Estere Asendera ku Mpando wa Mambo
Estere asavala pyakuvala pyace pya umambo mbakhala m'bwalo ya nkati mwakukhonda kucemerwa; ndodo ya umambo ya ouro isatambasulwa, mbapaswa gawo ya umambo. Iye asaphemba basi phwando, mbadzaphemba ya ciwiri. Hamani asabuluka akukomerwa kakamwe, asaipirwa na Mordhekai, mbamanga nsanamira.
5 1Na tenepo, pa ntsiku yacitatu, Estere abvala nguwo za umambo mbalimira n'kati mwa bwalo ya nyumba ya umambo, mbayang'ana ku nyumba ikulu ya mambo. Mambo akhakhala pa mpando wace wa umambo n'kati mwa nyumba ikulu, mbayang'ana nsuwo wa nyumba ya umambo. 2Mambo pidaona iye Estere, mambo wankazi, akhalimira m'bwalo, Estere agumana nkombo pamaso pace, natenepa mambo athambarusa ndodo yace yaoro ikhali m'manja mwace. Estere asendera cifupi mbakhuya nsonga wayo.
3Mambo abvundza tenepa: “Ndi ciyani, Estere, mambo wankazi? Usafuna kuphemba ciyani? Napaswa iwe mpaka hafu ya umambo wanga.”
4Estere alonga tenepa: “Mambo mungakomerwa, bwerani lero pabodzi na Hamani ku phwando idakhunganya ine.”
5Mambo alonga tenepa: “Bweresani Hamani mwakucimbiza toera ticite ninga mudaphemba Estere.” Na tenepo mambo pabodzi na Hamani aenda ku phwando idakhunganya Estere.
6Mukumwa vinyu, mambo abvundza tenepa: “Ciphembo cako ndi ciyani, Estere? Cinapaswa iwe. Pontho usaphemba ciyani? Ngakhala hafu ya umambo — ndi yako.”
7Estere atawira tenepa: “Ciphembo canga na kuphemba kwanga ndi iyi: 8Ndingakhala ndagumana nkombo pamaso pa mambo, na mungakomerwa kupereka cidaphemba ine na kukwanirisa kuphemba kwanga, bwerani imwe mambo pabodzi na Hamani ku phwando inafuna kukhunganyira ine. Mangwana ndinacita ninga munalonga imwe mambo.”
Ukali wa Hamani Usandukira Mordhekai
9Na tenepo, pa ntsiku ineyi, Hamani abuluka wakutsandzaya na wakukomerwa muntima. Mbwenye pidaona iye Mordhekai pa nsuwo wa mambo, nee alimira nee atetemera pamaso pace, Hamani adzala na ukali kuna Mordhekai. 10Ngakhale tenepo, Hamani akoma ntima wace mbaenda ku nyumba kwace. Atumiza anthu toera kucemera axamwali ace na nkazi wace Zerexi, 11Hamani aapanga umbiri wa mpfuma zace zizinji, ana ace azinji, na kuti mambo ankuzisa tani mbam'thimizira padzulu pa akulu na atumiki a mambo.
12Hamani athimiza tenepa: “Nee basi penepa tayu. Estere, mambo wankazi, andicemera ine ekha basi pabodzi na mambo ku phwando yace, pontho ndacemerwa pontho mangwana pabodzi na mambo. 13Mbwenye pyonsene pyenepi nkhabe kundiphedza cinthu n'dzidzi onsene ndingaona Mordhekai, Nyajuda, akhala pa nsuwo wa mambo.”
14Nkazi wace Zerexi pabodzi na axamwali ace onsene alonga tenepa: “Lamula kuti amange muti wakulapha wa mapazi makumanomwe na maxanu. Namacibese, phemba mambo toera amanikwe Mordhekai pa muti unoyu. Buluka penepo uende pabodzi na mambo ku phwando, wakutsandzaya.” Hamani akomerwa na mafala anewa mbalamula kuti umangwe muti.
