Chobaei Mordecai to Soumo Hatbü
Chobaeibü nyek satentikei, aishanga haoei Lüngbüdobü Lea ditko weikei, hoba Mordecai to ai sungletbü aki dogo ngekei. Hamanei hao haitila sudajala loujinei, Chobaei hao to müt che soumo hatla aiko kümla phekei—Hamanei himshuong shanga dogo haplaje jembü maangang lenkei, kheijinei haoei Mordecai to sangnyua leian, haoeibü yaangbü ngüh phinthonla sükei. Haoeibü chemdang shuongei hao mautibü longbü chühkei.
6 1Kho langyang Chobaeibü nyeket satenkei; hoba haoei Lüngbüdobü Lea leian hao to ditko weila ngühkhüm kukei. 2Chobaeibü koukhün ikjaibü khangenbü penyi, Bigthana si Teresh, Xerxes Choba haitila lambü kho, Mordecaiei ngetikei dogo doan kibü hapbei. 3Chobaei phekei, “Ho shanga Mordecaiei ai nyenhang hoba yaangbü sungletkei?” Hobaje haoeibü khangenbü shuongei jongaiko laukei, “Hao shanga ai akümen.”
4Chobaei phekei, “Chemsophanga ao ki?” Tou Hamanei jembü lamlebü phoshang to Mordecai phenetnyu phola shanga Choba to phela, Chobaeibü chem maangae chemsophang to louan kikei.
5Chobaeibü khangenbü shuongei hao to laukei, “Haman chemsophanga loan ki.” Chobaei laukei, “Hao leian louashi.”
6Hamanei loukei. Chobaei hao to phekei, “Chobaei soumo hatla delilaei müt kho shanga ai kümjan?” Hobaje Hamanei haoeibü maanga laukei, “Chobaei ngo tokei lubü ao to soumo hatla delila?”
7Kheijinei Hamanei Choba to laukei, “Chobaei soumo hatla delilaei müt kho shanga, 8Chobaei lebü neisimei hoba haoei setbü koli leian louashi, hoba koli khua thüka Choba khun angtiashi. 9Ho neisimei hoba koli kho Chobaeibü nyenshen yaangenbü shuong che la kushi, hoba Chobaei soumo hatla delilaei müt la neisimei yukkuashi, hoba hao koli thüka setan sangnyu khonga paran, hoba hao thedanga hai phinthonashi, ‘Chobaei soumo hatla delilaei müt kho shanga ho tegü kümda!’”
10“Hali,” Chobaei Haman to laukei, “ka laubü tegü neisimei hoba koli peashi, hoba Chobaeibü bakhüna setbü Jihudabü Mordecai la kho tegü kümshi. Ka laubü ngüh ai aikei tema.”
11Kheijinei Hamanei neisimei hoba koli peian Mordecai la yukkukei, hoba hao koli thüka setan sangnyu khonga paran, hao thedanga ngekko laukei, “Chobaei soumo hatla delilaei müt kho shanga ho tegü kümda.”
12Kho phaia Mordecai Chobaeibü bakhün to sepeinyu ngaikei, lausikei Hamanei maangto shatko hoba khu khuilepan panteiko jembü chem to haukei. 13Hobaje Hamanei jembü yak Zeresh hoba jembü jenabou shuong pendou la ai ong haüthükkei pendou lenkei. Haoeibü damanchühbü shuong hoba jembü yak Zereshei hao to laukei, “No thedanga tuongtila khangbü Mordecai Jihudabü yinglaje, no hao athüklabü; maimaitham no hao thedanga tuonglabü.” 14Haoen hao yoa joyoko kitoua, Chobaeibü khangenbü shuong lousühkei, hoba Haman kho Estherei lamlebü lem to panteiko leian haukei.
