எஸ்தர் 5

5 ¹மூன்றாம் நாளிலே, எஸ்தர் ராஜவஸ்திரங்களை உடுத்திக்கொண்டு, ராஜாவின் மண்டபத்திற்கு எதிரே, அரண்மனையின் உள்முற்றத்திலே வந்து நின்றாள். ராஜா அரண்மனையின் வாசலுக்கு எதிரே, மண்டபத்திலே தன் ராஜசிங்காசனத்தின்மேல் வீற்றிருந்தான். ²ராஜா ராஜாத்தியாகிய எஸ்தர் முற்றத்தில் நிற்கிறதைக் கண்டபோது, அவள் அவனுடைய கண்களில் தயவு பெற்றாள்; ராஜா தன் கையில் இருந்த பொற்செங்கோலை அவளுக்கு நேராக நீட்டினான். அப்பொழுது எஸ்தர் அருகில் வந்து செங்கோலின் நுனியைத் தொட்டாள்.

³ராஜா அவளைப் பார்த்து, “ராஜாத்தியாகிய எஸ்தரே, என்ன செய்தி? உன் விண்ணப்பம் என்ன? ராஜ்யத்தில் பாதிமட்டும் உனக்குக் கொடுக்கப்படும்” என்றான்.

⁴அதற்கு எஸ்தர், “ராஜாவுக்குச் சித்தமானால், நான் ஆயத்தம்பண்ணின விருந்துக்கு ராஜாவும் ஆமானும் இன்று வரவேண்டும்” என்றாள்.

⁵அப்பொழுது ராஜா, “எஸ்தர் சொன்னபடி செய்யும்படி, ஆமானைச் சீக்கிரமாய் அழைத்துவாருங்கள்” என்றான். ராஜாவும் ஆமானும் எஸ்தர் ஆயத்தம்பண்ணின விருந்துக்கு வந்தார்கள்.

⁶திராட்சரசம் அருந்தும்போது ராஜா எஸ்தரைப் பார்த்து, “உன் விண்ணப்பம் என்ன? அது உனக்குக் கட்டளையிடப்படும். உன் வேண்டுதல் என்ன? ராஜ்யத்தில் பாதியானாலும் அது உனக்கே” என்றான்.

⁷அதற்கு எஸ்தர், “என் விண்ணப்பமும் என் வேண்டுதலும் இதுதான்: ⁸நான் ராஜாவின் கண்களில் தயவு பெற்றிருந்து, என் விண்ணப்பத்தை அருளவும் என் வேண்டுதலை நிறைவேற்றவும் ராஜாவுக்குச் சித்தமானால், நான் அவர்களுக்காக ஆயத்தம்பண்ணப்போகிற விருந்துக்கு ராஜாவும் ஆமானும் வரவேண்டும். நாளைக்கு ராஜா சொல்லுகிறபடி செய்வேன்” என்றாள்.

ஆமானின் கோபம் மொர்தெகாய்க்கு விரோதமாய்த் திரும்புகிறது

⁹அன்றையதினம் ஆமான் மகிழ்ச்சியோடும் சந்தோஷ இருதயத்தோடும் புறப்பட்டான். ஆனாலும் ராஜாவின் வாசலில் இருந்த மொர்தெகாய் தன் முன்பாக எழுந்திராமலும் தனக்குப் பயந்து நடுங்காமலும் இருக்கிறதை ஆமான் கண்டபோது, மொர்தெகாயின்மேல் மூர்க்க கோபம் நிறைந்தவனானான். ¹⁰இருந்தாலும் ஆமான் தன்னை அடக்கிக்கொண்டு, தன் வீட்டுக்குப் போனான். அவன் தன் சிநேகிதரையும் தன் மனைவியாகிய சிரேஷையும் அழைத்தனுப்பி, ¹¹தன் ஐசுவரியத்தின் மகிமையையும், தன் அநேக குமாரர்களையும், ராஜா தன்னை எப்படிக் கனம்பண்ணி, ராஜாவின் பிரபுக்களுக்கும் ஊழியக்காரருக்கும் மேலாகத் தன்னை உயர்த்தினான் என்பதையும் அவர்களுக்கு விவரித்துச் சொன்னான்.

¹²மேலும் ஆமான், “அதுமட்டுமல்ல, ராஜாத்தியாகிய எஸ்தர் தான் ஆயத்தம்பண்ணின விருந்துக்கு ராஜாவோடேகூட என்னைமட்டும் அழைத்தாள்; நாளைக்கும் ராஜாவோடேகூட நான் அவளிடத்தில் அழைக்கப்பட்டிருக்கிறேன். ¹³ஆனாலும் யூதனாகிய மொர்தெகாய் ராஜாவின் வாசலில் உட்கார்ந்திருக்கிறதை நான் காணுமளவும், இதெல்லாம் எனக்கு ஒன்றுக்கும் உதவாது” என்றான்.

¹⁴அப்பொழுது அவன் மனைவியாகிய சிரேஷும் அவன் சிநேகிதர் அனைவரும் அவனை நோக்கி, “எழுபத்தைந்து அடி உயரமான ஒரு தூக்குமரத்தை உண்டுபண்ணச்சொல்லும்; காலையிலே மொர்தெகாயை அதிலே தூக்கிப்போடும்படி ராஜாவிடத்தில் கேளும். பின்பு சந்தோஷமாய் ராஜாவோடேகூட விருந்துக்குப் போம்” என்றார்கள். இந்த யோசனை ஆமானுக்கு நன்றாய்த் தோன்றி, அந்தத் தூக்குமரத்தை உண்டுபண்ணுவித்தான்.