اِستر د بادشاه د تخت طرف ته راځى

استر شاهي جامې اغوندي او بې بلنې په داخلي انګړ کې ودرېږي؛ طلايي عصا ور اوږدېږي، او هغې ته د سلطنت نیمایي وړاندې کېږي. هغه یوازې یوه مېلمستیا غواړي، بیا دوهمه. هامان په ډېره خوښۍ ځي، د مردخای له امله په قهر کېږي، او یو دار جوړوي.

څپرکی 5.

په دريم ورځ، اِستر شاهى جامې واغوستلې او د محل دننه آنګن کښې، د بادشاه د دربار په مخ کښې ودرېده. بادشاه په دربار کښې په خپل شاهى تخت باندې، د محل د دروازې په مخ کښې ناست وو. کله چې بادشاه ملکه اِستر په آنګن کښې ولاړه وليده، نو هغه د هغۀ په نظر کښې مقبوله شوه، او هغۀ خپل په لاس کښې سره د سرو زرو امسا ورته اوږده کړه. هغه ورنزدے شوه او د هغې سر يې ولمس کړو.

بادشاه تپوس وکړو، ”ملکه اِستر، څۀ خبره ده؟ ستا څۀ غوښتنه ده؟ تر نيمې بادشاهۍ پورې به درکړې شى.“

اِستر ووئيل، ”کۀ بادشاه خوشحاله وى، نو دے دې او هامان دې نن هغه ضيافت ته راشى چې ما تيار کړے دے.“

بادشاه ووئيل چې، ”هامان ژر راولئ، ترڅو چې د اِستر د غوښتنې مطابق وشى.“ نو بادشاه او هامان هغه ضيافت ته راغلل چې اِستر تيار کړے وو.

د مَيو پر وخت بادشاه تپوس وکړو، ”اِستر، ستا څۀ عرض دے؟ منلے به شى. او ستا څۀ غوښتنه ده؟ کۀ نيمه بادشاهى هم وى، ستا ده.“

اِستر جواب ورکړو، ”زما عرض او زما غوښتنه دا ده: کۀ زۀ د بادشاه په نظر کښې مقبوله شوې يم، او کۀ ده ته دا خوښ وى چې زما عرض ومنى او زما غوښتنه پوره کړى، نو بادشاه او هامان دې هغه ضيافت ته راشى چې زۀ به يې د دوئ دپاره تيار کړم. سبا به زۀ د بادشاه د وينا مطابق وکړم.“

د هامان غصه د مردکى په خلاف اوړى

هامان هغه ورځ خوشحاله او خوشاله روان شو. خو کله چې هغۀ مردکى د بادشاه په دروازه کښې وليدو چې نۀ د هغۀ په وړاندې پاڅېدو او نۀ ولړزېدو، نو هامان په مردکى باندې ډېر غصه شو. بيا هم، هامان ځان ونيولو او کور ته لاړو. هغۀ خپل ملګرى او خپله ښځه زرش راوغوښتل، هامان هغوئ ته د خپل مال د شان او شوکت، د خپلو ډېرو زامنو، او د دې خبره وکړه چې بادشاه څنګه هغه عزتمند کړے وو او د بادشاه د عمله او نوکرانو نه يې اوچت کړے وو.

هامان نور هم ووئيل، ”دا هم نۀ دى بس. ملکه اِستر سره د بادشاه يواځې زۀ خپل ضيافت ته راوبللم، او سبا هم زۀ سره د بادشاه بيا راوبللے شوے يم. خو تر څو چې زۀ مردکى يهودى د بادشاه په دروازه کښې ناست وينم، دا ټول ما ته هيڅ فائده نۀ راکوى.“

د هغۀ ښځې زرش او د هغۀ ټولو ملګرو ووئيل، ”دوئ ته ووايه چې پنځۀ اويا فوټه اوچته دار جوړه کړى. سحر بادشاه ته ووايه چې مردکى پرې وځړوى. بيا سره د بادشاه خوشحاله ضيافت ته لاړ شه.“ دا خبره هامان ته خوښه شوه او هغۀ دار جوړه کړه.