አስቴር 5

5 ¹በሦስተኛው ቀን አስቴር የንግሥና ልብስ ለብሳ በቤተ መንግሥቱ ውስጠኛ አደባባይ ከንጉሡ አዳራሽ ፊት ለፊት ቆመች። ንጉሡም በአዳራሹ ውስጥ በንጉሣዊ ዙፋኑ ላይ ከቤተ መንግሥቱ መግቢያ ትይዩ ተቀምጦ ነበር። ²ንጉሡ ንግሥቲቱ አስቴርን በአደባባዩ ቆማ ባየ ጊዜ፣ በእርሱ ዘንድ ሞገስ አገኘች፤ በእጁም የያዘውን የወርቅ በትረ መንግሥት ዘረጋላት። አስቴርም ቀርባ የበትሩን ጫፍ ዳሰሰች።

³ንጉሡም፣ “ንግሥት አስቴር ሆይ፣ ምን ሆነሻል? የምትለምኚውስ ምንድን ነው? እስከ መንግሥቴ እኩሌታ ድረስ ይሰጥሻል” አላት።

⁴አስቴርም፣ “ንጉሡ ቢወድ፣ እርሱና ሐማ ዛሬ ላዘጋጀሁት ግብዣ ይምጡ” አለች።

⁵ንጉሡም፣ “አስቴር እንዳለችው ይደረግ ዘንድ ሐማን ፈጥናችሁ አምጡ” አለ። ንጉሡና ሐማ አስቴር ወዳዘጋጀችው ግብዣ መጡ።

⁶ንጉሡም የወይን ጠጅ ሲጠጡ፣ “አስቴር ሆይ፣ ልመናሽ ምንድን ነው? ይፈጸምልሻል። ጥያቄሽስ ምንድን ነው? የመንግሥቴ እኩሌታም ቢሆን፣ የአንቺ ነው” አላት።

⁷አስቴርም መልሳ እንዲህ አለች፤ “ልመናዬና ጥያቄዬ ይህ ነው፦ ⁸በንጉሡ ዘንድ ሞገስ አግኝቼ እንደ ሆነ፣ ንጉሡም ልመናዬን ሊሰጠኝና ጥያቄዬን ሊፈጽምልኝ ቢወድ፣ ንጉሡና ሐማ ለእነርሱ ወደማዘጋጀው ግብዣ ይምጡ። ነገም ንጉሡ እንዳለው አደርጋለሁ።”

የሐማ ቍጣ በመርዶክዮስ ላይ ይነሣል

⁹ሐማም በዚያ ቀን ደስ ብሎትና እየተደሰተ ወጣ። ነገር ግን መርዶክዮስ በንጉሡ በር ላይ ሳይነሣና በፊቱ ሳይንቀጠቀጥ ባየ ጊዜ፣ ሐማ በመርዶክዮስ ላይ እጅግ ተቈጣ። ¹⁰ነገር ግን ሐማ ራሱን ገትቶ ወደ ቤቱ ሄደ። ወዳጆቹንና ሚስቱን ዜሬሽን አስጠራ፤ ¹¹ሐማም የሀብቱን ክብር፣ የብዙ ወንዶች ልጆቹን፣ ንጉሡም ከሹማምቱና ከአገልጋዮቹ በላይ ከፍ ከፍ አድርጎ እንዳከበረው ነገራቸው።

¹²ሐማም፣ “ይህ ብቻ አይደለም” ብሎ ጨመረ፤ “ንግሥት አስቴር ከንጉሡ ጋራ እኔን ብቻ ወደ ግብዣዋ ጠራች፤ ነገም ደግሞ ከንጉሡ ጋራ ተጠርቻለሁ። ¹³ነገር ግን አይሁዳዊውን መርዶክዮስን በንጉሡ በር ላይ ተቀምጦ ባየሁ ጊዜ ሁሉ፣ ይህ ሁሉ ምንም አይጠቅመኝም።”

¹⁴ሚስቱ ዜሬሽና ወዳጆቹ ሁሉ፣ “ቁመቱ ሰባ አምስት ጫማ የሆነ ግንድ ይሠራ፤ ጥዋትም መርዶክዮስ በእርሱ ላይ እንዲሰቀል ንጉሡን ለምን፤ ከዚያም ደስ ብሎህ ከንጉሡ ጋራ ወደ ግብዣው ሂድ” አሉት። ይህም ሐማን ደስ አሰኘው፤ ግንዱም እንዲሠራ አደረገ።