibon bacha bole adhikar dise: tarkhan ke hamla kora kun manuh nahole desh laga hathiyar thaka sipahi khan ke—bacha khan aru maiki khan loi kene—khotom koribole, morai dibole aru nash koribole, aru tarkhan laga dushman khan laga saman khan lutibole. ¹²Eitu Raja Xerxes laga sob desh khan te ek din te hobole thakise—baroh-ta mahina laga, Adar mahina laga, tero-ta din te. ¹³Hei hukum laga ekta nokol sob desh te niyom hisab te ulai dibole aru sob manuh khan ke janai dibole thakise, titia Yehudi khan hei din te tarkhan laga dushman khan uporte badla lobole taiyar hobo. ¹⁴Raja laga ghora khan uporte khobor-bahok khan, raja laga hukum pora joldi aru dabai diya hoi kene, joldi ulai jaise; aru hei hukum tu Susa laga kila te dise.

¹⁵Mordecai tu raja laga neel aru boga kapra, ekta dangor suna laga mukut, aru mihin kapra aru beguni rong laga chola lagai kene raja laga usor pora ulai jaise. Aru Susa sheher pora hala kori kene khushi korise. ¹⁶Yehudi khan logot te puhor, anand, khushi aru sonman thakise. ¹⁷Raja laga hukum aru niyom jun desh aru sheher te puchise, ta te Yehudi khan logot te anand aru khushi, bhoj khuate aru ekta chuti din thakise. Aru desh laga bisi manuh khan Yehudi hoi jaise, kilemane Yehudi khan laga bhoi tarkhan ke dhorise.