एस्तर 6 FHB Father's Heart Bible™

6 ¹त्यस रात राजालाई निद्रा लागेन, अनि उनले अभिलेखको पुस्तक अर्थात् इतिहास ल्याएर आफूलाई पढेर सुनाउन आज्ञा दिए। ²त्यसमा यस्तो लेखिएको भेटियो, कि ढोका कुर्ने राजाका दुई जना नपुंसक बिग्थाना र तेरेशले अहासूरस राजाको हत्या गर्न खोजेका कुरा मोर्दकैले बताइदिएका थिए। ³राजाले सोधे, “यसको निम्ति मोर्दकैले के सम्मान र आदर पाएका छन्?” उनका सेवकहरूले जवाफ दिए, “उनको निम्ति केही गरिएको छैन।”

⁴राजाले सोधे, “आँगनमा को छ?” हामानचाहिँ आफूले तयार पारेको फाँसीको खम्बामा मोर्दकैलाई झुण्ड्याउने अनुमति माग्न दरबारको बाहिरी आँगनमा भर्खरै प्रवेश गरेका थिए।

⁵राजाका सेवकहरूले उनलाई भने, “आँगनमा हामान उभिरहेका छन्।” राजाले भने, “उनलाई भित्र ल्याओ।”

⁶हामान भित्र आए। राजाले सोधे, “राजाले सम्मान गर्न रुचाउने मानिसको निम्ति के गरियोस्?” हामानले मनमनै सोचे, “मभन्दा बढ्ता राजाले अरू कसलाई सम्मान गर्न रुचाउँछन् र?”

⁷यसकारण हामानले राजालाई भने, “राजाले सम्मान गर्न रुचाउने मानिसको निम्ति, ⁸राजाले लगाएको शाही पोशाक, राजा चढेको घोडा, र त्यसको टाउकोमा राजकीय मुकुट ल्याइयोस्। ⁹त्यो पोशाक र घोडा राजाका कुनै एक कुलीन अधिकारीलाई दिइयोस्। तिनले राजाले सम्मान गर्न रुचाउने मानिसलाई त्यो पोशाक पहिराएर घोडामा चढाई सहरको चोकभरि घुमाऊन्, अनि उनको अगिअगि यसो भनी घोषणा गरून्, ‘राजाले सम्मान गर्न रुचाउने मानिसको निम्ति यसै गरिन्छ!’”

¹⁰राजाले हामानलाई भने, “छिटो गर, तिमीले भनेझैँ त्यो पोशाक र घोडा लेऊ, अनि राजाको ढोकामा बस्ने यहूदी मोर्दकैको निम्ति त्यसै गर। तिमीले भनेको कुनै कुरा नछोड।”

¹¹हामानले त्यो पोशाक र घोडा लिएर मोर्दकैलाई पहिराए, र उनलाई घोडामा चढाई सहरको चोकभरि घुमाउँदै उनको अगिअगि यसो भनी कराए, “राजाले सम्मान गर्न रुचाउने मानिसको निम्ति यसै गरिन्छ।”

¹²त्यसपछि मोर्दकै राजाको ढोकामा फर्केर गए, तर हामानचाहिँ शोकमा डुबेर टाउको ढाकी हतारिँदै घर गए। ¹³हामानले आफ्नी पत्नी जेरेश र सबै साथीहरूलाई भएका सबै कुरा सुनाए। तब उनका सल्लाहकारहरू र पत्नी जेरेशले भने, “जसको सामु तिमी पतन हुन थालेका छौ, ती मोर्दकै यहूदी भएकाले तिमीले उनलाई जित्न सक्दैनौ—तिमी निश्चय नै उनको सामु पतन हुनेछौ।” ¹⁴उनीसँग कुरा गरिरहँदै थिए, त्यति नै बेला राजाका नपुंसकहरू आइपुगे, र हामानलाई एस्तरले तयार पारेको भोजमा हतारिँदै लगे।