Ester 5

5 ¹Sa ikatulo ka adlaw, nagbisti si Ester ug harianong mga bisti ug mitindog sa sulod nga hawanan sa palasyo, nga nag-atubang sa hawanan sa hari. Naglingkod ang hari sa iyang harianong trono didto sa hawanan, nga nag-atubang sa ganghaan sa palasyo. ²Sa dihang nakita sa hari si Rayna Ester nga nagtindog sa hawanan, nakakaplag siya ug pabor diha kaniya, ug gitunol sa hari ang bulawang setro nga anaa sa iyang kamot. Miduol si Ester ug mihikap sa tumoy niini.

³Nangutana ang hari, “Unsay suliran mo, Rayna Ester? Unsay imong gipangayo? Bisan ang katunga sa gingharian igahatag kanimo.”

⁴Mitubag si Ester, “Kon makapahimuot kini sa hari, moanhi unta siya ug si Haman karong adlawa sa kombira nga akong giandam.”

⁵“Dad-a dayon si Haman aron matuman ang gipangayo ni Ester,” miingon ang hari. Ug miadto ang hari ug si Haman sa kombira nga giandam ni Ester.

⁶Samtang nag-inom ug bino, nangutana ang hari, “Unsay imong gipangayo, Ester? Igahatag kini. Ug unsay imong gipangandoy? Bisan ang katunga sa gingharian—maimo kini.”

⁷Mitubag si Ester, “Mao kini ang akong gipangayo ug gipangandoy: ⁸Kon nakakaplag ako ug pabor diha sa hari, ug makapahimuot kaniya ang paghatag sa akong gipangayo ug ang pagtuman sa akong gipangandoy, moanhi unta ang hari ug si Haman sa kombira nga akong andamon alang kanila. Ugma buhaton ko ang gisulti sa hari.”

Misilaob ang Kasuko ni Haman Batok kang Mardoqueo

⁹Mibiya si Haman niadtong adlawa nga malipayon ug masadya. Apan sa pagkakita niya kang Mardoqueo didto sa ganghaan sa hari nga wala motindog ni mangurog sa iyang atubangan, misilaob ang kasuko ni Haman batok kang Mardoqueo. ¹⁰Bisan pa niini, nagpugong si Haman sa iyang kaugalingon ug mipauli. Gipakuha niya ang iyang mga higala ug ang iyang asawa nga si Zeres, ¹¹ug gisuginlan sila ni Haman sa katahom sa iyang bahandi, sa iyang daghang mga anak nga lalaki, ug kon giunsa siya pagpasidungog ug pagpataas sa hari labaw sa mga opisyal ug mga sulugoon sa hari.

¹²“Ug dili lang kana,” midugang si Haman. “Si Rayna Ester nag-imbitar lamang kanako uban sa hari sa iyang kombira, ug giimbitar ako pag-usab ugma uban sa hari. ¹³Apan kining tanan walay kapuslanan kanako samtang makita ko si Mardoqueo nga Judio nga naglingkod sa ganghaan sa hari.”

¹⁴Miingon ang iyang asawa nga si Zeres ug ang tanan niyang mga higala, “Pabuhata silag bitayanan nga setenta y singko ka pye ang gitas-on. Sa buntag, hangyoa ang hari nga bitayon si Mardoqueo niini. Unya uban sa hari pag-adto sa kombira nga malipayon.” Nakapahimuot kini kang Haman, ug gipabuhat niya ang bitayanan.