எஸ்தர் 6

6 ¹அன்று இரவில் ராஜாவுக்கு நித்திரை வராதிருந்தது; ஆகையால் நடபடிகள் எழுதியிருந்த நாளாகமப் புத்தகத்தைக் கொண்டுவந்து தமக்கு முன்பாக வாசிக்கும்படி கட்டளையிட்டார். ²வாசலைக் காவல்காத்த ராஜாவின் இரண்டு பிரதானிகளாகிய பிக்தானாவும் தேரேசும் அகாஸ்வேரு ராஜாவைக் கொலைசெய்யத் தேடினதை மொர்தெகாய் தெரிவித்தான் என்று எழுதப்பட்டிருந்தது கண்டுபிடிக்கப்பட்டது. ³அப்பொழுது ராஜா: “இதற்காக மொர்தெகாய்க்கு என்ன கனமும் மேன்மையும் கிடைத்தது?” என்று கேட்டார். அதற்கு அவருக்குப் பணிவிடை செய்கிறவர்கள்: “அவனுக்கு ஒன்றும் செய்யப்படவில்லை” என்றார்கள்.

⁴“அரண்மனை முற்றத்தில் இருக்கிறது யார்?” என்று ராஜா கேட்டார். அப்பொழுது ஆமான் தான் ஆயத்தம்பண்ணியிருந்த தூக்குமரத்தில் மொர்தெகாயைத் தூக்கிப்போடும்படி ராஜாவிடம் கேட்பதற்காக, அரண்மனையின் வெளிமுற்றத்தில் வந்திருந்தான்.

⁵ராஜாவுக்குப் பணிவிடை செய்கிறவர்கள் அவரை நோக்கி: “இதோ, ஆமான் முற்றத்தில் நிற்கிறான்” என்றார்கள். “அவனை உள்ளே வரச்சொல்லுங்கள்” என்று ராஜா சொன்னார்.

⁶ஆமான் உள்ளே வந்தான். ராஜா அவனை நோக்கி: “ராஜா கனப்படுத்த விரும்புகிற மனுஷனுக்கு என்ன செய்யப்படவேண்டும்?” என்று கேட்டார். அதற்கு ஆமான்: “என்னைவிட அதிகமாய் ராஜா யாரைக் கனப்படுத்த விரும்புவார்?” என்று தன் உள்ளத்திலே நினைத்து,

⁷ராஜாவை நோக்கி: “ராஜா கனப்படுத்த விரும்புகிற மனுஷனுக்கு, ⁸ராஜா அணிந்துகொண்ட ராஜஉடையையும், ராஜா ஏறின குதிரையையும், அவர் சிரசில் வைக்கப்படும் ராஜமுடியையும் கொண்டுவரக்கடவர்கள். ⁹அந்த உடையும் குதிரையும் ராஜாவின் பிரபுக்களாகிய உயர் அதிகாரிகளில் ஒருவன் கையில் ஒப்புவிக்கப்படவேண்டும்; ராஜா கனப்படுத்த விரும்புகிற மனுஷனுக்கு அந்த உடையை உடுத்தி, அவனைக் குதிரையின்மேல் ஏற்றி, நகரவீதி வழியாய்ப் பவனி கொண்டுபோய், ‘ராஜா கனப்படுத்த விரும்புகிற மனுஷனுக்கு இப்படியே செய்யப்படும்!’ என்று அவனுக்கு முன்பாகக் கூறவேண்டும்” என்றான்.

¹⁰அப்பொழுது ராஜா ஆமானை நோக்கி: “நீ சீக்கிரமாய்ப் போய், நீ சொன்னபடியே அந்த உடையையும் குதிரையையும் எடுத்துக்கொண்டு, ராஜாவின் வாசலில் உட்கார்ந்திருக்கிற யூதனாகிய மொர்தெகாய்க்கு அப்படியே செய்; நீ சொன்னதில் ஒன்றையும் விட்டுவிடாதே” என்றார்.

¹¹ஆமான் அந்த உடையையும் குதிரையையும் எடுத்துக்கொண்டு, மொர்தெகாய்க்கு உடையை உடுத்தி, அவனைக் குதிரையின்மேல் ஏற்றி, நகரவீதி வழியாய்ப் பவனி கொண்டுபோய், “ராஜா கனப்படுத்த விரும்புகிற மனுஷனுக்கு இப்படியே செய்யப்படும்” என்று அவனுக்கு முன்பாகக் கூறினான்.

¹²பின்பு மொர்தெகாய் ராஜாவின் வாசலுக்குத் திரும்பிவந்தான்; ஆனால் ஆமானோ துக்கப்பட்டு, தன் தலையை மூடிக்கொண்டு, வேகமாய்த் தன் வீட்டுக்குப் போய்விட்டான். ¹³ஆமான் தனக்கு நடந்த எல்லாவற்றையும் தன் மனைவியாகிய சிரேஷுக்கும் தன் சிநேகிதர் அனைவருக்கும் சொன்னான். அப்பொழுது அவனுடைய ஆலோசனைக்காரரும் அவன் மனைவியாகிய சிரேஷும் அவனை நோக்கி: “எவனுக்கு முன்பாக நீ விழத்தொடங்கினாயோ அந்த மொர்தெகாய் யூத வம்சத்தானாயிருந்தால், நீ அவனை மேற்கொள்ளமாட்டாய்; அவனுக்கு முன்பாக நிச்சயமாய் விழுந்துபோவாய்” என்றார்கள். ¹⁴அவர்கள் அவனோடே இன்னும் பேசிக்கொண்டிருக்கையில், ராஜாவின் பிரதானிகள் வந்து, எஸ்தர் ஆயத்தம்பண்ணியிருந்த விருந்துக்கு ஆமானை விரைவாய் அழைத்துக்கொண்டுபோனார்கள்.