ಎಸ್ತೇರಳು 6 FHB Father's Heart Bible™

6 ¹ಆ ರಾತ್ರಿ ಅರಸನಿಗೆ ನಿದ್ರೆ ಹತ್ತಲಿಲ್ಲ; ಆದ್ದರಿಂದ ದಿನಚರಿಯ ಗ್ರಂಥವನ್ನು, ಅಂದರೆ ರಾಜವೃತ್ತಾಂತಗಳನ್ನು, ತರಿಸಿ ತನಗೆ ಓದಿಹೇಳಬೇಕೆಂದು ಆಜ್ಞಾಪಿಸಿದನು. ²ಅರಸನ ಹೊಸ್ತಿಲು ಕಾಯುವ ಇಬ್ಬರು ಕಂಚುಕಿಗಳಾದ ಬಿಗೆತಾನ ಮತ್ತು ತೆರೆಷ್ ಅರಸನಾದ ಅಹಷ್ವೇರೋಷನನ್ನು ಕೊಲ್ಲಲು ಹವಣಿಸಿದಾಗ, ಮೊರ್ದೆಕೈ ಅದನ್ನು ತಿಳಿಸಿದ್ದನೆಂದು ಬರೆದಿರುವುದು ಕಂಡುಬಂತು. ³ಅರಸನು, “ಇದಕ್ಕಾಗಿ ಮೊರ್ದೆಕೈಗೆ ಯಾವ ಸನ್ಮಾನವೂ ಗೌರವವೂ ದೊರೆಯಿತು?” ಎಂದು ಕೇಳಿದನು. ಅದಕ್ಕೆ ಅವನ ಸೇವಕರು, “ಅವನಿಗಾಗಿ ಏನೂ ಮಾಡಲಿಲ್ಲ” ಎಂದು ಉತ್ತರಕೊಟ್ಟರು.

⁴ಅರಸನು, “ಅಂಗಳದಲ್ಲಿ ಯಾರಿದ್ದಾರೆ?” ಎಂದು ಕೇಳಿದನು. ಆಗ ಹಾಮಾನನು ತಾನು ಸಿದ್ಧಪಡಿಸಿದ ಗಲ್ಲಿಗೆ ಮೊರ್ದೆಕೈಯನ್ನು ಏರಿಸಬೇಕೆಂದು ಅರಸನನ್ನು ಕೇಳಿಕೊಳ್ಳಲು ಅರಮನೆಯ ಹೊರ ಅಂಗಳಕ್ಕೆ ಬಂದಿದ್ದನು.

⁵ಅರಸನ ಸೇವಕರು ಅವನಿಗೆ, “ಇಗೋ, ಹಾಮಾನನು ಅಂಗಳದಲ್ಲಿ ನಿಂತಿದ್ದಾನೆ” ಎಂದರು. ಅದಕ್ಕೆ ಅರಸನು, “ಅವನನ್ನು ಒಳಗೆ ಕರೆತನ್ನಿ” ಎಂದನು.

⁶ಹಾಮಾನನು ಒಳಗೆ ಬಂದನು. ಅರಸನು ಅವನಿಗೆ, “ಅರಸನು ಸನ್ಮಾನಿಸಲು ಬಯಸುವ ವ್ಯಕ್ತಿಗೆ ಏನು ಮಾಡಬೇಕು?” ಎಂದು ಕೇಳಿದನು. ಆಗ ಹಾಮಾನನು, “ಅರಸನು ನನಗಿಂತ ಹೆಚ್ಚಾಗಿ ಸನ್ಮಾನಿಸಲು ಯಾರನ್ನು ಬಯಸಾನು?” ಎಂದು ತನ್ನೊಳಗೆ ಅಂದುಕೊಂಡನು.

⁷ಆದ್ದರಿಂದ ಹಾಮಾನನು ಅರಸನಿಗೆ, “ಅರಸನು ಸನ್ಮಾನಿಸಲು ಬಯಸುವ ವ್ಯಕ್ತಿಗಾಗಿ ⁸ಅರಸನು ತೊಟ್ಟ ರಾಜವಸ್ತ್ರವನ್ನೂ ಅವನು ಸವಾರಿಮಾಡಿದ ಕುದುರೆಯನ್ನೂ ಅದರ ತಲೆಗೆ ರಾಜಕಿರೀಟವನ್ನೂ ತರಲಿ. ⁹ಆ ವಸ್ತ್ರವನ್ನೂ ಕುದುರೆಯನ್ನೂ ಅರಸನ ಶ್ರೇಷ್ಠ ಅಧಿಕಾರಿಗಳಲ್ಲಿ ಒಬ್ಬನ ಕೈಗೆ ಕೊಡಲಿ. ಅರಸನು ಸನ್ಮಾನಿಸಲು ಬಯಸುವ ವ್ಯಕ್ತಿಗೆ ಅದನ್ನು ತೊಡಿಸಿ, ಕುದುರೆಯ ಮೇಲೆ ಕುಳ್ಳಿರಿಸಿ ಪಟ್ಟಣದ ಬೀದಿಯಲ್ಲಿ ಮೆರವಣಿಗೆಮಾಡಿ, ಅವನ ಮುಂದೆ, ‘ಅರಸನು ಸನ್ಮಾನಿಸಲು ಬಯಸುವ ವ್ಯಕ್ತಿಗೆ ಹೀಗೆ ಮಾಡಲಾಗುತ್ತದೆ!’ ಎಂದು ಸಾರಲಿ.”

¹⁰ಅರಸನು ಹಾಮಾನನಿಗೆ, “ಬೇಗಮಾಡು; ನೀನು ಹೇಳಿದಂತೆಯೇ ವಸ್ತ್ರವನ್ನೂ ಕುದುರೆಯನ್ನೂ ತೆಗೆದುಕೊಂಡು, ಅರಸನ ಬಾಗಿಲಲ್ಲಿ ಕುಳಿತಿರುವ ಯೆಹೂದ್ಯನಾದ ಮೊರ್ದೆಕೈಗೆ ಹಾಗೆಯೇ ಮಾಡು. ನೀನು ಹೇಳಿದ್ದರಲ್ಲಿ ಏನನ್ನೂ ಬಿಡಬೇಡ” ಎಂದನು.

¹¹ಹಾಮಾನನು ಆ ವಸ್ತ್ರವನ್ನೂ ಕುದುರೆಯನ್ನೂ ತೆಗೆದುಕೊಂಡು ಮೊರ್ದೆಕೈಗೆ ಅದನ್ನು ತೊಡಿಸಿ, ಕುದುರೆಯ ಮೇಲೆ ಕುಳ್ಳಿರಿಸಿ ಪಟ್ಟಣದ ಬೀದಿಯಲ್ಲಿ ಮೆರವಣಿಗೆಮಾಡಿ, ಅವನ ಮುಂದೆ, “ಅರಸನು ಸನ್ಮಾನಿಸಲು ಬಯಸುವ ವ್ಯಕ್ತಿಗೆ ಹೀಗೆ ಮಾಡಲಾಗುತ್ತದೆ” ಎಂದು ಸಾರಿದನು.

¹²ಅನಂತರ ಮೊರ್ದೆಕೈ ಅರಸನ ಬಾಗಿಲಿಗೆ ಹಿಂತಿರುಗಿದನು; ಆದರೆ ಹಾಮಾನನು ದುಃಖಿಸುತ್ತಾ ತಲೆಯನ್ನು ಮುಚ್ಚಿಕೊಂಡು ತನ್ನ ಮನೆಗೆ ಅವಸರವಾಗಿ ಹೋದನು. ¹³ಹಾಮಾನನು ನಡೆದ ಎಲ್ಲವನ್ನೂ ತನ್ನ ಹೆಂಡತಿ ಜೆರೆಷ್‌ಳಿಗೂ ತನ್ನ ಎಲ್ಲ ಸ್ನೇಹಿತರಿಗೂ ತಿಳಿಸಿದನು. ಆಗ ಅವನ ಸಲಹೆಗಾರರೂ ಹೆಂಡತಿ ಜೆರೆಷ್‌ಳೂ ಅವನಿಗೆ, “ನೀನು ಯಾರ ಮುಂದೆ ಬೀಳಲು ಆರಂಭಿಸಿದ್ದೀಯೋ ಆ ಮೊರ್ದೆಕೈ ಯೆಹೂದ್ಯನಾಗಿರುವುದರಿಂದ ನೀನು ಅವನನ್ನು ಸೋಲಿಸಲಾರೆ; ನಿಶ್ಚಯವಾಗಿ ಅವನ ಮುಂದೆ ಬೀಳುವೆ” ಎಂದರು. ¹⁴ಅವರು ಅವನ ಸಂಗಡ ಇನ್ನೂ ಮಾತನಾಡುತ್ತಿರುವಾಗಲೇ ಅರಸನ ಕಂಚುಕಿಗಳು ಬಂದು, ಎಸ್ತೇರಳು ಸಿದ್ಧಪಡಿಸಿದ್ದ ಔತಣಕ್ಕೆ ಹಾಮಾನನನ್ನು ಅವಸರವಾಗಿ ಕರೆದೊಯ್ದರು.