بادشاهه مردڪي کي عزت بخشي
بادشاهه کي ننڊ نٿي اچي، تاريخ جو ڪتاب پڙهائي ٿو، ۽ کيس خبر پوي ٿي ته مردڪيءَ کي ڪڏهن به انعام نه مليو. هامان، جيڪو سندس موت جي اجازت گهرڻ آيو هو، کان پڇيو وڃي ٿو ته ڪنهن ماڻهوءَ جي عزت ڪيئن ڪجي — هو پنهنجو ئي خواب بيان ڪري ٿو، پوءِ کيس ئي مردڪيءَ کي گهٽين مان اهو اعلان ڪندي وٺي هلڻو پوي ٿو. سندس گهر وارا سندس تباهي ايندي ڏسن ٿا.
6 1انهيءَ رات بادشاهه کي ننڊ نہ آئي، تنهنڪري حڪم ڏنائين تہ تاريخ جو ڪتاب، يعني وقائعنامو، آڻي کيس پڙهي ٻڌايو وڃي. 2ان ۾ لکيل مليو تہ بادشاهه جا ٻه خواجه سرا، بگتانا ۽ تارس، جيڪي چوکٽ جا نگهبان هئا، بادشاهه اخسويرس کي قتل ڪرڻ جي ڪوشش ڪئي هئي، ۽ مردڪي انهن جي خبر ڏني هئي. 3بادشاهه پڇيو تہ ”انهيءَ لاءِ مردڪي کي ڪهڙي عزت ۽ وڏائي ڏني وئي؟“ سندس خادمن وراڻيو تہ ”ساڻس ڪجھ بہ نہ ڪيو ويو.“
4بادشاهه پڇيو تہ ”صحن ۾ ڪير آهي؟“ هامان مردڪي کي پنهنجي تيار ڪيل ڦاهيءَ تي لٽڪائڻ جي عرض ڪرڻ لاءِ محل جي ٻاهرين صحن ۾ آيو هو.
5بادشاهه جي خادمن کيس چيو تہ ”هامان صحن ۾ بيٺو آهي.“ بادشاهه چيو تہ ”کيس اندر آڻيو.“
6هامان اندر آيو. بادشاهه کائنس پڇيو تہ ”جنهن ماڻهوءَ کي بادشاهه عزت ڏيڻ چاهي ٿو، تنهن لاءِ ڇا ڪيو وڃي؟“ هامان دل ۾ سوچيو تہ ”بادشاهه مون کان وڌيڪ ٻئي ڪنهن کي عزت ڏيڻ چاهيندو؟“
7تڏهن هامان بادشاهه کي چيو تہ ”جنهن ماڻهوءَ کي بادشاهه عزت ڏيڻ چاهي ٿو، 8تنهن لاءِ بادشاهه جو پهريل شاهي پوشاڪ، بادشاهه جي سواري ڪيل گھوڙو، ۽ ان جي مٿي لاءِ شاهي تاج آندو وڃي. 9پوشاڪ ۽ گھوڙو بادشاهه جي ڪنهن هڪ معزز امير جي حوالي ڪيو وڃي. هو ان ماڻهوءَ کي، جنهن کي بادشاهه عزت ڏيڻ چاهي ٿو، پوشاڪ پهرائي، گھوڙي تي چاڙهي، شهر جي چوڪ ۾ گھمائي، ۽ سندس اڳيان اعلان ڪري تہ ’جنهن ماڻهوءَ کي بادشاهه عزت ڏيڻ چاهي ٿو، تنهن سان ائين ڪيو وڃي ٿو!‘“
10بادشاهه هامان کي چيو تہ ”جلدي ڪر، جيئن تو چيو آهي تيئن پوشاڪ ۽ گھوڙو کڻي، بادشاهه جي دروازي تي ويٺل يهودي مردڪي سان ائين ڪر. جيڪي تو چيو آهي، تنهن مان ڪجھ بہ نہ ڇڏج.“
11هامان پوشاڪ ۽ گھوڙو کڻي، مردڪي کي پوشاڪ پهرائي، گھوڙي تي چاڙهي، شهر جي چوڪ ۾ گھمايو، ۽ سندس اڳيان پڪاريندو ويو تہ ”جنهن ماڻهوءَ کي بادشاهه عزت ڏيڻ چاهي ٿو، تنهن سان ائين ڪيو وڃي ٿو.“
12پوءِ مردڪي بادشاهه جي دروازي ڏانهن موٽي آيو، پر هامان ماتم ڪندي ۽ مٿو ڍڪي تڪڙو تڪڙو گھر ويو. 13هامان پنهنجي زال زرس ۽ پنهنجن سڀني دوستن کي سڀ ڪجھ ٻڌايو جيڪو ساڻس ٿيو هو. تڏهن سندس صلاحڪارن ۽ زال زرس چيو تہ ”جنهن مردڪي جي اڳيان تون ڪرڻ لڳو آهين، سو جيڪڏهن يهودي آهي تہ تون ان تي غالب نہ ٿي سگھندين، بلڪ ضرور سندس اڳيان ڪرندين.“ 14اڃا هو ساڻن ڳالهائي ئي رهيو هو تہ بادشاهه جا خواجه سرا آيا، ۽ هامان کي آستر جي تيار ڪيل ضيافت ڏانهن وٺي وڃڻ لاءِ تڪڙ ڪرائڻ لڳا.
