1 ሳሙኤል 3

3 ¹ብላቴናው ሳሙኤል በኤሊ ሥር ሆኖ አባታችንን ያገለግል ነበር። በዚያን ዘመን የአባታችን ቃል ብርቅ ነበር፤ ራእይም የተለመደ አልነበረም። ²አንድ ቀን ኤሊ በተለመደ ስፍራው ተኝቶ ነበር። ዐይኖቹ እጅግ ደክመው ስለ ነበር ማየት አይችልም ነበር። ³የአባታችን መብራት ገና አልጠፋም ነበር፤ ሳሙኤልም ታቦቱ ባለበት በአባታችን ቤተ መቅደስ ተኝቶ ነበር። ⁴አባታችንም ሳሙኤልን ጠራው፤ ሳሙኤልም፣ “እነሆኝ” አለ።

⁵ወደ ኤሊ ሮጦ፣ “እነሆኝ፤ ጠራኸኝ” አለው። ኤሊም፣ “አልጠራሁህም፤ ተመልሰህ ተኛ” አለው። እርሱም ሄዶ ተኛ።

⁶አባታችንም እንደ ገና፣ “ሳሙኤል!” ብሎ ጠራ። ሳሙኤልም ተነሥቶ ወደ ኤሊ ሄዶ፣ “እነሆኝ፤ ጠራኸኝ” አለው። ኤሊም፣ “ልጄ ሆይ፣ አልጠራሁም፤ ተመልሰህ ተኛ” አለው።

⁷ሳሙኤል ገና አባታችንን አያውቅም ነበር፤ የአባታችንም ቃል ገና አልተገለጠለትም ነበር። ⁸አባታችንም ሳሙኤልን እንደ ገና ለሦስተኛ ጊዜ ጠራው። እርሱም ተነሥቶ ወደ ኤሊ ሄዶ፣ “እነሆኝ፤ ጠራኸኝ” አለው። ያን ጊዜ ኤሊ አባታችን ብላቴናውን እንደሚጠራ ተረዳ።

⁹ኤሊም ሳሙኤልን፣ “ሄደህ ተኛ። ቢጠራህ፣ ‘አባቴ ሆይ፣ ተናገር፤ ባሪያህ እያደመጠ ነውና’ በል” አለው። ሳሙኤልም ሄዶ በስፍራው ተኛ።

¹⁰አባታችንም መጥቶ እዚያ ቆመ፤ እንደ ቀድሞውም፣ “ሳሙኤል! ሳሙኤል!” ብሎ ጠራ። ሳሙኤልም፣ “ተናገር፤ ባሪያህ እያደመጠ ነውና” አለ።

¹¹አባታችንም ሳሙኤልን እንዲህ አለው፤ “እነሆ፣ የሚሰማው ሁሉ ሁለቱም ጆሮዎቹ የሚያቃጭሉበትን ነገር በእስራኤል ላይ ላደርግ ነው። ¹²በዚያ ቀን ስለ ቤተ ሰቡ የተናገርሁትን ሁሉ፣ ከመጀመሪያው እስከ መጨረሻው በኤሊ ላይ እፈጽማለሁ። ¹³ስለሚያውቀው ኀጢአት ቤቱን ለዘላለም እንደምፈርድበት ነግሬዋለሁ፤ ልጆቹ ተሳድበውብኛል፣ እርሱም አልከለከላቸውም። ¹⁴ስለዚህ ለኤሊ ቤት ማልሁ፤ የኤሊ ቤት በደል በመሥዋዕት ወይም በቍርባን ለዘላለም አይሰረይም።”

¹⁵ሳሙኤልም እስኪነጋ ድረስ ተኝቶ ነበር፤ ከዚያም የአባታችንን ቤት ደጆች ከፈተ። ነገር ግን ራእዩን ለኤሊ ለመንገር ፈራ። ¹⁶ኤሊ ግን ጠርቶት፣ “ልጄ ሳሙኤል” አለው። ሳሙኤልም፣ “እነሆኝ” ብሎ መለሰ።

¹⁷ኤሊም፣ “ምን አለህ?” ብሎ ጠየቀው። “ከእኔ አትሰውረው። የነገረህን ነገር ሁሉ ከእኔ ብትሰውር፣ አባታችን ክፉኛ ይቅጣህ።”

¹⁸ሳሙኤልም ሁሉን ነገር ነገረው፤ ከእርሱም ምንም አልሰወረም። ኤሊም፣ “እርሱ አባታችን ነው፤ መልካም የመሰለውን ያድርግ” አለ።

¹⁹ሳሙኤልም አደገ፤ አባታችንም ከእርሱ ጋር ነበር፤ ከሳሙኤልም ቃላት አንዱን እንኳ መሬት ላይ እንዲወድቅ አላደረገም። ²⁰እስራኤልም ሁሉ ከዳን እስከ ቤርሳቤህ ድረስ ሳሙኤል የአባታችን ነቢይ ሆኖ እንደ ተረጋገጠ ዐወቀ። ^a a v20 ዳን የእስራኤል ጫፍ ሰሜናዊ ከተማ ስትሆን፣ ቤርሳቤህ ደግሞ ጫፍ ደቡባዊ ከተማዋ ነበረች፤ “ከዳን እስከ ቤርሳቤህ” ማለት በመላው ምድር ሁሉ ማለት ነው። ²¹አባታችንም በሴሎ መገለጡን ቀጠለ፤ ምክንያቱም በዚያ ራሱን በቃሉ ለሳሙኤል ገለጠ።