Me basika na mukanda
Dibuku

Ntinu Ke Zitisa Maladoke

Pongi ke kima ntinu, yandi ke tumisa ba tanga dibuku ya kinkulu, mpe yandi ke zaba ti ba futaka Maladoke ata kima ve. Amane, yina kwizaka samu na kulomba lufwa ya yandi, ba ke yufula yandi mutindu ya kuzitisa muntu—yandi ke tendula yina yandi mosi vwandaka banza, na manima yandi fwana kutwadisa Maladoke na babala-bala na kusamuna yawu. Bantu ya nzo ya yandi ke mona ti kubeba ya yandi ke kwiza.

Kapu 6.

Na mpimpa yina, pongi kimaka na ntinu. Yandi tumisaka ba nata dibuku ya kinkulu ya mambu, mpe ba tanga yawu na yandi. Ba zwaka ya kusonama ti Maladoke zabisaka mambu ya Bigitana na Teresi, bayinzo zole ya ntinu yina vwandaka kengila mwelo, yina sosaka kufwa ntinu Kserksese. Ntinu yufulaka: «Nkembo mpe bunene nki Maladoke me baka samu na dyambu yayi?» Bisadi ya yandi vutulaka: «Ba salaka yandi ata kima ve.»

Ntinu yufulaka: «Nani kele na lupangu?» Amane kotaka na lupangu ya ngaanda ya nzo ya ntinu samu na kulomba yandi na kuledika Maladoke na yinti yina yandi yidikaka.

Bisadi ya ntinu zabisaka yandi: «Amane kele ya kutelama na lupangu.» Ntinu tubaka: «Kotisa yandi.»

Amane kotaka. Ntinu yufulaka: «Nki ba fwana kusala samu na muntu yina ntinu ke zola kuzitisa?» Amane banzaka na kati ya ntima ya yandi: «Nani ntinu ke zola kuzitisa kuluta munu?»

Na yina, Amane tubaka na ntinu: «Samu na muntu yina ntinu ke zola kuzitisa, bika ti ba nata kiyunga ya kintinu yina ntinu me lwata, mpunda yina ntinu me yuluka, mpe mpu ya kintinu na yintu ya yawu. Pesa kiyunga mpe mpunda na mosi na kati ya bamfumu ya nene ya ntinu. Lwatisa muntu yina ntinu ke zola kuzitisa, nata yandi na zulu ya mpunda na banzila ya mbanza, mpe samuna na mantwala ya yandi: “Ba ke sala mutindu yayi muntu yina ntinu ke zola kuzitisa!”»

«Sala mbangu,» ntinu tubaka na Amane: «baka kiyunga mpe mpunda mutindu nge me tuba, mpe sala mutindu yina samu na Maladoke, mu-Zwife yina ke vwanda na mwelo ya ntinu. Bika ata kima mosi ve na yina nge me tuba.»

Amane bakaka kiyunga mpe mpunda, yandi lwatisaka Maladoke, mpe yandi nataka yandi na zulu ya mpunda na banzila ya mbanza. Yandi vwandaka looka na mantwala ya yandi: «Ba ke sala mutindu yayi muntu yina ntinu ke zola kuzitisa.»

Na manima, Maladoke vutukaka na mwelo ya ntinu, kasi Amane vutukaka nswalu na nzo ya yandi, na kudila, mpe na kufika yintu ya yandi. Amane zabisaka kento ya yandi Zeresi mpe bankundi ya yandi nyonso mambu nyonso yina salamaka. Bantu ya mayela ya yandi mpe kento ya yandi Zeresi tubaka: «Samu ti Maladoke, yina nge me banda kubwa na mantwala ya yandi, kele mu-Zwife, nge lenda nunga yandi ve. Ya tsyelika, nge ke bwa na mantwala ya yandi.» Ntangu bawu vwandaka ntete na kusolola ti na yandi, bayinzo ya ntinu kumaka. Bawu nataka Amane nswalu na nkinsi yina Esiteli yidikaka.