Awungana Mordecaili Khayāshi
Awungana zingkāli mayip shapmana, thotrinchān pāchinga, kala Mordecaili sāman akhala mamimana da theikhui. Mordecaili shaothat khavai poirāsā Hamanli mi akhali kathāda khayāngmira da ngahāna—ana a khalattawui ningkachāng hāngshoka, chiwui thili Mordecaili lamli thānda chi hāngphungra. Awui shimnaobingna awui shimān rāra da theihaora.
6 1Chithang ngayā, awungawui pikakhui china yāmshokhaowa; kala ana Thotrinchān Lairik chi khuirālu da kasoi, kala chi awui mangāli pāhaowa. 2Mordecaina, awunga Ahasuerusli sāthat khavai khangarān kahai, khāmongphei khamayona awungawui ahonga khani Bigthana eina Tereshna phongkahaina da kapihaida theihaowa. 3Awungana ngahāna, "Hiwui vang Mordecaina khi khayākakā kala khangamkharei samphangkhala?" Awungawui raobingna ngahānkai, "Awui vang khikha masāhaimana."
4"Kayāngli khipa leilikhala?" da awungana ngahāna. Hamanna Mordecaili awui ngarān kahai tārongli phāshi sākhavai awungali pokhavai, konungwui atung kayāngli vāzanghairasai.
5Awungawui raobingna ali hānga, "Hamanna kayāngli nganingda lei." "Ali khuirāzanglu" da awungana hānga.
6Hamanna vāzanga. Awungana ali hānga, "Awungana khayāshi khavai ningyāng ungkapai mipāwui vang khi sāphalungrakhala?" Hamanna awui ningli machuka, "Awungana i peichaoda khipāli khayāshi khavai ningyāng ungrakhala?"
7Chieina Hamanna awungali hānga, "Awungana khayāshi khavai ningyāng ungkapai mipāwui vang, 8awungana ngavaikahai wungnao katuma phahon akha, ana katong kahai sigui akha, kala sigui akuili teimikhavai wungnao kuihon akha khuirāranu. 9Kachon eina sigui chi awungawui khangamkharei wungnaobing akhawui pāngli milu. Awungana khayāshi khavai ningyāng ungkapai mipāli ngavaimilu, ali sigui katongmida keinungwui yāngreili phungrongvai, kala awui mangāli, 'Awungana khayāshi khavai ningyāng ungkapai mipāwui vang hithāda sāhaira!' da vaolu."
10Awungana Hamanli hānga, "Thākmeilu, nana hāngkahai thāda kachon eina sigui chi khuilu, kala awungawui ngaveili pamda khalei Jehudi Mordecaili chithāda sālu. Nana hāngkahai chi khikhala manothālakalu."
11Hamanna kachon eina sigui chi khuilaga, Mordecaili ngavaimilaga, ali sigui katongmida keinungwui yāngreili phungrongvai, kala awui mangāli, "Awungana khayāshi khavai ningyāng ungkapai mipāwui vang hithāda sāhaira" da vaosera.
12Chiwui thili Mordecaina awungawui ngaveili latunghaowa, kha Hamanna sifada akui rommihailaga thākta shimli unghaowa. 13Hamanna apreiva̱ Zeresh eina awui ngasotnao saikorali, shokkahai saikora unghāngsera. Awui hāngmachinbing eina apreiva̱ Zereshna ali hānga, "Nawui mangāli pitāphok kahai Mordecai chi Jehudi kaje, nana ali mayuirarmara; kachangkhatta awui mangāli na pitāra." 14Athumna ali ngasanhungda leilakha, awungawui ahongabing rārāsai, kala Estherna ngarān kahai ngazin phazātli Hamanli thākta khuivāhaowa.
