ንጉስ ንመርዶክዮስ ኣኽበሮ

ንጉስ ድቃስ ሰኣነ፥ ነቲ ዜና መዋእል ኣንበብዎ፥ መርዶክዮስ ከቶ ከም ዘይተኸፍለ ኸዓ ፈለጠ። ሃማን፥ ንመርዶክዮስ ክስቅሎ ክልምን መፂኡ እንተሎ፥ ንሓደ ሰብ ከመይ ገይሩ ኸኽብሮ ተሓተተ — ናይ ባዕሉ ሕልሚ ገለፀ፥ ሽዑ ድማ ንመርዶክዮስ በቲ ኣደባባይ እናኣወጀ ኽመርሖ ተገደደ። ስድራ ቤቱ ጥፍኣቱ ይመፅእ ከም ዘሎ ረአያ።

ምዕራፍ 6።

በታ ለይቲ እቲኣ ድቃስ ካብ ንጉስ ጠፍአ፤ መፅሓፍ ዝኽሪ፥ ነቲ ዜና መዋእል፥ ከምፅእዎ ኣዘዘ፤ ኣብ ቅድሚ ንጉስ ድማ ኣንበብዎ። መርዶክዮስ ብዛዕባ ቢግታናን ተረሽን፥ ክልተ ኻብቶም ድርኵዂት ዝሕልዉ ስሉባት ንጉስ፥ ነቶም ንንጉስ ኣሃሽዌሮስ ክቐትልዎ ዝደለዩ፥ ከም ዝነገሮ ተፃሒፉ ተረኽበ። ንጉስ ድማ “መርዶክዮስ በዙይ እንታይ ክብርን ዕቤትን ተቐቢሉ?” በለ። እቶም ዘገልግልዎ ኣገልገልቱ ኸዓ “ገለ እኳ ኣይተገብረሉን” ኢሎም መለሱ።

ንጉስ ድማ “ኣብ ኣፀድ መን ኣሎ?” በለ። ሃማን ከዓ ነቲ ዘዳለዎ ዕንፀይቲ ንመርዶክዮስ ክሰቕለሉ ክልምኖ፥ ናብ ናይ ወፃኢ ኣፀድ ቤተ መንግስቲ ኣትዩ ነበረ።

ኣገልገልቲ ንጉስ ድማ “እንሆ፥ ሃማን ኣብ ኣፀድ ደው ኢሉ ኣሎ” በልዎ። ንጉስ ከዓ “ናብዙይ የእትውዎ” በለ።

ሃማን ድማ ኣተወ። ንጉስ ከዓ “ነቲ ንጉስ ከኽብሮ ዝፈቱ ሰብ እንታይ ክግበረሉ ይግባእ?” በሎ። ሃማን ድማ ብልቡ “ካባይ ንላዕሊ ንጉስ ከኽብሮ ዝፈቱ መን ኣሎ?” ኢሉ ሓሰበ።

ሃማን ድማ ንጉስ ከምዙይ በሎ፦ “ነቲ ንጉስ ከኽብሮ ዝፈቱ ሰብ፥ ንጉስ ዝተኸድኖ ናይ መንግስቲ ክዳን፥ ንጉስ ዝተቐመጦ ፈረስ፥ ኣብ ርእሱ ዝግበር ናይ መንግስቲ ኣኽሊልን የምፅኡ፤ ነቲ ክዳንን ፈረስን ድማ ንሓደ ኻብቶም ክቡራት ሹመኛታት ንጉስ ይወሃብ፤ ነቲ ንጉስ ከኽብሮ ዝፈቱ ሰብ ድማ ኣልብስዎ፤ ኣብ ፈረስ ኣቐሚጦም ብኣደባባይ ከተማ የዛውርዎ፤ ኣብ ቅድሚኡ ኸዓ ‘ነቲ ንጉስ ከኽብሮ ዝፈቱ ሰብ ከምዙይ ይግበረሉ!’ ኢሎም ይኣውጁ።”

ንጉስ ድማ ንሃማን “ተሎ በል፥ ከምቲ ዝበልካዮ ነቲ ክዳንን ፈረስን ወሲድካ፥ ነቲ ኣብ ደገ ንጉስ ተቐሚጡ ዘሎ መርዶክዮስ ኣይሁዳዊ ድማ ከምኡ ግበረሉ፤ ካብቲ ዝበልካዮ ገለ እኳ ኣይተትርፍ” በሎ።

ሃማን ድማ ነቲ ክዳንን ፈረስን ወሲዱ፥ ንመርዶክዮስ ኣልቢሱ፥ ብኣደባባይ ከተማ ብፈረስ ኣዛወሮ፤ ኣብ ቅድሚኡ ኸዓ “ነቲ ንጉስ ከኽብሮ ዝፈቱ ሰብ ከምዙይ ይግበረሉ” እናበለ ፀውዐ።

ድሕሪዙይ መርዶክዮስ ናብ ደገ ንጉስ ተመለሰ፤ ሃማን ግና እናሓዘነ ርእሱ ተጐልቢቡ ናብ ቤቱ ቐልጢፉ ከደ። ሃማን ድማ ንሰበይቱ ዘረሽን ንዅሎም ፈተውቱን እቲ ዝኾነ ዅሉ ነገሮም። እቶም መኻርቱን ሰበይቱ ዘረሽን ድማ “እዝ ኣብ ቅድሚኡ ክትወድቕ ዝጀመርካ መርዶክዮስ ኣይሁዳዊ ካብ ኮነ፥ ክትስዕሮ ኣይትኽእልን ኢኻ፤ ብርግፅ ኣብ ቅድሚኡ ክትወድቕ ኢኻ” በልዎ። ምስኡ ገና ክዛረቡ እንተለዉ፥ ስሉባት ንጉስ መፁ፤ ንሃማን ድማ ናብቲ ኣስቴር ዘዳለወቶ ድግስ ቀልጢፎም ወሰድዎ።