አስቴር 6

6 ¹በዚያች ሌሊት ንጉሡን እንቅልፍ ራቀው፤ የመታሰቢያ መጽሐፉ፣ ይኸውም የዜና መዋዕሉ፣ መጥቶ በፊቱ እንዲነበብ አዘዘ። ²መርዶክዮስ፣ ደጃፉን ከሚጠብቁት ከንጉሡ ጃንደረቦች ሁለቱን፣ ቢግታናንና ቴሬሽን፣ ንጉሥ ጠረክሲስን ሊገድሉ ስለ ፈለጉ እንደ ከሰሳቸው ተጽፎ ተገኘ። ³ንጉሡም፣ “መርዶክዮስ ስለዚህ ነገር ምን ክብርና ምን ታላቅነት ተሰጠው?” ብሎ ጠየቀ። የሚያገለግሉትም፣ “ምንም አልተደረገለትም” ብለው መለሱ።

⁴ንጉሡም፣ “በቅጥሩ ውስጥ ያለው ማን ነው?” ብሎ ጠየቀ። ሐማም መርዶክዮስን ባዘጋጀው መሰቀያ ላይ እንዲሰቅለው ሊጠይቀው ወደ ቤተ መንግሥቱ ውጪኛ ቅጥር ገብቶ ነበር።

⁵የንጉሡ አገልጋዮችም፣ “እነሆ፣ ሐማ በቅጥሩ ውስጥ ቆሞአል” አሉት። ንጉሡም፣ “አስገቡት” አለ።

⁶ሐማም ገባ። ንጉሡም፣ “ንጉሡ ሊያከብረው ለሚወድደው ሰው ምን ይደረግለት?” ብሎ ጠየቀ። ሐማም በልቡ፣ “ንጉሡ ከእኔ ይልቅ ማንን ሊያከብር ይወድዳል?” ብሎ አሰበ።

⁷ስለዚህ ሐማ ንጉሡን እንዲህ አለው፤ “ንጉሡ ሊያከብረው ለሚወድደው ሰው፣ ⁸ንጉሡ የለበሰውን የንግሥና ልብስ፣ ንጉሡ የተቀመጠበትን ፈረስ፣ በፈረሱም ራስ ላይ የንግሥና አክሊል ያምጡ። ⁹ልብሱንና ፈረሱን ከንጉሡ የተከበሩ መኳንንት ለአንዱ ይስጡት፤ ንጉሡ ሊያከብረው የሚወድደውን ሰው ያልብሱት፤ በፈረሱም ላይ አስቀምጠው በከተማዪቱ አደባባይ ያዙሩት፤ በፊቱም፣ ‘ንጉሡ ሊያከብረው ለሚወድደው ሰው እንዲህ ይደረግለታል!’ ብለው ይጩኹ።”

¹⁰ንጉሡም ሐማን፣ “ፍጠን፤ እንዳልኸው ልብሱንና ፈረሱን ይዘህ፣ በንጉሡ በር ለተቀመጠው ለአይሁዳዊው ለመርዶክዮስ እንዲሁ አድርግለት፤ ከተናገርኸውም ነገር ምንም አትተው” አለው።

¹¹ሐማም ልብሱንና ፈረሱን ወስዶ መርዶክዮስን አለበሰው፤ በፈረሱም ላይ አስቀምጦ በከተማዪቱ አደባባይ አዞረው፤ በፊቱም፣ “ንጉሡ ሊያከብረው ለሚወድደው ሰው እንዲህ ይደረግለታል” እያለ ጮኸ።

¹²ከዚያም በኋላ መርዶክዮስ ወደ ንጉሡ በር ተመለሰ፤ ሐማ ግን እያዘነ ራሱን ተከናንቦ ወደ ቤቱ ፈጥኖ ሄደ። ¹³ሐማም የሆነውን ሁሉ ለሚስቱ ለዜሬሽና ለወዳጆቹ ሁሉ ነገረ። አማካሪዎቹና ሚስቱ ዜሬሽም፣ “በፊቱ መውደቅ የጀመርኸው መርዶክዮስ አይሁዳዊ ስለሆነ፣ ልታሸንፈው አትችልም፤ በፊቱ በእርግጥ ትወድቃለህ” አሉት። ¹⁴ገና ከእርሱ ጋራ ሲነጋገሩ ሳሉ የንጉሡ ጃንደረቦች መጡ፤ ሐማንም አስቴር ወዳዘጋጀችው ግብዣ ፈጥነው ወሰዱት።