Esteri 5

5 ¹Ní ọjọ́ kẹta, Esteri wọ aṣọ ìgúnwà, ó sì dúró ní àgbàlá inú ààfin, ó kọjú sí gbọ̀ngàn ọba. Ọba jókòó lórí ìtẹ́ aládé rẹ̀ nínú gbọ̀ngàn náà, ó kọjú sí ẹnu-ọ̀nà ààfin. ²Nígbà tí ọba rí Esteri ayaba tí ó dúró ní àgbàlá, ó rí ojú rere lọ́dọ̀ rẹ̀, ó sì na ọ̀pá aládé wúrà tí ó wà ní ọwọ́ rẹ̀ síta. Esteri súnmọ́ tòsí, ó sì fọwọ́ kan orí ọ̀pá náà.

³Ọba béèrè pé, “Kí ló dé, Esteri ayaba? Kí ni ìbéèrè rẹ? A ó fi fún ọ, àní ìdajì ìjọba náà.”

⁴Esteri wí pé, “Bí ó bá wu ọba, kí ọba àti Hamani wá sí àsè tí mo ti pèsè lónìí.”

⁵Ọba wí pé, “Ẹ mú Hamani wá kíákíá, kí a lè ṣe gẹ́gẹ́ bí Esteri ti wí.” Ọba àti Hamani sì wá sí àsè tí Esteri pèsè.

⁶Nígbà tí wọ́n ń mu wáìnì, ọba béèrè pé, “Kí ni ẹ̀bẹ̀ rẹ, Esteri? A ó gbà á. Kí ni ìbéèrè rẹ? Àní ìdajì ìjọba—tìrẹ ni.”

⁷Esteri dáhùn pé, “Ẹ̀bẹ̀ mi àti ìbéèrè mi ni èyí: ⁸Bí mo bá ti rí ojú rere lọ́dọ̀ ọba, tí ó bá sì wu ọba láti gba ẹ̀bẹ̀ mi àti láti mú ìbéèrè mi ṣẹ, kí ọba àti Hamani wá sí àsè tí èmi yóò pèsè fún wọn. Lọ́la, èmi yóò ṣe gẹ́gẹ́ bí ọba ti wí.”

Ìbínú Hamani Dojú Kọ Mordekai

⁹Hamani jáde ní ọjọ́ náà pẹ̀lú ìdùnnú àti ayọ̀. Ṣùgbọ́n nígbà tí ó rí Mordekai ní ẹnu-ọ̀nà ọba tí kò dìde tí kò sì wárìrì níwájú rẹ̀, inú bí Hamani sí Mordekai gidigidi. ¹⁰Síbẹ̀síbẹ̀, Hamani fà ara rẹ̀ sẹ́yìn, ó sì lọ sí ilé. Ó ránṣẹ́ pe àwọn ọ̀rẹ́ rẹ̀ àti Sereṣi aya rẹ̀, ¹¹Hamani sọ fún wọn nípa ògo ọrọ̀ rẹ̀, àti ọ̀pọ̀lọpọ̀ àwọn ọmọkùnrin rẹ̀, àti bí ọba ti bu ọlá fún un tí ó sì gbé e ga ju àwọn ìjòyè àti àwọn ìránṣẹ́ ọba lọ.

¹²Hamani fi kún un pé, “Kì í sì í ṣe èyí nìkan. Esteri ayaba kò pe ẹnikẹ́ni bí kò ṣe èmi nìkan pẹ̀lú ọba sí àsè rẹ̀, a sì tún pè mí lọ́la pẹ̀lú ọba. ¹³Síbẹ̀, gbogbo èyí kò lérè kankan fún mi nígbàkigbà tí mo bá rí Mordekai ará Júù tí ó jókòó ní ẹnu-ọ̀nà ọba.”

¹⁴Sereṣi aya rẹ̀ àti gbogbo àwọn ọ̀rẹ́ rẹ̀ wí pé, “Jẹ́ kí wọ́n kan igi kan tí gíga rẹ̀ jẹ́ ẹsẹ̀ bàtà márùnléláàádọ́rin. Ní òwúrọ̀, béèrè lọ́wọ́ ọba kí a so Mordekai kọ́ sí orí rẹ̀. Nígbà náà, bá ọba lọ sí àsè pẹ̀lú ìdùnnú.” Ohun yìí wu Hamani, ó sì mú kí wọ́n kan igi náà.