Me basika na mukanda
Dibuku

Ba zitisaka Esete mpe Mordekai

Bimvwama ya Amani ke kwenda na Esete mpe nela ya kinyemo ya yandi na Mordekai, kasi lutumu ya lufwa lenda balulama ve. Na yina, lutumu ya zole ke basika na bampunda ya kintinu: ba-Zwife lenda vukana mpe kutanina luzingu ya bawu. Mordekai ke basika na bilele ya ntinta ya kintinu mpe ya wolo, mpe Suze ke sala milolo.

Kapu 8.

Na kilumbu yina, ntinu Kserkse pesaka ntinu ya kento Esete bimvwama ya Amani, mbeni ya ba-Zwife. Mordekai kwizaka na ntwala ya ntinu, samu ti Esete zabisaka ntinu mutindu Mordekai vwandaka na yandi. Ntinu katulaka nela ya kinyemo ya yandi, yina yandi bakaka dyaka na Amani, mpe yandi pesaka yawu na Mordekai. Esete tulaka Mordekai na zulu ya bimvwama ya Amani.

Esete zonzaka dyaka na ntinu, yandi bwaka na makulu ya yandi, yandi dilaka, mpe yandi lombaka yandi na kumanisa mambu ya yimbi ya Amani, muntu ya Agage, mpe mfundu ya yandi yina yandi salaka na ba-Zwife. Ntinu nangunaka mukawa ya wolo na Esete, mpe yandi telamaka mpe yandi vwandaka ya kutelama na ntwala ya ntinu. Yandi tubaka: «Kana yawu me yangidika ntinu, kana mu me zwa luzolo na meso ya ntinu, kana dyambu yayi me monikina ya kudedama na ntwala ya yandi, mpe kana mu me pesa yandi kyese, bika ti ba sonika mikanda samu na kubalula mikanda yina Amani, mwana ya Amedata, muntu ya Agage, kanisaka mpe sonikaka samu na kufwa ba-Zwife na bizunga nyonso ya ntinu. Wapi mutindu mu lenda kanga ntima na kutala mpasi yina ke kwiza kubwila bantu ya munu? Wapi mutindu mu lenda kanga ntima na kutala dikanda ya munu yina ba ke bebisa?»

Ntinu Kserkse zabisaka ntinu ya kento Esete mpe Mordekai, mu-Zwife: «Mu pesaka Esete yinzo ya Amani, mpe bawu ledikaka yandi na nti samu ti yandi salaka mfundu na ba-Zwife. Beno sonika mambu yina me tala ba-Zwife mutindu beno ke tala ti yawu kele ya mbote, na nkumbu ya ntinu, mpe beno tula yawu kinyemo na nela ya ntinu. Samu ti bisono yina ba me sonika na nkumbu ya ntinu, yina ba me tula kinyemo na nela ya yandi, ata muntu lenda kubalula yawu ve.»

Ba bokilaka basoniki ya ntinu na kilumbu ya makumi zole na tatu ya ngonda ya tatu, ngonda ya Sivane, mpe bawu sonikaka mambu nyonso yina Mordekai tumisaka na ba-Zwife, na bantu ya kuyala, na bamfumu ya bizunga, mpe na bantu ya kisalu ya bizunga nkama mosi na makumi zole na nsambwadi, kubanda na Inde tii na Kuse. Konso kizunga na mutindu ya kusonika ya yawu, konso dikanda ya bantu na ndinga ya bawu, mpe ba-Zwife na mutindu ya kusonika mpe na ndinga ya bawu. Mordekai sonikaka na nkumbu ya ntinu Kserkse, yandi tulaka yawu kinyemo na nela ya ntinu, mpe yandi fidisaka mikanda na bantu ya kunata mikanda yina vwandaka kwenda na bampunda ya nswalu, bampunda ya ntinu yina ba butisaka samu na kisalu ya ntinu. Lutumu ya ntinu pesaka ba-Zwife yina vwandaka na konso mbanza luve ya kuvukana kisika mosi mpe ya kunwanina luzingu ya bawu, luve ya kubebisa, ya kufwa, mpe ya kumanisa konso binwani ya konso dikanda ya bantu to ya konso kizunga yina zolaka kunwanisa bawu, ata bana mpe bakento ya bawu, mpe ya kubotola bima ya bambeni ya bawu. Dyambu yayi fwana kusalama na kilumbu mosi na bizunga nyonso ya ntinu Kserkse, na kilumbu ya kumi na tatu ya ngonda ya kumi na zole, ngonda ya Adare. Kifwani ya lutumu yina fwana kupesama bonso musiku na konso kizunga mpe kuzabisama na bantu nyonso, samu ti ba-Zwife kuvwanda ya kukubama na kilumbu yina samu na kufutisa bambeni ya bawu yimbi. Bantu ya kunata mikanda kwendaka na mbangu na bampunda ya ntinu. Lutumu ya ntinu pusaka bawu na kukwenda na nswalu nyonso. Mpe ba pesaka lutumu yina na mbanza ya ngolo ya Suze.

Mordekai katukaka na ntwala ya ntinu ya kulwata bilele ya ntinta ya dizulu mpe ya mpembe, mpu ya nene ya wolo, mpe kinkuti ya lino ya mbote mpe ya ntinta ya mbwaki. Bantu ya Suze salaka milolo mpe bawu yangalalaka. Ba-Zwife vwandaka na mwinda, na kyese, na nsayi, mpe na lukumu. Lutumu mpe nsiku ya ntinu kumaka na konso kizunga mpe na konso mbanza. Ba-Zwife vwandaka na kyese mpe na nsayi, bawu salaka mukembo, kilumbu ya kyese. Bantu mingi ya makanda ya nsi kumaka ba-Zwife, samu ti boma ya ba-Zwife kotaka bawu.