Mi eng' bukuit
Bukuit

Konyitotiin Ester ak Mordekai

Keigoochi Ester tuguugap Haman, ak koigoochi Mordekai peteiyot ne po ng'ookset, ago mamuuch keweek ng'atuutyetap meet. Kong'eetun anyun ng'atuutyet ne po aeng' eng' kariisyek che po laitoryat: muuchi Yahudik kotuiyo ak kotoretkei saboonwekwak. Kong'eet Mordekai eng' ngoroik che buluu ak thahabu, ak kaguuto Susa.

Sura 8.

Eng' peetuunooto kogoochi laitoryat Xerxes laitoryat Ester tuguugap Haman, ne ki puunigap Yahudik. Konyo Mordekai taitap laitoryat, amu kagomwa Ester kole ineendet ko nee eng' inyee. Ki inem laitoryat peteiyonnyi ne po ng'ookset, ne ki konem kogeny eng' Haman, ak kogoochi Mordekai. Ki konde Ester Mordekai kobou tuguugap Haman.

Ki ng'alaalji Ester laitoryat kogeny, ak kobut eng' kweonikyik, ak koriir, ak kosoomei koiste yaityetap Haman Agagindet ak tetutyennyi ne ki tet agobo Yahudik. Ki ilaachi laitoryat Ester kirokto ne po thahabu ne po pounateet, ak kong'eet kotonon tainnyi. Ki le, “Ngot komyee eng' laitoryat, ak ngot achamak eng' tainnyi, ak ngot keer kole imanat niito, ak amyee eng' ineendet, kesir paronok che iweekei ne ki tet ak kosir Haman weeriitap Hammedatha Agagindet kobar Yahudik che mi kiwotinwek tugul che po laitoryat. Ole amuuchi ano ageer konyonji yaityet piikyuk? Ole amuuchi ano ageer kegirit ooreennyu?”

Ki leenji laitoryat Xerxes laitoryat Ester ak Mordekai Yahudyot, “Kaagoochi Ester kootap Haman, ak kisonginin eng' keetit amu ki tet ng'aleek che po kobar Yahudik. Osir agobo Yahudik ko uu ye ogeere ole myee, eng' kainetap laitoryat, ak ong'ooch eng' peteiyonnyi ne po ng'ookset—amu siruutik che kisir eng' kainetap laitoryat ak keng'ooch eng' peteiyonnyi, ma kimuuchi keweekto.”

Ki kiguure siriigap laitoryat eng' peetuut ne po artam ak somok eng' arawet ne po somok—Sivan—ak kosir tugul che ki ng'at Mordekai, kochoor Yahudik ak kochoor kiptainik che eecheen, pounik, ak otwogik che po kiwotinwek pogol ak artam ak tisap kong'etee India agoi Kush: kiwoteet age tugul eng' siruutennyi, piik age tugul eng' kutinnywa, ak Yahudik eng' siruutennywa ak kutinnywa. Ki sir Mordekai eng' kainetap laitoryat Xerxes, ak kong'ooch eng' peteiyotap laitoryat ne po ng'ookset, ak koyookyi paronok eng' kiyooktoi che pandai eng' oinoorik che pandai che ki rio amu poisyetap laitornatet. Ki goochi ng'atuutyetap laitoryat Yahudik che mi nganasook tugul kimnateet koyumgei ak kotoretkei saboonigwak: kobar, ak kogir, ak kowong' kiplugotinik tugul che iratotiin che po piik anan kiwoteet age tugul che kong'eetyi icheek—kobooto chilil ak kwonyiik—ak koluul tuguugap puunikwak. Yaaksei niito eng' peetuut agenge eng' kiwotinwek tugul che po laitoryat Xerxes—peetuut ne po taman ak somok eng' arawet ne po taman ak aeng', Adar. Kigeek karogutetap ng'atuutyoni ng'atuutik eng' kiwoteet age tugul ak keboorchi piik tugul, si koek Yahudik che chobootiin eng' peetuunooto koyaakyigei mugetuut puunikwak. Ki pwa kochook kiyooktoi che ki pandai oinoorigap laitornatet, ki chaaktaen ak kipiitaen eng' ng'atuutyetap laitoryat; ki kigoochin ng'atuutyet eng' irimeetap Susa.

Ki ng'eet Mordekai eng' taitap laitoryat kolache ngoroik che buluu ak che lelaach che po laitornatet, ak kuutweet ne oo ne po thahabu, ak ngoryeet ne po katanit ne korooron ak ne piriir. Ki waach Susa ak koboiboitu. Ki tinye Yahudik lewenik, poiboiyet, kagasetapkei, ak konyit. Ki it ng'atuutyetap laitoryat ak ng'olyoondennyi kiwoteet age tugul ak nganaseet; ki tinye Yahudik poiboiyet ak kagasetapkei, amitwogik, ak peetuut ne oo. Ki iwal piik che chaang' che po emet koik Yahudik, amu ki piit icheek iywetap Yahudik.