Esta Jekwuru Ocheeze Eze

Esta yikwasịrị uwe eze ya wee guzo nʼogige nke ime na-akpọghị ya; eze setịpụrụ mkpanaka ọlaedo, e nyekwara ya ọkara alaeze. Ọ rịọrọ naanị oriri, emesịa nke abụọ. Heman pụrụ na-aṅụrị ọṅụ, Mọdekaị kpasuru ya iwe, o wee rụọ osisi.

Isi 5.

Nʼụbọchị nke atọ, Esta yiri uwe eze guzoro nʼogige dị nʼime ụlọeze, chere ụlọnnukwu eze ihu. Eze nọdụ ala nʼocheeze ya nʼụlọnnukwu ahụ, chere ọnụ ụzọ mbata ụlọeze ihu. Mgbe eze hụrụ Esta bụ nwunye eze ka o guzo nʼogige ahụ, ọ natara amara nʼaka ya, o setịpụrụ mkpara ọlaedo dị ya nʼaka. Esta bịaruru nso metụ ọnụ ya aka.

Eze jụrụ sị, “Gịnị na-eme, Esta nwunye eze? Gịnị ka ị na-arịọ? A ga-enye gị ihe ruo ọkara alaeze a.”

Esta zara sị, “Ọ bụrụ na ọ masịrị eze, ya na Haman bịa taa nʼoriri m kwadebere.”

Eze sịrị, “Kpọọ Haman ọsọọsọ ka e mee ihe Esta rịọrọ.” Eze na Haman bịara nʼoriri ahụ Esta kwadebere.

Ka ha na-aṅụ mmanya, eze jụrụ sị, “Gịnị bụ arịrịọ gị, Esta? A ga-emere gị ya. Gịnị bụkwa ihe ị chọrọ? Ọ bụladị ọkara alaeze a, ọ bụ nke gị.”

Esta zara sị, “Arịrịọ m na ihe m chọrọ bụ nke a: Ọ bụrụ na m enwetala amara nʼihu eze, ọ bụrụkwa na ọ masịrị eze imere m arịrịọ m na imezu ihe m chọrọ, ka eze na Haman bịa nʼoriri m ga-akwadebere ha. Echi, aga m eme ihe eze kwuru.”

Oke Iwe Haman Dakwasịrị Mọdekaị

Haman jiri obi ụtọ na aṅụrị pụọ nʼụbọchị ahụ. Ma mgbe ọ hụrụ Mọdekaị nʼọnụ ụzọ ama eze, na o biliteghị ma maakwa jijiji nʼihu ya, iwe were Haman nke ukwuu megide Mọdekaị. Ma Haman jidere onwe ya laa nʼụlọ. O zipụrụ ozi kpọọ ndị enyi ya na Zeresh bụ nwunye ya, Haman gwara ha banyere ebube akụ na ụba ya, ọtụtụ ụmụ ndị ikom ya, na otú eze si sọpụrụ ya bulie ya elu karịa ndịisi na ndị ohu eze niile.

Haman gara nʼihu sị, “Nke ahụ abụghịkwa ya niile. Esta nwunye eze akpọghị onye ọzọ ma ọ bụghị naanị mụ na eze nʼoriri ya, a kpọkwala m ọzọ echi mụ na eze. Ma ihe ndị a niile abaghị m uru ọ bụla mgbe ọ bụla m hụrụ Mọdekaị onye Juu ka ọ nọdụrụ ala nʼọnụ ụzọ ama eze.”

Zeresh bụ nwunye ya na ndị enyi ya niile sịrị, “Mee ka e wuo osisi guzo ọtọ, nke ịdị elu ya ruru ụkwụ iri asaa na ise. Nʼụtụtụ, rịọ eze ka a kwụba Mọdekaị nʼelu ya. Mgbe ahụ, soro eze jee nʼoriri ahụ nʼobi ụtọ.” Nke a masịrị Haman, o mekwara ka e wuo osisi ahụ.