എസ്ഥേർ 5 FHB Father's Heart Bible™

5 ¹മൂന്നാം ദിവസം എസ്ഥേർ രാജകീയവസ്ത്രം ധരിച്ച് രാജാവിന്റെ മണ്ഡപത്തിനു നേരേ കൊട്ടാരത്തിന്റെ അകത്തെ അങ്കണത്തിൽ നിന്നു. രാജാവ് കൊട്ടാരവാതിലിനു നേരേ മണ്ഡപത്തിൽ തന്റെ രാജസിംഹാസനത്തിൽ ഇരിക്കുകയായിരുന്നു. ²എസ്ഥേർ രാജ്ഞി അങ്കണത്തിൽ നിൽക്കുന്നതു രാജാവു കണ്ടപ്പോൾ അവൾക്ക് അദ്ദേഹത്തിന്റെ പ്രീതി ലഭിച്ചു; അദ്ദേഹം തന്റെ കൈയിലുള്ള പൊൻചെങ്കോൽ അവൾക്കുനേരേ നീട്ടി. അവൾ അടുത്തുചെന്ന് അതിന്റെ അറ്റം തൊട്ടു.

³രാജാവു ചോദിച്ചു: “എസ്ഥേർ രാജ്ഞീ, എന്താണു വിഷമം? എന്താണു നിന്റെ അപേക്ഷ? രാജ്യത്തിന്റെ പകുതിവരെ നിനക്കു നല്കപ്പെടും.”

⁴എസ്ഥേർ പറഞ്ഞു: “രാജാവിനു പ്രസാദമെങ്കിൽ ഞാൻ ഒരുക്കിയിരിക്കുന്ന വിരുന്നിന് അങ്ങും ഹാമാനും ഇന്നു വരണമേ.”

⁵“എസ്ഥേർ പറഞ്ഞതുപോലെ ചെയ്യേണ്ടതിന് ഹാമാനെ വേഗം കൊണ്ടുവരുവിൻ” എന്നു രാജാവു പറഞ്ഞു. എസ്ഥേർ ഒരുക്കിയ വിരുന്നിന് രാജാവും ഹാമാനും വന്നു.

⁶വീഞ്ഞു കുടിക്കുമ്പോൾ രാജാവു ചോദിച്ചു: “എസ്ഥേർ, എന്താണു നിന്റെ അപേക്ഷ? അതു നല്കപ്പെടും. എന്താണു നിന്റെ ആവശ്യം? രാജ്യത്തിന്റെ പകുതിയാണെങ്കിലും അതു നിന്റേതാകും.”

⁷എസ്ഥേർ മറുപടി പറഞ്ഞു: “എന്റെ അപേക്ഷയും ആവശ്യവും ഇതാണ്: ⁸രാജാവിന്റെ പ്രീതി എനിക്കു ലഭിച്ചിട്ടുണ്ടെങ്കിൽ, എന്റെ അപേക്ഷ അനുവദിക്കുന്നതും ആവശ്യം നിറവേറ്റുന്നതും അങ്ങേക്കു പ്രസാദമെങ്കിൽ, ഞാൻ അവർക്കുവേണ്ടി ഒരുക്കുന്ന വിരുന്നിന് രാജാവും ഹാമാനും വരണമേ. നാളെ രാജാവു പറയുന്നതുപോലെ ഞാൻ ചെയ്തുകൊള്ളാം.”

ഹാമാന്റെ ക്രോധം മൊർദെഖായിക്കെതിരേ തിരിയുന്നു

⁹ആ ദിവസം ഹാമാൻ സന്തുഷ്ടനും ആനന്ദഭരിതനുമായി പുറത്തുപോയി. എന്നാൽ രാജകവാടത്തിൽ മൊർദെഖായി തന്റെ മുൻപിൽ എഴുന്നേൽക്കുകയോ വിറയ്ക്കുകയോ ചെയ്യാത്തതു കണ്ടപ്പോൾ ഹാമാൻ മൊർദെഖായിയോടു ക്രോധംകൊണ്ടു. ¹⁰എങ്കിലും ഹാമാൻ തന്നെത്താൻ അടക്കിക്കൊണ്ടു വീട്ടിലേക്കു പോയി. അവൻ തന്റെ സ്നേഹിതന്മാരെയും ഭാര്യ സേരെശിനെയും വിളിപ്പിച്ചു; ¹¹തന്റെ സമ്പത്തിന്റെ മഹത്ത്വവും പുത്രന്മാരുടെ ബഹുലതയും രാജാവ് തന്നെ എങ്ങനെ ബഹുമാനിച്ച് രാജാവിന്റെ പ്രഭുക്കന്മാർക്കും ഭൃത്യന്മാർക്കും മീതേ ഉയർത്തി എന്നതും ഹാമാൻ അവരോടു വിവരിച്ചു.

¹²“ഇതു മാത്രമല്ല,” ഹാമാൻ കൂട്ടിച്ചേർത്തു: “എസ്ഥേർ രാജ്ഞി ഒരുക്കിയ വിരുന്നിന് രാജാവിനോടൊപ്പം എന്നെ മാത്രമേ ക്ഷണിച്ചുള്ളൂ; നാളെയും രാജാവിനോടൊപ്പം എന്നെ വീണ്ടും ക്ഷണിച്ചിട്ടുണ്ട്. ¹³എങ്കിലും യെഹൂദനായ മൊർദെഖായി രാജകവാടത്തിൽ ഇരിക്കുന്നതു കാണുമ്പോഴൊക്കെ ഇതെല്ലാം എനിക്കു ഒട്ടും പ്രയോജനമില്ല.”

¹⁴അവന്റെ ഭാര്യ സേരെശും സ്നേഹിതന്മാരെല്ലാവരും പറഞ്ഞു: “എഴുപത്തഞ്ചടി ഉയരമുള്ള ഒരു കഴുമരം പണിയിക്കുക. രാവിലെ മൊർദെഖായിയെ അതിന്മേൽ തൂക്കിക്കൊല്ലാൻ രാജാവിനോട് അപേക്ഷിക്കുക. പിന്നെ സന്തുഷ്ടനായി രാജാവിനോടൊപ്പം വിരുന്നിനു പോകുക.” ഹാമാന് ഇതു ബോധിച്ചു; അവൻ ആ കഴുമരം പണിയിച്ചു.