Naomi laga Jukti
Naomi Ruth ke raati te dhaan maara jaga te pathai diye, Boaz pora tai laga kapra Ruth laga upor te pheli dibole mangibo nimite. Tai chamki jai, tetia khushi hoi: tai Ruth ke yogya koi, amar Pitri laga naam te tai ke ashirbad diye, aru kosom khai jodi aru kakh laga atmiyo pora chhurai nadiye, tinehoile tai nijor chhurai dibo.
3 1Tetiya tai laga sahu Naomi pora koise, “Moi laga swali, tumi bhal thaki bole, moi tumi nimite ekta ghor nabisaribo naki? 2Jun laga jawan swali khan logot tumi thakise, hei Boaz tu amar sombondhi nohoi naki? Aji rati te tai dhan mara jagah te jow ke sapi ase. 3Gaa dhui lobi, sugandh tel lagabi, tumar kapor pindhi lobi, aru dhan mara jagah te nami jabi. Hei manu kha-lua khotom nohua tak, tumi nijor ke tai usor te najonai dibi. 4Jitia tai letai thakibo, tai kun jagah te ghumai ase, bhal pora sabi; jai kene tai laga theng khuli dibi aru letai jabi—ki koribo lage, tai tumi ke kobo.”
5Aru Ruth pora tai ke koise, “Apuni ki koise, hei sob moi koribo.” 6Tetiya tai dhan mara jagah te nami gaise aru tai laga sahu pora koi diya sob tai korise. 7Boaz khaise, paani khaise, aru tai laga mon khushi hoise, titia tai dhan dhuri laga kinar te letai jaise. Tai lukai kene ahhise, tai laga theng khuli dise, aru letai jaise. 8Adha rati te hei manu chomki uthise, ghuri jaise, aru tai laga theng usor te mahila ekjon letai thakise! 9“Tumi kun ase?” tai hudise. “Moi Ruth, apuni laga noukrani ase,” tai koise. “Apuni laga kapor laga kinar apuni laga noukrani uporte phailai dibi, kilemane apuni ekjon udhar kori diya manu ase.” a a v9 Kunba manu uporte kapor laga kinar phailai diya tu shadi aru bachai rakha nimite anurodh kora asele.
10Tai koise, “Moi laga swali, amar Pitri pora tumi asirbad paise. Tumi laga etiya kora morom tu poila laga pora bhi bhal ase, kilemane dhuni hoilebi gorib hoilebi, jawan manu khan laga pichete tumi dauri juwa nai. 11Etiya, moi laga swali, bhoi nakoribi. Tumi ki mangibo, hei sob moi koribo, kilemane moi laga pura sheher pora tumi ekjon gunwali mahila ase koi kene jane. 12Etiya eitu hosa ase je moi ekjon udhar kori diya manu ase, kintu moi pora bhi usor te thaka ekjon udhar kori diya manu ase. 13Aji rati te thaki jabi. Phojur te, jodi tai tumi ke udhar koribo—bhal, tai ke udhar koribo dibi. Jodi nohoi, amar Pitri jinda thaka hosa nisena, moi tumi ke udhar koribo. Phojur tak letai thakibi.”
14Tai phojur tak tai laga theng usor te letai thakise, aru manu ke sinibo para age te uthise, kilemane tai koise, “Dhan mara jagah te mahila ekjon ahhise koi kene kun bhi najanibo lage.” 15Tai koise, “Tumi pindhi thaka chador tu loi anibi; eitu dhori rakhibi.” Tai eitu dhori rakhise. Tai choi bhag jow napi dise, tai uporte boja rakhi dise, aru sheher bhitor te jaise.
16Jitia Ruth tai laga sahu usor te ahhise, Naomi pora hudise, “Moi laga swali, kineka hoise?” Hei manu pora tai nimite ki korise, hei sob tai koi dise. 17Tai koise, “Tai moi ke eitu choi bhag jow dise, aru koise, ‘Khali hath pora tumar sahu usor te wapas najabi.’”
18Naomi koise, “Moi laga swali, eitu laga ses ki hobo tumi najana tak, rukhi thakibi, kilemane hei manu aji eitu kaam thik nakora tak, aram nolobo.”