Rutu 3

3 ¹Nígbà náà ni Naomi, ìyá ọkọ rẹ̀, wí fún un pé, “Ọmọbìnrin mi, ṣé kò yẹ kí èmi wá ibùgbé fún ọ, kí ó baà dára fún ọ? ²Ǹjẹ́ Boasi, ẹni tí ìwọ ti wà pẹ̀lú àwọn ọmọbìnrin rẹ̀, kì í ṣe ìbátan wa? Ní alẹ́ yìí ni yóò máa gbọn barle ní ilẹ̀ ìpakà. ³Wẹ ara rẹ, fi òróró olóòórùn dídùn pa ara rẹ, wọ aṣọ ìbora rẹ, kí o sì sọ̀ kalẹ̀ lọ sí ilẹ̀ ìpakà. Má ṣe fi ara rẹ hàn ọkùnrin náà títí yóò fi jẹun tán, tí yóò sì mu ọtí tán. ⁴Nígbà tí ó bá dùbúlẹ̀, kíyè sí ibi tí ó dùbúlẹ̀ sí; lọ ṣí ẹsẹ̀ rẹ̀ sílẹ̀, kí o sì dùbúlẹ̀—yóò sì sọ ohun tí ìwọ yóò ṣe fún ọ.”

⁵Rutu sì wí fún un pé, “Gbogbo ohun tí o bá sọ ni èmi yóò ṣe.” ⁶Ó sì sọ̀ kalẹ̀ lọ sí ilẹ̀ ìpakà, ó sì ṣe gbogbo ohun tí ìyá ọkọ rẹ̀ ti sọ fún un. ⁷Boasi jẹun, ó mu ọtí, inú rẹ̀ sì dùn, nígbà náà ni ó dùbúlẹ̀ ní òpin òkìtì ọkà. Ó sì yọ́ wá ní ìkọ̀kọ̀, ó ṣí ẹsẹ̀ rẹ̀ sílẹ̀, ó sì dùbúlẹ̀. ⁸Ní àárín òru, ara ọkùnrin náà fò, ó yípadà, sì kíyèsíi, obìnrin kan dùbúlẹ̀ ní ẹsẹ̀ rẹ̀! ⁹Ó sì béèrè pé, “Ta ni ìwọ?” Ó dáhùn pé, “Èmi ni Rutu, ìránṣẹ́bìnrin yín. Ẹ tẹ́ etí aṣọ yín bo ìránṣẹ́bìnrin yín, nítorí ẹ̀yin ni olùràpadà.” ^a a v9 Títẹ́ etí aṣọ sórí ẹnìkan jẹ́ ìbéèrè fún ìgbéyàwó àti ààbò.

¹⁰Ó sì wí pé, “Alábùkún-fún ni ìwọ ní ọ̀dọ̀ Baba wa, ọmọbìnrin mi. Oore ìkẹyìn yìí sàn ju ti àkọ́kọ́ lọ, nítorí ìwọ kò lépa àwọn ọ̀dọ́kùnrin, yálà tálákà tàbí ọlọ́rọ̀. ¹¹Nísinsìnyí, ọmọbìnrin mi, má bẹ̀rù. Èmi yóò ṣe gbogbo ohun tí o béèrè, nítorí gbogbo ìlú mi mọ̀ pé obìnrin oníwà rere ni ìwọ. ¹²Nísinsìnyí, òtítọ́ ni pé olùràpadà ni èmi, ṣùgbọ́n olùràpadà kan wà tí ó súnmọ́ ju èmi lọ. ¹³Dúró ní alẹ́ yìí. Ní òwúrọ̀, bí ó bá fẹ́ rà ọ́ padà—ó dára, jẹ́ kí ó rà ọ́ padà. Bí kò bá sì ṣe bẹ́ẹ̀, bí Baba wa ti wà láàyè, èmi yóò rà ọ́ padà. Dùbúlẹ̀ títí di òwúrọ̀.”

¹⁴Ó sì dùbúlẹ̀ ní ẹsẹ̀ rẹ̀ títí di òwúrọ̀, ó sì dìde ṣáájú kí a tó lè dá ẹnìkan mọ̀, nítorí ó wí pé, “Kí ẹnikẹ́ni má ṣe mọ̀ pé obìnrin kan wá sí ilẹ̀ ìpakà.” ¹⁵Ó sì wí pé, “Mú ìborùn tí o wọ̀ wá; na á jáde.” Ó sì na á jáde. Ó wọn ìwọ̀n barle mẹ́fà, ó gbé e lé e lórí, ó sì wọ ìlú lọ.

¹⁶Nígbà tí Rutu dé ọ̀dọ̀ ìyá ọkọ rẹ̀, Naomi béèrè pé, “Báwo ni ó ti rí, ọmọbìnrin mi?” Ó sì ròyìn fún un gbogbo ohun tí ọkùnrin náà ṣe fún un. ¹⁷Ó sì wí pé, “Ìwọ̀n barle mẹ́fà wọ̀nyí ni ó fún mi, ó ní, ‘Má ṣe padà sọ́dọ̀ ìyá ọkọ rẹ ní ọwọ́ òfo.’”

¹⁸Naomi sì wí pé, “Dúró, ọmọbìnrin mi, títí ìwọ yóò fi mọ bí nǹkan yóò ti rí, nítorí ọkùnrin náà kì yóò sinmi àyàfi tí ó bá parí ọ̀rọ̀ náà lónìí.”