Estere Afika Pafupi ndi Mpando Waufumu wa Mfumu
Estere akuvala zovala zake zachifumu ndipo akuima m'bwalo lamkati osaitanidwa; ndodo yagolide ikutambasulidwa, ndipo akupatsidwa mpaka theka la ufumu. Iye akupempha phwando lokha, kenako lachiwiri. Hamani akuchoka akusangalala kwambiri, akupsa mtima ndi Moredekai, ndipo akumanga mtengo.
5 1Pa tsiku lachitatu, Estere anavala zovala zaufumu, nayimirira pa bwalo lamkati la nyumba yaufumu, moyang'anizana ndi chipinda chachikulu cha mfumu. Mfumu anakhala pa mpando wake waufumu m'chipinda chija, moyang'anizana ndi khomo lolowera la nyumba yaufumu. 2Pamene mfumu anaona Estere mfumukazi atayimirira pa bwalo, Estere anapeza chisomo pamaso pake, ndipo mfumu anatambasula ndodo yaufumu yagolide imene inali m'dzanja lake. Estere anasendera pafupi, nakhudza msonga yake.
3Mfumu anafunsa nati, “Kodi chavuta ndi chiyani, Estere mfumukazi? Ukufuna chiyani? Ngakhale theka la ufumu udzapatsidwa iwe.”
4Estere anati, “Ngati chingakomere mfumu, mfumu pamodzi ndi Hamani abwere lero ku phwando limene ndakonza.”
5Mfumu anati, “Fulumirani kukayitana Hamani, kuti tichite zomwe Estere wanena.” Mfumu ndi Hamani anabwera ku phwando limene Estere anakonza.
6Pamene ankamwa vinyo, mfumu anafunsa nati, “Kodi pempho lako nchiyani, Estere? Lidzakwaniritsidwa. Ndipo chofuna chako nchiyani? Ngakhale theka la ufumu, ndi lako.”
7Estere anayankha nati, “Pempho langa ndi chofuna changa ndi ichi: 8Ngati ndapeza chisomo pamaso pa mfumu, ndipo ngati chikumkomera mfumu kundipatsa pempho langa ndi kukwaniritsa chofuna changa, mfumu ndi Hamani abwere ku phwando limene ndidzawakonzera. Mawa ndidzachita monga mfumu wanena.”
Ukali wa Hamani Watembenukira Moredekai
9Hamani anachoka tsiku limenelo ali wokondwa ndi wosangalala. Koma ataona Moredekai pa chipata cha mfumu wosayimirira kapena kunjenjemera pamaso pake, Hamani anakwiya kwambiri ndi Moredekai. 10Komabe Hamani anadziletsa, napita kwawo. Anatumiza kukayitana abwenzi ake ndi mkazi wake Zeresi, 11Hamani anawauza za kukula kwa chuma chake, ana ake aamuna ambiri, ndi mmene mfumu anamulemekezera ndi kumukweza kuposa akuluakulu ndi antchito a mfumu.
12Hamani anawonjezera nati, “Ndipo si zimenezi zokha. Estere mfumukazi sanayitane wina koma ine ndekha pamodzi ndi mfumu ku phwando lake, ndipo mawa ndayitanidwanso pamodzi ndi mfumu. 13Koma zonsezi sizindithandiza kanthu nthawi iliyonse ndikaona Moredekai Myuda atakhala pa chipata cha mfumu.”
14Mkazi wake Zeresi ndi abwenzi ake onse anati, “Alamule kuti amange mtengo wotalika mapazi 75. M'mawa, upemphe mfumu kuti apachikepo Moredekai. Kenaka upite ndi mfumu ku phwando, uli wokondwa.” Hamani anakondwera ndi zimenezi, nalamula kuti amange mtengowo.
