ಎಸ್ತೇರಳು 5 FHB Father's Heart Bible™

5 ¹ಮೂರನೆಯ ದಿನ ಎಸ್ತೇರಳು ರಾಜವಸ್ತ್ರಗಳನ್ನು ಧರಿಸಿ, ಅರಮನೆಯ ಒಳಗಣ ಅಂಗಳದಲ್ಲಿ ಅರಸನ ಮಂದಿರದ ಎದುರಾಗಿ ನಿಂತಳು. ಅರಸನು ಮಂದಿರದಲ್ಲಿ ಅರಮನೆಯ ಪ್ರವೇಶದ್ವಾರದ ಎದುರಾಗಿ ತನ್ನ ರಾಜಸಿಂಹಾಸನದ ಮೇಲೆ ಕುಳಿತಿದ್ದನು. ²ಅಂಗಳದಲ್ಲಿ ನಿಂತಿದ್ದ ರಾಣಿ ಎಸ್ತೇರಳನ್ನು ಅರಸನು ಕಂಡಾಗ, ಆಕೆಗೆ ಅವನ ಕೃಪೆ ದೊರೆಯಿತು; ಅವನು ತನ್ನ ಕೈಯಲ್ಲಿದ್ದ ಚಿನ್ನದ ರಾಜದಂಡವನ್ನು ಚಾಚಿದನು. ಆಕೆ ಹತ್ತಿರ ಬಂದು ಅದರ ತುದಿಯನ್ನು ಮುಟ್ಟಿದಳು.

³ಅರಸನು, “ರಾಣಿ ಎಸ್ತೇರಳೇ, ಏನಾಯಿತು? ನಿನ್ನ ಬೇಡಿಕೆ ಏನು? ಅರ್ಧ ರಾಜ್ಯದ ವರೆಗೂ ನಿನಗೆ ಕೊಡಲ್ಪಡುವುದು” ಎಂದು ಕೇಳಿದನು.

⁴ಎಸ್ತೇರಳು, “ಅರಸನಿಗೆ ಒಳ್ಳೆಯದೆನಿಸಿದರೆ, ನಾನು ಸಿದ್ಧಪಡಿಸಿದ ಔತಣಕ್ಕೆ ಈ ದಿನ ಅರಸನೂ ಹಾಮಾನನೂ ಬರಲಿ” ಎಂದಳು.

⁵ಅರಸನು, “ಎಸ್ತೇರಳು ಕೇಳಿದಂತೆ ಮಾಡಲು ಹಾಮಾನನನ್ನು ಬೇಗ ಕರೆತನ್ನಿ” ಎಂದನು. ಎಸ್ತೇರಳು ಸಿದ್ಧಪಡಿಸಿದ ಔತಣಕ್ಕೆ ಅರಸನೂ ಹಾಮಾನನೂ ಬಂದರು.

⁶ದ್ರಾಕ್ಷಾರಸ ಕುಡಿಯುತ್ತಿದ್ದಾಗ ಅರಸನು, “ಎಸ್ತೇರಳೇ, ನಿನ್ನ ಬಿನ್ನಹ ಏನು? ಅದು ನೆರವೇರಿಸಲ್ಪಡುವುದು. ನಿನ್ನ ಬೇಡಿಕೆ ಏನು? ಅರ್ಧ ರಾಜ್ಯವಾದರೂ ಸರಿ, ಅದು ನಿನ್ನದೇ” ಎಂದು ಕೇಳಿದನು.

⁷ಎಸ್ತೇರಳು ಹೀಗೆ ಉತ್ತರಕೊಟ್ಟಳು: “ನನ್ನ ಬಿನ್ನಹವೂ ನನ್ನ ಬೇಡಿಕೆಯೂ ಇದೇ: ⁸ಅರಸನ ಕೃಪೆ ನನಗೆ ದೊರೆತಿದ್ದರೆ, ನನ್ನ ಬಿನ್ನಹವನ್ನು ಅನುಗ್ರಹಿಸುವುದೂ ನನ್ನ ಬೇಡಿಕೆಯನ್ನು ನೆರವೇರಿಸುವುದೂ ಅರಸನಿಗೆ ಒಳ್ಳೆಯದೆನಿಸಿದರೆ, ನಾನು ಅವರಿಗಾಗಿ ಸಿದ್ಧಪಡಿಸುವ ಔತಣಕ್ಕೆ ಅರಸನೂ ಹಾಮಾನನೂ ಬರಲಿ. ನಾಳೆ ಅರಸನು ಹೇಳಿದಂತೆ ನಾನು ಮಾಡುತ್ತೇನೆ.”

ಹಾಮಾನನ ಕೋಪ ಮೊರ್ದೆಕೈಯ ಮೇಲೆ ತಿರುಗುವುದು

⁹ಆ ದಿನ ಹಾಮಾನನು ಸಂತೋಷದಿಂದಲೂ ಹರ್ಷದಿಂದಲೂ ಹೊರಟನು. ಆದರೆ ಅರಸನ ಬಾಗಿಲಲ್ಲಿದ್ದ ಮೊರ್ದೆಕೈ ತನ್ನ ಎದುರು ಏಳದೆಯೂ ನಡುಗದೆಯೂ ಇದ್ದದ್ದನ್ನು ಕಂಡು, ಹಾಮಾನನು ಮೊರ್ದೆಕೈಯ ಮೇಲೆ ರೋಷಗೊಂಡನು. ¹⁰ಆದರೂ ಹಾಮಾನನು ತನ್ನನ್ನು ತಡೆದುಕೊಂಡು ಮನೆಗೆ ಹೋದನು. ಅವನು ತನ್ನ ಸ್ನೇಹಿತರನ್ನೂ ತನ್ನ ಹೆಂಡತಿ ಜೆರೆಷಳನ್ನೂ ಕರೆಸಿದನು, ¹¹ಹಾಮಾನನು ಅವರಿಗೆ ತನ್ನ ಐಶ್ವರ್ಯದ ವೈಭವವನ್ನೂ ತನ್ನ ಅನೇಕ ಗಂಡುಮಕ್ಕಳನ್ನೂ, ಅರಸನು ತನ್ನನ್ನು ಅರಸನ ಅಧಿಕಾರಿಗಳಿಗಿಂತಲೂ ಸೇವಕರಿಗಿಂತಲೂ ಹೇಗೆ ಗೌರವಿಸಿ ಉನ್ನತಕ್ಕೇರಿಸಿದನೆಂಬುದನ್ನೂ ವಿವರಿಸಿದನು.

¹²ಹಾಮಾನನು ಮುಂದುವರಿಸಿ, “ಇಷ್ಟೇ ಅಲ್ಲ; ರಾಣಿ ಎಸ್ತೇರಳು ತಾನು ಮಾಡಿದ ಔತಣಕ್ಕೆ ಅರಸನೊಂದಿಗೆ ನನ್ನನ್ನು ಮಾತ್ರ ಆಹ್ವಾನಿಸಿದಳು; ನಾಳೆಯೂ ಅರಸನೊಂದಿಗೆ ನನಗೆ ಆಹ್ವಾನವಿದೆ. ¹³ಆದರೆ ಅರಸನ ಬಾಗಿಲಲ್ಲಿ ಕುಳಿತಿರುವ ಯೆಹೂದ್ಯನಾದ ಮೊರ್ದೆಕೈಯನ್ನು ನಾನು ಕಾಣುವಾಗೆಲ್ಲಾ ಇದೆಲ್ಲವೂ ನನಗೆ ಯಾವ ಪ್ರಯೋಜನವನ್ನೂ ಕೊಡುವುದಿಲ್ಲ” ಎಂದನು.

¹⁴ಅವನ ಹೆಂಡತಿ ಜೆರೆಷಳೂ ಅವನ ಸ್ನೇಹಿತರೆಲ್ಲರೂ, “ಎಪ್ಪತ್ತೈದು ಅಡಿ ಎತ್ತರದ ಕಂಬವೊಂದನ್ನು ಕಟ್ಟಿಸು. ಬೆಳಿಗ್ಗೆ ಅದಕ್ಕೆ ಮೊರ್ದೆಕೈಯನ್ನು ನೇತುಹಾಕುವಂತೆ ಅರಸನನ್ನು ಕೇಳಿಕೋ. ಬಳಿಕ ಸಂತೋಷದಿಂದ ಅರಸನೊಂದಿಗೆ ಔತಣಕ್ಕೆ ಹೋಗು” ಎಂದರು. ಇದು ಹಾಮಾನನಿಗೆ ಹಿಡಿಸಿತು; ಅವನು ಆ ಕಂಬವನ್ನು ಕಟ್ಟಿಸಿದನು.