Esther Awungawui Wungpamkhongli Nganaimei
Estherna awungva̱wui kachon ngavaida mahokla alungkayāngli nganinga; sinā khānthing ali tāngmi, kala wungram tangkhai ali mira da hāngmi. Ana mang khavai khangarum akhamāng poi, chiwui thili akha luida. Hamanna ringphāda shoka, Mordecaiwui vang malungvāta, kala tārong akha sāi.
5 1Kakathumthang, Estherna awungawui sāri ngavaikhuilaga konungwui alungkayāngli, awungawui kā yangkhangasung nganinga. Awungana kā chiwui alungli awui wungpamkhongli, konungwui khāmong yangkhangasung pama. 2Awungana Awungva̱ Esther alungkayāngli nganingda kathei tharan, awui mangāli Estherna ngahānkhangai ngasāsai, kala awungana awui pāngli khalei sinā khānthing chi tāngkhami. Estherna nganaimeida khanthingwui aton chi sākaza̱.
3Awungana ngahāna, "Nawui kasak khi leihaokhala, Awungva̱ Esther? Nawui pokhangai khi leikhala? Iwui wungram tangkhai eina tangda nali mira."
4Estherna hānga, "Awungana ningyāng ungakha, aja awunga eina Hamanna ina ngarān kahai zātkhāngli rāranu."
5"Estherna kahāng thada sākhavai Hamanli kashap eina khuirālu," da awungana hānga. Chieina awunga eina Hamanna Estherna ngarān kahai zātkhāngli zanga.
6Drakhāra̱ mangda awungana Estherli hāngluishita, "Khi pokhangai leikhala, Esther? Nali chi mira. Kala khi nawui ningkachāng leikhala? Wungram tangkhai eina tangda nawui sāserra."
7Estherna ngahānkai, "Iwui pokhangai kala iwui ningkachāng chi hina: 8Awungawui mangāli ili ngahānkhangai ngasaakha, kala awungali iwui pokhangai mikhavai kala iwui ningkachāng ungshung khavai ningyāng ungakha, awunga eina Hamanna ina aniwui vang ngarāna zātkhāngli rāranu. Akhama awungana kahāng thada ina sāra."
Hamanwui Malungkhavāt Mordecaili Thuingasaka
9Chithang Haman ringphā kala mathāda thuihaowa. Kha Mordecaina awungawui ngaveili awui mangāli mangakarthui kala manganukma kaji theilaga, Haman Mordecailishong malungkhavātna pemhaowa. 10Chithālala, Hamanna khalatta rakkhuida shimli unghaowa. Ana awui ngasotnaobing kala apreiva̱ Zereshli hoi. 11Hamanna athumli awui mirinwui tekhamatei, awui naomayarabing kachungkha, kala kathada awungana ali khayā kachida awungawui wungnaobing kala raobing saikorawuitungli reisang ngasaka kaji hāngchithei.
12"Chitha-ilala," da Hamanna ngaror hānga. "Awungva̱ Estherna awui zātkhāngli awunga eina ili maningla hoi, kala akhama awunga eina ili latluida hohaira. 13Chithālala hi saikora chi ina Jehudipa Mordecai awungawui ngaveili pamda kathei tharan, iwui vang khikha kānkhanā maleimana."
14Apreiva̱ Zeresh kala awui ngasotnao saikorana hānga, "Feet hangshinida phangā sāng tārong akha sāngasaklu. Ngathor, Mordecaili chiwui tungli hokthang khavai awungali polu. Chieina ringphāhaoda awunga eina zātkhāngli zatlu." Hi Hamanli ningyāng ungngasaklaga tārong chi sākhui.
