Esta Ta Kusaci Kursiyin Sarki
Esta ta sa rigunanta na sarauta ta tsaya a farfajiya ta ciki ba tare da gayyata ba; aka miƙa sandan sarauta na zinariya, aka kuma yi mata alkawarin rabin mulkin. Ta roƙi liyafa kawai, sa'an nan ta biyu. Haman ya fita yana murna, Mordekai ya ƙone masa rai, ya kuma kafa gungume.
5 1A rana ta uku, Esta ta sanya tufafin sarauta ta kuma tsaya a cikin filin ciki na fada, tana fuskantar zauren sarki. Sarki yana zaune a kan kursiyinsa na sarauta a cikin zauren, yana fuskantar ƙofar fada. 2Da sarki ya ga Sarauniya Esta tsaye a filin, sai ta sami tagomashi a wurinsa, ya kuma miƙa sandar sarauta ta zinariya da take hannunsa. Sai ta matso ta taɓa kan sandar.
3Sarki ya tambaye ta, “Mene ne, Sarauniya Esta? Me kike roƙo? Za a ba ki har rabin mulki.”
4Esta ta ce, “Idan sarki ya ga dama, bari shi da Haman su zo yau ga liyafar da na shirya.”
5“A kawo Haman da sauri domin a yi yadda Esta ta roƙa,” in ji sarki. Sai sarki da Haman suka zo liyafar da Esta ta shirya.
6Yayinda suke shan ruwan inabi, sarki ya tambaye ta, “Mene ne roƙonki, Esta? Za a yi miki shi. Kuma mene ne bukatarki? Ko da rabin mulki ne—naki ne.”
7Esta ta amsa ta ce, “Roƙona da bukatata kuwa su ne wannan: 8Idan na sami tagomashi a wurin sarki, kuma ya ga dama yă biya roƙona yă kuma cika bukatata, bari sarki da Haman su zo liyafar da zan shirya musu. Gobe kuwa zan yi yadda sarki ya faɗa.”
Fushin Haman Ya Juya a Kan Mordekai
9A ranar nan Haman ya tashi da farin ciki da murna. Amma da ya ga Mordekai a ƙofar sarki bai tashi ba bai kuma yi rawar jiki a gabansa ba, sai Haman ya fusata ƙwarai da Mordekai. 10Duk da haka, Haman ya ƙame kansa ya tafi gida. Ya aika aka kira abokansa da matarsa Zeresh, 11Haman ya ba su labarin darajar arzikinsa, da yawan 'ya'yansa maza, da yadda sarki ya girmama shi ya kuma ɗaukaka shi bisa manyan sarki da fadawa.
12“Ban da haka ma,” Haman ya ƙara da cewa, “Sarauniya Esta ba ta gayyaci kowa ba sai ni kaɗai tare da sarki zuwa liyafarta, kuma an sāke gayyatata gobe tare da sarki. 13“Duk da haka, dukan wannan ba ya amfane ni da kome a duk sa'ad da na ga Mordekai mutumin Yahuda zaune a ƙofar sarki.”
14Matarsa Zeresh da dukan abokansa suka ce masa, “A sa a kafa gori mai tsawon ƙafa saba'in da biyar. Da safe, ka roƙi sarki a rataye Mordekai a kansa. Sa'an nan ka tafi tare da sarki zuwa liyafar da farin ciki.” Haman ya ji daɗin wannan shawara, sai ya sa aka kafa gorin.