Esta Wubwesukidi ku Kiti kya Luyalu kya Kyamvu
Esta wávwata miledi mya luyalu amana wátelama muna kyanzala kya kati konda kubokulu; koka dya wolu dyálubuka kwena yandi, amana kyamvu wásila kumuheka ata kyati kya kipfumu. Wálomba kaka mukinzi, kunima wukwawu wa zodi. Hamani wákatuka yi kyesi, wáfunga khabu kikuma kya Modekayi, amana wátunga mutsiku wa kuzangana.
5 1Muna kilumbu kya tatu, Esta wávwata miledi mya luyalu amana wátelama muna kyanzala kya kati kya nganda ya kyamvu, kuna thwala ya suku dya nganda ya kyamvu. Kyamvu wázakala hana kiti kyandi kya luyalu muna suku, kuna thwala ya mwelu wa nganda. 2Muna tangwa kyamvu kámona Esta, pfumu wa mukhetu, watelama muna kyanzala, Esta wámona tsambu kwena yandi, amana kyamvu wátambika koka dya wolu dina dyákala muna koku dyandi. Esta wábwesuka amana wásimba tsongi ya koka.
3Kyamvu wuzimbudi: «Biki bya mbi, Esta pfumu wa mukhetu? Biki wuzodi lomba? Kina wandómba, kakuhekakya keti kyati kya kipfumu.»
4Esta wuzimbudi: «Yuka ni kyamvu kasephidisa, yandi yi Hamani bakwisa lelu ku mukinzi wuna yidikila.»
5Kyamvu wuzimbudi: «Bongenu Hamani yi tswatsu hanga bwosu buna Esta kalombidi.» Amana kyamvu yi Hamani bakwísa ku mukinzi wuna Esta kayidikidi.
6Muna kunwa vinu, kyamvu wuzimbudi: «Biki kilomba kyaku, Esta? Kakuhekakya. Amana biki wandómba? Ata kyati kya kipfumu, kyenina kya ngeyi.»
7Esta wávutula: «Kilomba kyama yi kina yandomba kyenina kyaki: 8Yuka ni yamona tsambu kwena kyamvu, amana busephidisi kwena yandi mu kuheka kilomba kyama yi mu kulungisa kina yandomba, kyamvu yi Hamani bakwisa ku mukinzi wuna yíbayidikila. Mbasi yimúhanga bwosu buna kyamvu kazimbula.»
Khabu za Hamani Zibaluka kwena Modekayi
9Hamani wákatuka muna kilumbu meni kina yi kyesi yi kusangwala. Kaasi mu kumona Modekayi kuna mwelu wa kyamvu, wuna kakalaku telama kondilo zakama ku thwala yandi, khabu zámukwata kikuma kya Modekayi. 10Kaasi Hamani wádisimba amana wávutuka ku nzu yandi. Wátuma benda musanda banduku bandi yi mukhetu wandi Zelesi, 11Hamani wábazimbwala mitsyenzya mya kimvwama kyandi, bana bandi bahika, amana bwosu kyamvu kámuzitisa amana kámuheka luyalu ku thandu ya basadi yi baphumbulu ba kyamvu.
12«Amana ka mamana ku,» Hamani wáyika hika. «Esta, pfumu wa mukhetu, wátedisa kaka meni yi kyamvu ku mukinzi wandi, amana mbasi batedisi meni hika yi kyamvu. 13Kaasi mamana moosu makadilaku keti muluta tangwa yosu yikumona Modekayi Muyuta, wuna wazakala kuna mwelu wa kyamvu.»
14Mukhetu wandi Zelesi yi banduku bandi boosu bázimbula: «Yambula batunga nti wuna wazangama mikondi makumi tsambwadi yi tanu. Muna suka, lomba kwena kyamvu hanga bakhoka Modekayi hana wawu. Amana wenda yi kyamvu ku mukinzi yi kyesi.» Dyambu dina dyásephidisa Hamani, amana wátungisa nti wuna.
