Estherna Awui Mibingwui Vang Phayat
Kakhanewui mang khavai khangarumli Estherna a khalattawui kharing kala awui mibingwui kharing poi, kala athumli yorsang kahai mi chiwui aming hoi: Haman. Awungana malungvātda shokhaowa; Hamanna awui pamkhavai ngasoli pitāda seihāi, kala chi ali sāshi khavai kasā thāda phaningi. Ana a khalattana sākahai tārongli hokthānghaowa.
7 1Chieina awunga eina Hamanna Awungva̱ Estherli ngasoda mang khavai vai. 2Kakhanethang, drakhāra̱ mangwui thili, awungana Awungva̱ Estherli hāngluishita, "Awungva̱ Esther, nawui pokhangai khikhala? Nali mira. Nawui ningkachāng chi khikhala? Iwui wungram tangkhai eina nali mira."
3Awungva̱ Estherna ngahānkai, "O awunga, ina nawui mikyanli ngahānkhangai samphangda, kala awungali ningyāng ungngasakakha, iwui pokhangai chili iwui mirin chi ili khamilu, kala iwui ningkachāngli iwui mibing chi ili khamilu. 4Kaja ina kala iwui mibing, sāthat, shaothat kala sāshimitmi khavai yorsang kahaina. Ithum mayarnao kala sha̱nao raonao sākhavai tangda yorsangsi kaje, ina kasaikha pamsersi ngayi; khikhalajila chikathā kakhanangna awungali khonzār ngasak khavai mashapmana."
5Chieina Awunga Ahasuerusna Awungva̱ Estherli hānga, "Hi sāsang kahai chi khipākhala, kala apam khili leikhala?"
6Kha Estherna hānga, "Yangkashi kala yangkashe! Hi makhayā Haman chilina!" Chieina Hamanna awunga eina awungva̱wui mangāli ngacheenāhaowa.
7Malungkhavātna pemhaida, awungana drakhāra̱ mangwui eina ngakarthuida konungwui yāmguili kai; kha awungana ali sāshimitmi khavai khangarān sai da theilaga, Hamanna Awungva̱ Estherli awui mirinwui vang seihā khavai pamsanga. 8Awungana konungwui yāmguiwui eina ngazin phazāt pamli latunga. Estherna pamkhavai pet chili Hamanna pitāhairasai. Chieina awungana hānga, "Ina hili leilakha, awungva̱li karankha shaopamfarakhala?" Awungawui khamor eina tui hi shokkharā, athumna Hamanwui mai farorhaowa. a a v8 Achālakhali, kathi danti samphang kahai mi akhawui mai farorhai hi, awui danti kasiktit hairakhala da khangam kahaina—a kathi kahai mi thāda leira.
9Chieina awungawui ahonga akha Harbonana hānga, "Yanglu, awungawui vang kaphā tui hāngkahai Mordecaili phāshi sākhavai Hamanna sākahai tārong, khuining hangphangā chi Hamanwui shimli nganingda lei." Awungana hānga, "Chi tārongli ali hokthānglu."
10Chithāda sāda athumna Mordecaili ngarān kahai tārong chili Hamanli hokthanghaowa; laga awungawui malungkhavāt chi vānhaowa.
