以斯帖記 6

6 ¹嗰一晚,王瞓唔着;佢就吩咐人攞史書,即係歷代誌,讀畀佢聽。 ²書上發現有記載,話末底改曾經舉報守門嘅兩個太監比革探同提列,佢哋想謀害亞哈隨魯王。 ³王問:「末底改因為呢件事得到咗乜嘢尊榮同高位呀?」侍候佢嘅臣僕答:「一啲都冇為佢做過。」

⁴王問:「宮院裏面而家有邊個呀?」嗰陣哈曼啱啱入咗王宮嘅外院,想求王將末底改掛喺佢預備好嘅木架上。

⁵王嘅臣僕對佢講:「哈曼企喺院裏面。」王話:「叫佢入嚟啦。」

⁶哈曼入到嚟。王問佢:「王樂意尊崇嘅人,應該點樣待佢先啱呢?」哈曼心諗:「除咗我,王仲會樂意尊崇邊個呢?」

⁷於是哈曼對王講:「王樂意尊崇嘅人, ⁸可以叫人攞王著過嘅王袍,同埋王騎過嘅馬,又攞一頂王冠戴喺馬頭上; ⁹將呢件王袍同呢匹馬交畀王一個尊貴嘅大臣,叫佢畀王樂意尊崇嘅人著上,又扶佢騎住匹馬,喺城中嘅廣場遊行,喺佢前面宣告:『王樂意尊崇嘅人,就係咁樣待佢!』」

¹⁰王對哈曼講:「你快啲照你所講嘅,將王袍同匹馬攞去,咁樣待坐喺朝門嗰個猶大人末底改。凡你所講嘅,一樣都唔好漏低。」

¹¹哈曼於是攞咗王袍同匹馬,畀末底改著上,又扶佢騎住匹馬,喺城中嘅廣場遊行,喺佢前面宣告:「王樂意尊崇嘅人,就係咁樣待佢。」

¹²之後末底改返返朝門,哈曼就趕住返屋企,傷心愁悶,遮住個頭。 ¹³哈曼將所發生嘅一切,講畀佢老婆細利斯同埋佢所有朋友聽。佢啲謀士同佢老婆細利斯對佢講:「你喺末底改面前開始敗落;佢既然係猶大人,你就唔會勝得過佢,你喺佢面前一定會敗落。」 ¹⁴佢哋仲喺度同哈曼講緊嘢嘅時候,王嘅太監就到,催促哈曼快啲去以斯帖預備好嘅筵席。